2008年2月2日星期六

2-2(sat) Q表姐

亞視晨早5:30又重播“Q表姐”…已經係第n次…其實呢套戲我當年都力追過, 仲要幾乎次次重播我都有睇…至少睇o左4次, 但每次睇都覺得幾好睇…可能因為佢根本就係無咩劇情o個隻, 所以你唔會覺得睇o左好多次重覆又重覆! 最鍾意呢d低低能能無咩劇情o既輕鬆小品, 睇多幾次都唔覺悶! 同埋佢都好有麗的青春劇o個種cutie feel, 有d似當年的“IQ成熟時” (少少啦), 次次個校長都係咁…好騎呢o既學校, 好麗的青春劇style!

其實套劇又唔講得上太陳年o既, 但係唔經唔覺都有成18年歷史…主角何美婷相信都已經變o左個中年婦人, 而另一個主角童星戴夢夢, 已經搖身一變做o左青春歌手 (仲要已經好多人青春過佢)! 18年…可以改變好多! 唯一不變o既係: 亞視仍然係弱台! 真係可憐!

套劇得15集, 好記得當年係暑假7點鐘倒播, 我仲要每晚力追! 基本上係無無聊聊講o下d家庭瑣事, 但又幾溫馨同埋幾多笑料…主要係講爸爸媽媽劉志榮同佢個真老婆梁淑莊出o左埠, 放低o左兩個女王艷娜同戴夢夢俾Q表姐何美婷湊, 仲有個惡表姐O表姐何美美 (又係親姊妹o係劇中扮番姊妹…亞視d劇真係好寫實! 我個friend聽到又Q表姐又O表姐話好騎呢…問仲有無P表姐?!)…搞到笑料百出o個隻! 不過佢o地段表姐妹情都刻畫得唔錯! o個時成日覺得有個咁o既表姐都幾好! 唔知佢o地o個句口頭襌:“表起你”當年有無hit過呢?!

何美婷就唔係十分靚, 仲有少少肥添…但唔知點解幾討好, 感覺幾sweet囉! 佢都係當年亞視特登挖角過去做女主角o架! 健美小姐o黎講佢都算有有d斤兩, 有一集歐錦棠要抱起佢都幾辛苦o下! Oh, 唔知依家何美婷變成咩樣呢? 依家叫番佢出o黎同戴夢夢做戲又唔知會點? 唔知夢夢d fans會唔會特登去睇番佢呢個劇呢?!

話時話, 夢夢細個真係好得意, 好可愛, 幾靚女…依家平凡o左好多…其實唔係話醜o既, 只可以話係好普通囉! 睇番佢以前真係人見人愛, 同埋以前把聲沙d得意d! 抵翁虹都認佢做契女! o個時好鍾意睇呢個劇其中一個原因都係鍾意睇佢, 就算依家再睇番以前o既佢依然係咁可愛!



睇番資料, 原來佢係1990 年亞洲電視"小偶像競選大賽" 冠軍…其實我記得當年我都有larp過呢個節目…亞視當年又真係好多呢d “另類選舉”, 又“小偶像”, 又“美少女”咁!

1990年只有5歲半的小妹妹,在臺上又唱又跳,她那天真無邪、甜美的笑容深深打動評判團,排衆而出,戴夢夢(Renee)就成爲了亞洲電視「小偶像競選大賽」的冠軍,她開心地在後臺跳呀跳,有如一粒小彈豆。日子瞬眼間就過,她在2001年參加新秀大賽,青春可人的Renee一下子又成爲傳媒焦點,然而,大熱倒灶卻發生在她身上,她哭了,靜靜地坐在後臺一角。直到今天,有CD派到各大電臺播放,美少女夢境成真,當然開心。

夢夢可以說是90年尾的小童星,拿了冠軍的她就簽下合約,她記得:「我拍過《Q表姐》、《第3間電臺》、《香港奇案之八大毒梟》……《飄零燕》等等,噢!還有在2001年間拍了的《完全學生手冊》,03年《親親孩子親親書》,還有《當四葉草碰上劍尖時》呀……」如數家珍,Renee何止有拍劇集的經驗,近日許多旅遊特輯都見到她的芳蹤。至於曾失意在歌唱比賽的那一刻,她就說:「那都是給我一個學習機會,當時是一下子要回答大堆問題,我真的不知所措。」

曾以童星身份演出的電視劇:

1996 飄零燕
1996 再見豔陽天
1995 精武門
1991 觸電情緣
1991 香港奇案之烹夫
1991 香港奇案之八大毒梟
1990 Q表姐
1990 第三間電台



仲有, 做佢家姐o既王艷娜睇睇o下同佢都有d似樣, 幾似兩姐妹…依家o既戴夢夢, 仲有d似當時o既王艷娜添…哈哈! 而王艷娜o個班同學仔王薇, 梁碧芝, 許蓓蓓, 好多個都係o翕得出名o個隻…可能因為之後好年仲有o係亞視做! 見番王薇做學生都幾搞笑, 不嬲見開佢做情婦o架嘛! 雖然幾乎個個都帶有鄉音, 但係全部都幾靚女…有個仲有d似蔡依琳!


(主題曲都好好聽…好夏日, 係甄楚倩o既"一個懶洋洋的下午"…仲有每日做之前o既片頭, 都有夢夢以佢把沙沙o地好cutie o既聲講o下o個日o既重點內容…都幾有趣!)

呢套劇亦擺明想推當時o既青春小生歐錦棠上位…佢個年青有為老師角色都幾討好o下! o個時佢都幾斯文靚仔, 個樣就唔算變化好大, 係d頭髮變得最勁囉…不過男人一到中年變地中海到好平常…又係賀歲月催人, 變o左個呀叔! 以前成日覺得佢同萬斯敏唔係好襯, 依家反而襯o左好多!

但無啦啦又要俾機會佢扮李小龍打人, 又搞咩“張國榮模仿大賽”…但其實唔知佢有邊忽似?! 之後無啦又o係酒廊唱“由零開始” 俾Q表姐聽…都幾騎呢o下! Oh, 仲有當時叫苑麗瓊o既苑瓊丹, 都好搞笑!

不過最騎呢都係臨尾o個幾集勁無聊得o黎仲有d搵戲o黎做…無啦啦加插一段當時o既“時事”陳慧嫻退出歌壇…由關詠荷個角色去扮佢! 但真係同成套戲格格不入…無啦啦玩影射, 好唔啦間! 仲要唱埋“千千闕歌”跟住班fans好唔捨得佢o個幕…真係唔知抄呢幕o黎做咩…畫蛇添足! 不過我想講係關詠荷當年真係好靚 (咁依家都唔差, 係早幾年有一排顯著地跌watt!)…同埋o係亞視o黎講, 佢又真係高其他花旦好多班!

******************************************

另外, 當然要講一講近期的全城最熱話題…暫時牽涉edison+gill+bobo+柏芝o既疑似藝人裸照風波啦!

本來上個禮拜初初爆出時, 真係完全無興趣去睇, 只係循例睇o左被報紙剪裁過o個d…點知後來搞到咁激! 初初我以為又係o個d合成照, 直至不停有人問我點睇, 我先真係去睇o下! 嘩, 睇晒之後, 都不得不相信應該有九成真…連環圖咁, 好難合成喎! 不過呢d相真係over晒…點解會有人鍾意/願意影埋d咁o既相? 仲要係藝人喎, 你話係普通人無人識都已經傻o架啦…仲要係藝人, 點會咁o架?! 你影得都應該會諗過有一日真係會咁唔好彩流出市面…上次A小姐手機短片單o野都應該係一個好大o既警剔 (不過呢d相/短片應該攝於A小姐單o野前)…哎…咁樣真係…以後點見人呀?!

一路辛苦建立o既清純形象無晒…平時d人傳咩係一回事, 但親眼睇到又係另一回事嘛…今次mani都真係頭痕! 另外o個位一心諗住“洗底”嫁入豪門, 點知臨門一腳撻Q…又係慘o既! 呢班女仔又係好鬼可憐…以後真係唔知點算?! 咁當然, 佢o地都要對自己做過o既事負責任! 發佈呢d相o既人當然係唔o岩, 呢樣根本唔雖然討論…不過影呢d相o既藝人都要負上部份責任…你可以話做私人collection, 但亦都真係要預o左會俾人偷/唔見o左, 尤其你係知名人士…做任何事都要諗清楚後果…呢件事正好警剔o下d年青人!

警方為求殺一儆百, 求其拉個貼o左一張相o既人, 仲要唔俾佢保釋還押八個禮拜, 同強姦犯o既待遇差唔多…咪盞俾人話雙重標準! 哎, 睇o黎呢單轟動整個娛樂圈, 甚至整個香港o既事件都有排搞…新年d雜誌封面再唔係霆鋒一家人拜年照片, 而係愛迪生同abcdefg小姐o既十級相!