2006年2月24日星期五

2-24(fri) xanga suicide

唔知大家有無聽過呢個term? 我好耐之前睇人xanga見到有人談論呢個問題…其實xanga suicide同真實o既suicide道理一樣, 即係一下子delete晒自己成個xanga, o係網上完全消失! 雖然o係現實中, 你都可以一夜之間消失, 但係o係網絡世界就更容易…今日你仲同o個個人講緊o野, 聽日可以成個site唔見o左, 好無“保障”, 感覺好虛無縹緲!

我絕對唔想無啦啦“消失”, 但係有時d o野係逼不得已, 原諒我有難言之隱, 那怕係最無聊o既原因!

我都唔想不辭而別, 所以我都盡量諗辦法去通知我o既讀者! 一下子咁消失o左…我會覺得好對大家唔住…愧對大家多年來o既支持!

其實近年來, 個日記真係愈寫愈矛盾…有多人o黎睇當然係會開心, 識到一班“志同道合”o既讀者亦真係好難得...但愈多人睇, 就愈難去監察…以前可以好暢所欲言咁鍾意講咩都得, 但愈o黎愈多人o既時候, 就好似變o左講句o野都有社會責任咁…好矛盾! 同埋你控制唔到有咩人會入到o黎, 所以比較私人少少o既o野最好都唔好講, 因為網絡世界實在太無邊無際…就係因為咁, 反而無最初寫得咁過癮! 而本來想以呢個日記update下我o既生活o既朋友, 亦都可能會失望, 因為已經唔可以好似一開始o既“英倫遊記”咁, 主力寫發生o係我身上o既事!

所以究竟想多d人睇, 定係想可以暢所欲言又可以保護“私隱”…真係好難取捨?!

呢幾日o黎收到好多讀者o既留言同電郵, 話希望可以繼續睇到我d娛樂評論…放心, 呢樣我一定會繼續…因為我自己都寫得好開心! 電視對我o黎講, 根本就係生活?不能分割o既一部份, 無電視…根本就唔會有芒姐! 正所謂: 全力以赴, 做到最好!!!

雖然同好多讀者都素未謀面, 本身互不相識, 但係大家一路以o黎o既支持, 我真係好感動o架! 因為任何原因search到入o黎其實好容易, 但係睇完一頁仲有興趣日日繼續o黎睇, 真係可以講話好難得! 我成日都會search呢樣o個樣入到人o地個blog, 但睇完一頁之後仲可以吸引我日日返去睇o既, 只係得三兩個…所以我對大家o既厚愛, 係非常之感激!

三年半以來o既心血, 我都好唔忍心一下子無晒…所以呢幾日來我都不停諗方法, 同埋搵地方搬屋! I’ll be back…