2008年3月29日星期六

3-29(sat) 不死傳奇之黃家駒

又講埋早前o既“不死傳奇”系列先…上次講過, 個人認為呢個特輯拍得最有感染力的單元係danny仔同埋家駒呢兩輯…個人觀感啦!

六輯o既巨星當中, beyond算最係我o地成長年代o既歌星…好記得93年6月尾o係日本傳o黎家駒上電視節目玩遊戲跌o左落個高台重傷o既消息, 隔o左無耐仲傷重不治, 當年f.2考緊final exam o既我同埋d學仔, 真係超級震撼…雖然考緊試, 但人人都會日日捕住電台/電視新聞節目, 留意進一步o既消息!

我雖然唔算係fan屎, 但佢o地d歌, 相信o個個年代o既年青人無咩邊個唔鍾意聽 (即使阿爸阿媽都會聽…因為一首“真的愛妳”令佢o地入o左屋!)…而o個幾年亦正值beyond最紅o既年代…所以呢個消息當時真係好震撼, 太震撼…震撼到根本接受唔到!

其實全個特輯做得最好係佢無再好detailed咁講番家駒點樣死, 因為人人都知道, 亦相信好多人同我一樣, 都必想再細緻地諗番一次…因為實在太慘喇…更慘o既係, 一向最重視音樂o既家駒, 居然o係日本上節目玩遊戲而斷送生命…天意, 往往都係咁弄人!


(不死傳奇:黃家駒 - 海闊天空)

睇呢個節目聽番beyond d歌…真係好好聽, 尤其d勵志歌…我個人最鍾意“不再猶豫”!

睇番佢o地咁多年個演變過程, 由“地下樂隊”形象, 到剪o左d長髮無咁“lau休” , 乾乾淨淨靚仔晒即刻入到屋! 家駒個家姐都講得好o岩, 要多人識先可以講理想, 如果唔係邊個會去聽你推廣o既另類音樂? 要帶動潮流, 又係先要有人識! 之後佢o地再唱o左隻“真的愛你”, 即刻上晒地面, 連好多媽咪級都接受o左佢o地…仲入屋到tvb都會搵阿paul同家強拍青春劇“淘氣雙子星”, 仲要做d文靜怕羞學生哥角色! 我細個都係睇完呢套劇之後, 先去睇番佢o地之前d 表演, 先知道原來佢o地以前有過長髮look…哈!

其實beyond大部份hit 歌, 都係出自家駒手筆, 坦白說, 無o左佢, beyond d歌真係唔多得! 無o左家駒o既beyond, 失去o左靈魂人物…但更可惜o既, 係佢o地三個依家居然搞成咁…我諗係家駒最唔想見到o既! 希望家強同阿paul唔好搞到咁核突啦…你就算意見分歧, 都唔洗俾人知道晒, 仲要o係報章互“dai”…為o左家駒, 可唔可以一人少句呢?! 唔好搞到全世界都知你內閧咁肉酸啦…真係失禮晒beyond個名!

成個訪問, 最遺憾係居然無beyond三子一齊, 人o地草蜢o係梅姐o個集接受訪問都會一齊啦…但係呢集真頭係講beyond, 反而幾個在生o既成員要分開錄…真係好肉酸…點解咁都唔可以妥協o下, 當為o左家駒囉?!

仲有我想講, 世榮唱歌係進步o左好多!

好搞笑…上個禮拜睇亞視“令日法庭”, 居然見到世榮做主角! 佢幾時去o左亞視o架?! 仲要係去拍劇? 呢集好值得推介! 仲有世榮扮會考生的場面…又係不容錯過!



(今日法庭之“畀少家用告上法庭”)