2005年11月15日星期二

11-15(tues) “刑事偵”

呢排力追“刑事偵緝檔案”, 已經去到一個如火如荼o既地步…o係一個weekend, 我已經睇o左十幾集…由第一輯睇到落第二輯中段…一氣呵成地睇足十幾集, 確係過癮! 亦都可以比較番兩輯o既唔同! 對上一次睇已經係十年前, 同埋兩輯話晒都相距半年先播, 所以無今次o個種一氣呵成o既暢快! (有無人記得“刑事偵”之前有無重播過呢? 點解我真係好似十年來都無睇過咁?)

首先要再次講o下“刑事偵”o既典故…呢個名係當年我o地一位好同學講o既, 事關呢位“有趣的同學”好鍾意將d terms縮短, 仲每次都縮得好騎呢…好似呢個“刑事偵”, 我o地當年都笑左好耐! 點解唔叫“刑偵”, 甚至“刑事”, 但偏偏就縮d唔縮d, 要叫“刑事偵”呢?! 係咪同“電視精”o個d名有d關係呢?! 原因不明…事關佢不嬲o翕呢d名都o翕得好random, 所以到依家都無從稽考…但係唔緊要, 因為呢個名o係我o地個圈子流傳到十年後o既今日…仲俾我不停咁發揚光大! 大家姑且同我o地一齊稱呢套戲為“刑事偵”啦!

睇番呢套十年前熱追o既戲…坦白講, 真係無我印象中咁好睇! 可能係當時吹捧得太勁, 全香港無人唔係講緊呢套戲, 你唔睇簡直out到爆, 第二日返學同同學無話題…各個因素加埋, 令到佢hit成咁! 某程度上, 可能係一個“情意結”多於一切…呢套戲帶俾我o地呢個年紀o既人太多回憶, 令人諗起中學時代o既開心日子!

其實睇睇o下, 某d劇情都幾婆媽, 同埋好煩! 最怕就係d案情牽涉太多主角, 每一次有呢d案都唔多想睇…好似謝峰俾高敏“殺死”o個段…除o左睇到91年新秀冠軍李家強o既女裝扮相好有驚喜外, 成段都令人好唔想睇番! 高敏太慘喇…第一輯就個女俾人綁架, 個老公又俾人殺埋; 第二輯個男友又俾人殺, 仲要次次佢都係做o左嫌疑犯…點解要搞成咁呀?! 不過有樣o野, 唔知點解張國強o係呢套戲幾有型幾討好…佢o個幾集戲幾乎搶過陶大宇!

仲有, 其實好多集“刑事偵”背後都有佢o既故事…好似第27集o既“車匙撞車事件”, 仲有禮拜四會播o既第31集, 背後有個更“偉大”o既故事…所以呢十年o黎我o地 (主要係我) 都不停咁提起, 仲重複o左好多次o個集o既劇情!

以我記憶, 事情係咁樣發生o既: 當年有隔離班同學從無線中人處得到o左全城至hit劇集“刑事偵緝檔案”第31集o既劇本, 仲o係某日2nd half lunch時o黎o左我o地班房朗讀俾佢d friend聽! 當時o既我應該係o係自己個位度趕緊功課, 居然俾我“偷聽”到d咁精彩o既劇情預告, 咁當然就係放低晒我d功課落力咁“偷聽”劇情啦! 可惜o個時未認識呢位同學, 只可以偷聽, 唔可以問o下佢d劇情o既進展, 亦唔可以去問佢究竟d劇情係咪真o架?! 到後來大家熟o左, 我先講番呢件本來已遺忘o左o既事出o黎!

咁我唯有默默咁記住佢講o既每一句說話, 再到第31集播出時引證番每一段…所以啲frd依家成人恥笑我點解會咁記得呢一集o既劇情…其實係因為佢講完之後我再o係電視睇一次, 咁就已經入晒腦喇…到十年後o既依家, 我都係特別記得呢集o既劇情! 例如一開始大勇+jessie機場外望住carmen隻飛機走, 跟住又上山頂, 仲有大勇送完車匙返屋企, o係“車立”度車匙遇到“色狼”, 大勇去“勇救”佢等…仲有一幕係gigi同jessie去行街見到大勇同另一個女子一齊 (其實係sammi), 我一直都好懷疑o個度係咪康怡廣場o既嘉禾餐廳 (已經執o左九世耐喇)?!

仲有兩日就做第31集…大家記住睇!

而大家如果要聽本來首插曲“愛與情”, 就快d聽埋呢兩日喇…事關到o左後加o個十集, 就會轉o左鄭秀文首“愛的輓歌”做插曲…不過其實兩首歌都好好聽! (但係文文隻“愛與情”當時無得o係無線力plug, 因為o岩o岩發生o左“95歡樂滿東華”粗口事件…雖然我已經唔記得佢講o左句咩粗口喇! 真係o徙晒…呢首係一首十分高質素o既歌, 搞到連季選都入唔到! 如果唔係, 挾“刑事偵”o既威勢…呢隻歌實hit到爆!)

呢套戲真係除o左劇情好睇之外, d歌都好鬼死好聽! 我仲因為呢兩首歌罕有地買o左文文隻“愛與情”大碟 (其實sammi隻碟我都有買…但佢當時作為我“偶像”…就無咩出奇啦!), 仲有埋隻主題曲“為明日爭氣”…呢首歌就唔係話十分好聽, 但係好o岩呢套劇o既feel囉! 其實第一輯古巨基o個兩首歌都好好聽…我當時亦都有買佢隻碟o架! 原來當時作為學生o既我, 仲有米過依家好多…起碼仲好捨得俾錢買碟!

仲有, 由第31集開始, 有我個“浪族闊少爺”偶像sammi出場, 做“dai勇”第n任初戀情人 (事關蘇玉華又話掛名係佢初戀情人, 之後第三輯o既陳法蓉又話係佢初戀情人, sammi又係初戀情人…張大勇一定有十個初戀!)…仲會成日以金毛強式英語口?講: “dai勇, 我好暈呀! (獎門人叫我唔好成日扮佢講“dai勇”…但我又點可以唔扮呢…咁經典!)…然後?粒方糖型物體出o黎…搞到我一直以為好暈真係要袋住粒方糖o係身! (其實後尾諗諗o下, 唔知有無醫學根據呢?)

大家記住留意o下喇! 仲有, 蘇玉華會o係呢幾集死埋添…仲要係o係我o地學校樓下o既跑馬地匯豐(定?生?)門口俾車撞死…大吉利是! 每次放學搭車經過我都覺得好可怕! 點解要揀o係呢度俾車撞死呀? 同埋其實點解要死呀? 橫掂都係差o個十集, 就算話要返去趕拍“真情”, 咪求其話佢去o左外國囉! 做咩要死喎?! 我記得o個集好慘, 我唔鍾意睇d咁o既o野…過份煽情喇!