2006年3月8日星期三

3-8(wed) 難兄難弟之…97回憶

因為“難兄難弟”熱潮, 摷o左97年勁歌第三季季選o既錄影帶出o黎睇…當年呢隻電視主題曲, 破天荒入o左季選!

無線當然力谷呢隻自己人碟加自己人歌…本身已經hit喇, 再加多幾錢肉緊, 上勁歌, 入季選, 張可頤同宣萱仲做埋o個年“星光熠熠耀保良”主持!

我仲記當日佢o地四個主角上勁歌, 我當然好緊張咁錄起佢, 點知個錄影機又係壞壞o地, 明明彩色, 佢居然錄到黑白…好激氣! 不過後尾諗諗o下都算啦, 就當佢錯有錯著, 配合番d粵語長片色彩…我就係咁阿Q!

之後就o黎一jar張可頤+宣萱不和新聞…佢o地當時真係好似好不和, 事隔多年又好似話係就係唔friend, 但當年係一場誤會! 不過本來同宣萱企埋同一陣線o個d陳芷菁/劉曉彤全部都同佢反晒目喇…證明唔只張可頤個人有問題, 宣萱都唔弱!

當年睇完“難兄難弟”, 我都幾buy張可頤 (其實睇早一檔又係佢同羅嘉良合作o既“迷離檔案”已經幾buy佢), 不過點都唔夠阿星同學咁die hard o既! 佢個寶珠造型直頭殺晒, 宣萱又真係無得揮! 再睇埋last兩集佢扮老版寶珠個造型同埋d語氣, 真係不得不激讚多次! 估唔到佢模仿90年代o既寶珠都咁似…兩個年紀唔同語氣都捉得咁準, 抵呀寶珠姐本人都忍唔住話似!

仲有吳鎮宇o既老四哥…d笑聲同埋頭側側小動作再誇o左d, 笑死我…又係掂! 唔睇番呢兩集結局篇都唔記得, 當年我都係睇最尾呢集覺得好感動…睇番佢o地個個粵語片明星老o左之後o既遭遇, 真係好感慨, 再配埋成隻碟唯一一隻叫做認真o既歌“誰更重要”…好touch-情…相信我o地阿媽o個代更會有共鳴, 因為佢o地真係睇呢班人大! 如果到我o地四五十歲有套咁o既戲拍番八九十年代d明星o既事蹟, 一樣會好有共鳴! 好似上年亞視套“美麗傳說2之星願”咁!

Image hosting by Photobucket

97確係好年代, 尤其暑假d歌永遠都係最掂…因為係唱片公司力谷季節! 除o左“難兄難弟”, 仲有好多好歌入選…好似古巨基o既“歡樂今宵”, 梁漢文o既“好朋友”, 同埋楊千fa都第一次有歌入季選, 係我最喜愛的“再見二丁目”…就係因為呢隻“二打六”, 我先開始好留意佢! 有重大發現…就係其實佢當時係唱得仲好過依家, 唱功有倒退之嫌!

同埋d人當時真係好後生囉! 李珊珊同祥仔做主持, 李山山又係一個懶音怪, 仲要口窒窒…依家雖然仲係唔多掂, 但都進步o左好多…同埋無以前咁一舊飯!

Image hosting by Photobucket

一套“難兄難弟”的確係令人勾起好多回憶! 首播時正值回歸, 成個97年都好興d懶trendy o既中國衫…好記得o個期放暑假前o既summer dance, 人人都去金百利買番件!

仲有回歸後o既連場大雨 (當時話係個天都為肥彭同佢三個靚女離開香港而痛哭), 搞到學校好多post-exam activities都取消o左…本來有個三日兩夜o既camp, 亦因為大雨減o左一日! 但我最記得係之前o個晚我由7點幾睇緊“難兄難弟”到10點幾睇緊“獎門人”, 屋企個電話都不停地響…係d lower forms打o黎問我個camp會唔會取消?! 其實都唔到我話事…但我就全晚keep住接電話同打電話…搞到我無得好認真咁睇o個集記得係幾精彩o既“獎門人”!

又適逢o個期o岩o岩好興上網, 去到書展, 第一次o係tvb o既攤位有得上tvb.com, 覺得係好偉大o既一件事…打完個url居然可以不停click有o野睇, 覺得internet簡直係無奇不有…我仲特登click入勁歌網頁去睇番“難兄難弟”o個集…今次終於係彩色版! 不過相信依家無可能可以睇番九年前o既內容啦?! o個時仲成日去勁歌網頁download d歌以email send俾d friend, 覺得自己好勁咁…哎! 估唔到不經不覺就快十年喇!