7-25(tues) 書展又o黎喇!

上個禮拜又抽空去o左一年一度o既書展, 正如我o係上年o個篇:
2005書展之忽發奇想所講, 我本身係一個完全無文化o既人, 由細到大咩書都唔會睇 (除o左報紙雜誌)…成日有問我點可以學好中英文, 我都真係十分汗顏…無理由叫人o地睇tvb周刊o架嘛?! 但我本人覺得學到最多o野o既途徑, 又的確係報紙雜誌 (仲要mainly係娛樂版, 雖然基本上我版版都會睇o既) 同埋電視 (呢個渠道十個讚!)…每人有佢唔同o既方法o者, 我相信咁樣唔會教壞d年輕讀者嘛?!



今年去書展, 又係因為年年去開變成習慣, 當係唱k/睇戲以外其中一個活動, 仲要唔洗錢入場喎…湊o下熱鬧都好! 人依然的多, 但我禮拜四晚去已經唔算最多o個日…禮拜六凌晨去o既朋友, 我真係要寫個“服”字俾你…逼都逼死啦, 莫講話拿到本書o黎睇! 如果要咁逼法, 我寧願唔去! 但我o係唔算太多人o既情況之下, 都依然唔多逼到入去每個攤檔 (又或者係唔bother去逼…人老o左係咁o架喇! 同埋反正我又唔係買, 只會拿起o黎望o下…遲d去書局都會有o架啦!)…今年仲要只係行o左一個hall, 可見我對書展幾咁有“passion”!

依家又無晒我上年提到o既“華星檔攤”, “tvb檔攤”又或者係 “100分檔攤”…只係淨番“明報”個攤, 又只係得每年例行o既“明周開倉”, 唔係話唔好睇, 只係我幾年前買o左一本到依家都未睇晒…而再早幾年胡亂買落o既什麼“真情”小說 (因為o個期好鍾意睇“笑聲笑聲滿載溫馨…”), 更力係咁多年來掂都未掂過!



今年比較吸引 (至少吸引到我拿起o黎睇o左一陣) o既依然係mani o個本什麼“英皇偶像軼事”, 同埋我“偶像”葉璇(ok噓我啦…我承認佢呢期o既形象連我都有d頂唔順) o個本個名超“正”o既“上善若水璇攻略”:

“葉璇以自傳形式寫下新書，由童年成長到選美過程，入行後所經歷的辛酸史，而此書的賣點是找來契爺鄭裕彤力撐題書名和寫序，葉璇更親自剖白感情世界，談及她的緋聞男友，包括陳浩民、奧運金牌得主熊倪及殼王陳國強等。

今次彤叔在契女葉璇的處女作題名為《上善若水璇攻略》，並寫序贈八個字「才情並茂 字字珠璣」，昨日彤叔雀躍地說：「個名係咪好好呢？係佛偈！佢讀番書都寫得一手好中文，所以起個富中國味書名畀佢。」



葉璇在新書《上善若水璇攻略》的愛情篇中說了她的第二位男朋友是個演員，雖然沒有指名道姓，但據圖片配合，所說的應是陳浩民。 [芒按: 用舊情人o黎做賣點, 好似唔係咁好囉!]

她在書中描述：「我跟這個男孩一共拍了3部戲總共歷時兩年時間之后才開始談戀愛，這也令人難以置信，問題是我身邊的每一個人都認為他不是理想對象。」另外，她又講及目前男朋友叫小白，但她通常叫他「哥哥」，還大讚對方說：「我的小白是那種溫文爾雅不愛說話的男孩。」”



哎! 舊年我講過 “我要訂下目標…o係下年書展時要出到本俾佢更精彩更詳盡o既“港劇迷”書…發夢都無咁早呀嘛…我知啦!!!!!” …

…一年過去, 我無坐言起行不特止仲廢o左好多…果然係“發夢都無咁早”…我o既夢想真係離我愈o黎愈遠! 其實聽聞出一本書大約係需要幾萬蚊, 要出本薄chit chit o個d仲要一萬蚊搞掂…咁又真係唔算貴喎! 一萬蚊買個心願, 其實都值得呀…就算五十本都賣唔出 (我諗我至少都有幾十個朋友, 應該都可以用友情換取一百本銷量o卦?), 蝕到入肉去買個心願…都抵呀!

好! 我要再 (留意係“再!!!”) 向自己許下承諾, 下年書展要出到一本書…呵呵呵呵呵呵呵呵呵呵呵呵呵呵呵呵!!!!! (放長雙眼睇, 下年可能我又copy番今年o個段o野) 無人買o既話, 最多我自己用o黎墊住“目訓”囉!