2013年9月23日星期一

9-23(mon) 情逆三世緣

首先補祝大家一個中秋節快樂! 第二年擁有呢個tbb月餅…好like呢!



嘩! 都話歐陽波比同關詠荷係有d運行啦, 收視福將笨非浪得虛名! 雖然套“情逆三世緣”一路d收視都唔太好, 但大結局居然遇正“屎上最強颱風”…個個除咗被嚇到去超市數晒d嘢走之外, 仲籬晒喺屋企唔敢出街…今次結局收視應該掂啦啩!

呢套劇進入結局篇變得幾好睇...其實一開頭都ok, 係去到中段有d悶…到後尾咩袁世三又三世緣嗰度已經幾有趣! 同埋呢d幾個年代角色人物互相呼應劇情我幾like囉! 最後原來鄭子誠居然係黃智雯個仔呢part我估佢唔到! 以結局嚟講算係近年比較好睇o既, 事關通常結局都係yim yim悶悶, bbq或者出動…呢套叫做有d創意! 仲有啲名都改得好好笑, 同埋…主題曲同插曲都好好聽囉!

至於“神鎗狙擊”…未有時間睇, 只係睇咗頭兩集! 海媚keep得好好, 同埋比起上次laughing哥嗰套後生番囉…居然有番廿年前的感覺! 同埋佢同張兆輝再拍檔, 令我諗起n年前我好鍾意睇o既一套冷門劇“雌雄大老千”, 雖然一d都唔hit, 但我好鍾意睇!

今日上嗰套“巨輪”, 係“黃金十年”同“大時代”嗰d friend, 又係由70年代講到依家…回顧吓香港大事咁…呢d係我杯茶喎!

至於10:30嗰個“度身訂造旅行團”…頭幾集度俾嘉欣bb的有d悶…近期呢幾集好睇咗喎!

噢! 依家高清台做緊我當年睇完“再生緣”好like嘅林峯同葉璇的“紫釵奇緣”…得閒我都會[手禁]去睇吓…搞到人好忙囉!



“星夢傳奇”終於去到尾聲…其實呢類歌唱比賽我係鍾意睇o既, 但係個賽制堅有問題! 點會可以無限加入挑戰者? 咁玩到幾時?! 對現役參賽者亦好唔公平囉!

同埋啲挑戰者真係愈見弱雞…思琦姐都已經叫做唱得唔太差o架喇! 何傲兒個家姐何傲芝想點?! 直頭係走晒音都佢夠膽參加歌唱比賽, 好嘢! 即係呢⋯連卡拉之星的level都有啲“mun”…咁佢個妹唱得好過佢好多囉! 同埋, 我好想知佢當年參加咩歌唱比賽可以得獎?!

而阿羅鈞滿對比起佢係唱得ok的, 但都係far from歌唱比賽level…但最大問題係佢覺得自己唱得好好, 但實際郤好一般, 仲要成日揀錯歌自暴其短! 佢嗰隻“自我感覺過份良好”表現, 反而令佢唔多吸引! 咁陳明恩同鄭俊弘自然同討好好多!



呢期仲睇咗幾套戲…“被偷走的那五年”的確唔錯! 前段講女主角失憶一醒番已經離咗婚嗰段極佳, 後段略嫌有d為煽情而煽情…但總括嚟講都唔錯, 如果縮短十五分鐘會更緊湊!

而“狂舞派”我都終於喺將近落畫前睇咗…作為本地小本製作亦十分唔錯! 當然d報導講到咁咁咁好亦令我expectation增高, 所以無我想像中咁好, 但都係值得支持同埋推介!