11-15(wed) 2006翡翠歌星賀台慶前傳…

講開台慶, 其實一直都未有機會講o下上個再上個禮拜六o既“翡翠歌星賀台慶”…個節目本身無咩特別, 特別就特別在o係節目之前所發生o既事!

話說o個日早上芒姐無情情入o左去電視城, 主旨當然唔係去睇“翡翠歌星賀台慶”啦…其實本來就唔想去o架喇, 難得o個日放假又要人早起身, 仲要本身我都唔係好舒服, 山長水遠咁入去做一d無結果o既o野…但係念在我一路都未去過新建成o既將軍澳電視城, 同埋諗起o個日正是“翡翠歌星賀台慶”o既大日子…可能會見到好多歌星, 咁就免為其難去一次啦!


(由五樓停車場望落去o既景觀)

入電視城你又不能話佢需時好耐,但係絕對係無雷公咁遠, 都幾“山卡啦”o下, 好彩o個日風和日麗, 入到將軍澳都有d郊遊o既感覺…如果唔係有專車, 都唔知可以點去?! 同埋如果你o係o個度返工都真係幾慘, 想得閒出o黎同朋友食餐飯都幾難, 局住o係入面又yim悶…唔通搵吳唱k陪你食飯咩?! 佢睬你都傻啦! 同埋睇明星呢d o野, 你睇多兩日都厭啦, 仲要對住佢o地分分鐘咩真面目都見晒, 一日黑口黑面咁對住你 (我相信大部份都會係咁), 本來係你偶像可能你都憎埋佢! 真係咩“fantasy”都無晒!

講番o個日o既事, 好明顯本人“醉翁之意不在酒”…所以做完o個件例行工事之後, 就開始放肆喇! 因為“保安超嚴密”o既關係, 我初時都只係敢頭o係building與building中間行o下, [目及]o下佢d道具, 佈景等…仲要係頭dup dup鬼鬼祟崇o個隻…但係後來發現原來係無人會理你o既時候, 就愈行愈大膽! 首先係走o左入佢o個條成日扮係醫院走廊o既行人通道…一行入去就見到著住古裝o既月亮姐姐向海嵐, 原來o個度係其中一個化妝間!



之後仲見到一身便裝笑口sai sai咁行過o既輕輕鬆鬆鄧梓峰…當年幫佢作呢句slogan o既朋友真係好有慧根, 佢果然係我o係電視城裡面見到咁多人之中最輕輕鬆鬆o個個! 跟住又見到都幾輕鬆o既香港先生rocky…佢真人又真係無上鏡咁大隻喎! 原來真係個個上鏡都會肥o左一個碼…好似前幾日o係中環撞到周慧敏, 真人瘦到咩咁, 一d都唔靚囉! 我諗其實所有明星如果上鏡係屬於fit o個d, 真人都會幾恐怖o下…唔敢想像阿sa真人會係點?! 可能反而廖碧兒呢d上鏡幾大份o既, 真人應該幾ok囉 (上年又係o係中環撞見佢, 又唔覺得佢瘦, 同上鏡無咩大分別…但絕對係靚囉!)…

再之後就係一系列不知名演員, 包括有保安局局長李少光個仔李霖恩…明明上次睇報導已經話佢對娛樂圈心灰意冷退出o左娛樂圈, 點解依家又o係番度? 佢係咪仲係主持“放學icu”呢? 其他見到o個d真係連我都o翕唔出名喇!



跟住就更加變本加厲喇…本來行到去tvb個39周年大logo o個度都只係敢眼望望, 因為見有好多歌星o係o個度傾緊偈, 我咁周圍玩驚俾人捉o架嘛…但係我個人又係鍾意搞搞震, 鍾意冒險o個隻…所以最終都係忍唔住行o左過去…

o係個logo下面個門口入去就係一廠, 亦即係“翡翠歌星賀台慶”舉行o既場地, 所以有好多歌星結集o左o係o個度吹水同埋煲煙! 我一行過去咁o岩見到eason同soler傾緊偈, 仲有[火羅]安o岩o岩到, 又見到瘦到好似一條柴咁o既李彩華自己o係度煲電話粥!

跟住就行到邊都見到eo2再加一jar唔知咩人…佢o地係好大搖大擺好鍾意引人注意o個隻! 仲有見到衛詩, 跟住又有陳小春…

但係因為一廠門口有保安, 所以我唔敢太放肆地“鼠”埋入去睇啦…如果我著便服都無咩所謂, 可惜我係著住套suit, 怪形怪相咁…! 真係好後悔無帶套衫o黎換…不過我又無諗過可以俾我咁放肆o既…



雖然入唔到一廠, 但既然去到, 梗係o係出面聽o下啦…一去到就聽到有幾個男聲唱梗“七級半地震…”, 跟住又聽到有人唱“忘情水”, 初時以為係劉華啦, 點知聽真d原來係黎明…嘩! 天王都要兩點幾o黎到rehearsal…老黎都算俾面!

跟住行開o左去第二度玩一陣…去到廁所, 忽然聽到好大聲開咪廣播…我仲以為係話:“電視城發現有賊仔…快d去捉佢!”…點知原來係話:“所有歌星三點鐘集齊一廠full dress rehearsal”…嚇得我! 嘩! 原來咁早就總綵排…咁都真係搞足成日o架喎! 仲有, 個廁所係有tvb周刊任你睇o架囉!

跟住又八卦行返一廠睇o下啦…聽到已經係大合唱緊“朋友”喇…仲一唱唱兩次! 最頂癮係連ending紅組贏o個part都練埋呀嘛! 我知呢d一定係一早內定晒, 但係可唔可以唔好連呢part都練埋呀? 聽到阿do姐又話:“oh! 我o地女子組上年贏o左, 今年俾你o地男子組威番次囉…”, 跟住華仔仲要類似話:“oh…呢支旗真係得來不易!”咁都練埋…真係一d都唔好玩囉!

阿白組隊長容祖兒事後仲要話勁失望…一早知道晒賽果o架啦, 可唔可以唔好扮失望呀? 不過又咁…佢唔扮失望又真係唔知講咩好o既, 畢竟做戲都要做全套o既!

但如果真係內定得咁交關, 舊年點解要俾白組贏呢? 今年就話因為舊年女仔贏o左, 係人都知男仔一定贏番一次啦…但舊年係第一屆, 又好明顯係男仔表演得好好多, 反而要俾女仔贏, 大家都鬧o左好耐…呀! 可能就係因為咁…想搞o下gimmick, 等大家有d talking point!



練o左兩次“繁星流動…”同埋ending之後, d人就散喇…跟住唔知點解又o黎過甄妮姐姐o既“七級半地震”etc…後來連門都開埋, 咪偷影o左入去囉…哈哈!

影完都差唔多要走, 行過一大jar藝員locker, 又係劇集成日影o既景點, 咁當然又要影番張相…可惜唔知邊個打邊個啦?! 見到好多locker都貼滿o左某d劇集或節目o既宣傳貼紙…不過都係估唔到邊個打邊個!



最遺憾就係搵極都搵唔到個canteen…我o個日仲鬼死咁肚餓o架嘛…實在太可惜喇!