6-2(fri) 松松姐姐

上個禮拜“娛樂直播”有兩晚林敏聰o既訪問, 真係幾好笑o下! 佢確實係鬼才, 講o野無句真得o黎又唔係話完全大話西遊喎, 仲幾抵死, 幾搞笑…前輩果然係前輩, 真係唔同級數!

前幾集仲有松松姐姐訪問…佢依家個look同埋講o野語氣都好怪o下, 同埋佢個家庭背景好似真係幾複雜…又話近年忽然撞番佢妹妹, 大家廿年無見, 仲有佢媽媽…咁當年佢初出道時話同家人唔o岩, 又係咪呢d家人呢?! 同埋點解可以失散廿年? 佢係明星o黎o架嘛, 要搵番佢有幾難?! 究竟佢屋企發生咩事呢?!

(ok, 我搵到一篇關於松松姐姐o既報導…原來佢當年因為事業同學業同屋企人鬧意見而離家出走, 廿年無聯絡喎…佢都真係好型! 似乎並唔係我o地想像咁“單純”喎!)

陳松伶離家20年街頭重遇 冰釋前嫌豪宅贈老母

巴士阿叔&co.呢期真係好紅…睇任何報紙, 甚至係電視新聞都會見到o個三位“巴士之友”…咩訪問都上得就上…好明顯博宣傳, 但慘得過大家 (包括我本人) 鍾意睇, day day係咁追, 仲紅過當年o既四大天王! 連youtube都成為熱門網站…真係神奇!

從中亦可以得知香港人幾咁無聊, 又或者真係太大壓力同埋太多o野未解決, 所以連呢d“茶杯裡的風波”都可以放到咁大, 真係聞所未聞…我諗d外國傳媒咁大肆報導, 都係因為覺得香港人太趣緻! 無線洗咩o徙咁多錢去開拍d大製作呀? 播o下呢d富有香港特色o既“笑笑小電影”, 成本低但收視奇佳囉!

尋日睇報紙個slj (死o靚仔) “攝影師”仲走出o黎解釋, 話因為見阿叔同四眼仔兩個哎得咁勁, 驚佢o地打起上o黎, 所以影低佢…呢d咩“籮直”o黎o架?! 如果打o係上o黎你影低佢有咩用?! 用o黎做呈堂證供呀? 你多事就多事, 八卦就八卦啦…認o左佢咪算囉, 愈解釋就愈核突!

當中最dee-till可算係呢段有線新聞喇…將網上所有remix版本都介紹o下, 仲要搵埋人分析埋…都幾抵死!



而呢個“林尚義+李克勤版”都幾搞笑…巴士阿叔把聲真係好似我們的阿叔林尚義囉!



好喇, post埋今日咩都夠, 否則我相信大家都會有an overdose of“巴士阿叔”…以後都唔敢搭巴士囉!