2006年3月26日星期日

3-26(sun) 時光倒流12年...1993樂壇頒獎禮回顧

因為睇鄭嘉穎, 所以摷o左好多93年o既帶出o黎睇, 包括“93勁歌總選”! 睇番d舊帶, 總係勾起好多回憶...尤其見到d人十幾年後o既轉變, 就更加搞笑!

"93勁歌總選"o既highlight當然係最受歡迎男女歌手獎...當年仲係好興玩o個d無聊遊戲去揭曉賽果, 而呢一年仲係玩得最甘添! 之前o個兩年都係玩d咩賽馬呀, 開鎖匙咁…係無聊, 但都算無傷大雅...今年呢一穫玩得好大...十幾年後大家講番, 仍然歷歷在目!

頒女歌星o個part都尚算可以接受, 只係叫女歌星5強 (包括當年我最喜愛的sammi, 依家仲靚過當年o既玉女獎門人周慧敏, 仲係叫王靖雯o既王菲, 葉蒨文同埋林憶蓮...但關淑怡無份喎)上台抽o下波, 邊個個名o係個波度出現最多次就算贏...係就係無聊同o徙時間到極點, 但起碼唔係太令人尷尬...不過我認為往後反樸歸真咁正正常常頒獎仲好d!

但男歌手o個part就得人驚喇...除o左有克勤每年御用同四大天王戥腳, 但個樣每次都好無耐+無癮之外(不過有得戥總好過無得戥, 起碼都係第5位嘛...同埋之後佢就真係想戥都無得戥...好彩十年後終於守得雲開!); 今年好明顯就係要玩死劉華! 初時玩個21點爆煲遊戲, 營造到好似又係佢拿咁 (賽前一路公佈o既結果都係佢領先), 佢都諗住坐定粒六...點知原來只係個反高潮, 大家諗住一定係華仔, 點知最終turn out係黎明…華仔個表情真係失望+尷尬到一個前所未有o既地步 (佢多年後接受訪問都有講番呢次超唔掂o既經驗), 好慘...嘩! 佢個"得而復失"o既失望樣, 真係幾好演技都呃唔到人!



呢d咁o既遊戲...玩o既難堪, 睇o既亦唔見得高興, 只係戥佢o地好難受...咁又何必呢?!

仲要之後宣佈"金曲金獎"又玩多次, 叫五強出o黎唱自己隻歌, 如果被sharp cut即係out左, 嘩! 華仔個樣又係緊張到呀...到佢俾人out時個尷尬笑容真係令人難受! 仲要剩番o既兩強居然有黎明份都無佢份...佢個死敵一晚贏佢兩次...睇得出佢超sad!

Image hosting by Photobucket
(原來o係總選之前一日仲錄o左個總選前奏...基本上每年總選前o個集勁歌金曲都會叫晒d歌星上o黎大晒冷! 但估唔到呢一年d歌星俾面到呢個地步...男女歌手五強再加多n個紅歌星...你又睇唔睇到係邊個打邊個呢? o個時勁歌金曲好熱鬧, d環節都幾好睇, 又多o野玩, d歌星仲會爭獎品添! 同場加映我偶像sammi以久違了o既金毛強形像唱佢隻“典檔”…正!!!)

唔知大家仲記唔記得...1993年係比較特別o既一年, 因為o個年樂壇兩大巨星家駒同埋陳百強相繼逝世 (10年後o既2003年就更震撼啦...因為我o地失去o左八十年代o既兩位天王巨巨巨巨星...都話"3"字尾o既年份係邪o架喇!), 所以每個頒獎禮都會有salute to佢o地o既一part, 睇到人好心o翕! 而負責頒獎o既就正係阿梅…10年後都走埋…! 又

佢o地d經典歌"一生何求", "深愛著你", "光輝歲月", 仲有聽到人最想喊o既“海闊天空”...真係好好聽, 好經典呀!

仲有, 睇睇o下記起93年有一個特色...就係好興黑色褲/長裙加件又長又闊白恤衫再加件又細又窄o既黑色背心o係外面…我睇o左幾個show都分別有男/女咁著…仲要我記得當年學校tq都有好多人咁著上台…而最印象深刻當然係著住呢副武裝唱“大報復”o既sammi啦! 同埋當年一完場d fans以超大扎花o既"花海"去攻陷整個台o既情景, 點解依家唔見晒?!

當年仲有sammi同安仔著格仔情侶裝 (佢o地話係夾定o既) 拿最受歡迎合唱歌曲金獎…咁呢隻歌係hit o既…我唔信有人會唔識唱囉! 點知依家佢o地就…哎! 真係其實你心裡有沒有我喇…?!

Image hosting by Photobucket
(oh...執拾時搵到一jar季選/總選投票表格...梗係要影低作紀念啦!)

哈哈...仲有好搞笑o既熱力"節拍Woobomba"! d人跳舞真係好好笑! 見到今年相繼走番出o黎o既"因為要賺奶粉錢而復出"o既關淑怡, 同埋"睇完佢o地個演唱會十個激讚"o既草蜢 (尋日同d同學仔唱卡拉ok, 最興奮o個part居然係大跳大唱番草蜢“我們的演唱會”金曲…我o地個年代o既小朋友, 無論你係咪草蜢fans, 都無可能會唔識唱佢o地d歌, 呢個係一個情意結, 一個集體回憶…同埋佢o地個演唱會, 真係我呢十年來睇過最好睇o既演唱會!)...佢o地四個跳得好好, 但另外o個兩位好明顯係戥腳o既...個劉小慧真係除o左樣靚之外就一無是處, 阿湯寶如小姐就直頭可以話係一無是處添 (因為靚o個part都欠奉)…除o左靚過同期o既唐韋琪姐姐少少之外 (佢o地初出道我真係覺得佢兩個有d似o架)! 佢兩位姐仔真係跳到好似踩“甲由”咁, 仲要以佢o地咁o既力水, 應該一隻都踩唔死!

軟硬就真係一個時代o既icon, o個期隻"廣播道fans殺人事件"同"點解要大家笠"...依家我仲不時會拿o黎聽...當年又有邊個會無試過跟住唱呀?! 唔好唔認呀你...!

仲有見到黎瑞恩唯一一次得獎...作為一個新人, 又係威o既! 佢隻"一人有一孖臘腸"又確係hit...同往後李樂詩憑"終有一天感動你"得過唯一一次金曲有得揮...都係o個句: 曾經擁有都總好過無呀...起碼寫"威水史"o個一欄可以寫多一項! 其實小恩子唱功又真係好ok, 仲記得我去英國時第一日settle down就拿o左佢個告別演唱會vcd出o黎睇…在外o既人係特別掛念香港o架喇!

oh仲有城城大唱大跳"狂野之城"...又的確係跳得好睇, 當年tq又有係好多人跳呢隻舞o架! 人o地又係舞蹈藝員出身, 你又係舞蹈藝員出身…吳唱k你係咪玩o野?! 我真係唔知你憑咩做dancer?!

睇番d舊頒獎禮, 的確係好回味, 又的確係好睇過依家o個d好多, 即使我係對o個個年代有情意結…客觀地講, 都真係”新不如舊”! 我o地呢d咁懷舊o既老餅, 就"最有資格"去回顧呢d陳年頒獎禮喇...你又有咩回憶呢?!