2005年8月27日星期六

8-27(sat) 2005兒歌金曲頒獎典禮

o岩o岩睇完“2005兒歌金曲頒獎典禮”…無錯, 我係連呢d節目都會錄o黎睇…雖然已經無以前咁keen!

最“精彩”當然係大美人欣宜又出o黎做表演嘉賓, 仲同人氣偶像吳卓羲合演溫馨童話故事…睇到我差d想嘔! 正如我之前講過, 欣宜的確係瘦o左好多又靚o左好多 (relatively), 但並唔等如真係好靚…同埋最大問題係佢“醜人多八怪”…鬼死咁作狀仲成日懶靚咁, 呢樣先最惡頂呀嘛! 其實世上又有幾多人真係好靚呀, 同埋靚唔靚呢d o野都好主觀…但你唔好咁姿整咁造作咁多小動作嘛, 作作狀狀咁…好可怕…幾靚都無用啦!

一見到佢個造作樣, 就諗起佢年年“兒歌金曲”都孖住呀肥姐唱番首歌, 再嘴兩嘴, 跟住又要攬o下又再搭多句:“oh…I love you mom!”…好含羞答答咁…你話想死唔想死?!

頭先見呀吳唱k俾欣宜姐錫o左一啖, 簡宜想死咁o既樣但又要扮到好enjoy…好可憐…今次真係名副其實考演技! 你試o下整個鄙視樣, 睇o下肥姐會唔會打你一鑊甘?!

又要講多次, 吳唱k作為舞蹈藝員出身, 跳舞真係跳得令人好失望…上次講完呢樣o野, 都得到好多朋友o既回應…原來呢樣o野唔止我一個人覺得, 大家都好有同感!

今次終於見到唐韋琪姐姐同王菀之出現o係同一場合, 讓我知道原來話王菀之同佢好似樣係嚴重侮辱o左佢…o係有比較之下, 發現原來佢靚過王菀之好多倍…而把聲, 亦唔見得差過王小姐喎…只係大家捧得唱歌有100個作狀o既王小姐太高!

而其中一首入選歌“投投藍球”, 係依家o既兒童節目“放學ICU”(無錯, 已經由“閃電傳真機”演變至“至NET小人類”再演變到“放學ICU”喇!)o既主題曲 (係…我係連呢個節目都錄o左頭幾集o黎睇o下係咩頭咩路…我的確係好無聊+好低能o架!)…隻歌係由鄧健泓+5個節目主持: 劉家聰, 張國洪, 蔡淇俊(“四葉草2”o既其中一位男主角), 李泳漢 (李家鼎對孖仔其中一個, 80年代同佢孖生細佬一樣都係炙手可熱o既童星, 依家兩個亦同一命運地成為TVB o既4線藝員, 好可惜…當年我好欣賞佢o地兩個o架! 佢細佬依家都叫做比佢紅少少 <其實當年都係>, 因為有低能白痴楊思琦姐姐呢位女友! 不過佢都曾經紅過兩下, 事關佢曾claim自己同TWINS o既呀嬌有“宿世姻緣”…一度成為“青山醫院”o既代言人!), 同埋李霖恩 (鼎鼎大名保安局局長李少光個仔)主唱! 我覺得呢首歌幾得意, 幾好聽o架喎…唔知k有無得唱o既呢? 同埋“男人魅”大碟點解唔收錄埋呢? 反而收錄o左鄧健泓一隻不知名o既歌…真係無taste!

鄧健泓又可以o係呢個舞台同佢舊情人蓋世寶姐姐重逢…佢兩個都做o左差唔多10年喇…真係保養得幾好!

仲有香港小姐亞軍陸詩韻做司儀都做得唔錯, 而我不嬲都幾欣賞o既english tang個女鄧上文, 亦都表演得幾好…葉翠翠同林莉我就唔多buy喇!! 可惜佢老豆無肥姐咁有地位, 如果唔係, 今年o既表演嘉賓應該唔係大美人欣宜而係佢!