2008年4月18日星期五

4-18(fri) 波…係圓o既…

呢個禮拜好忙好忙, 忙到已經好幾個禮拜無咩點睇電視劇…原來今晚就係“古靈精探”大結局, 我仲只係睇到頭幾集咋! 仲話今晚會有兩個結局揀一個, 又有歐陽波比的“賭場風雲”齊歡暢出o黎crossover…都幾搞鬼呀! 得閒要追番晒咁多集先!

雖然好忙, 再加上條脷勁痛…我諗係唔夠瞓+食得熱氣o野多+壓力大心火盛影響, 條脷痛到好似就快斷咁…但係尋晚睇到伍晃榮叔叔逝世單新聞, 都忍唔住要上youtube search o下佢d片段去懷念o下佢!


(伍晃榮逝世消息@TVBN)

正如大家所講, 伍晃榮雖然唔係咩巨星, 但相信無一個香港人會唔識佢…入屋程度分分鐘比起任何一個巨星更甚! 廿幾年o黎大家每晚都會聽到佢把聲, 生動生鬼o既體育新聞評述…平時體育新聞係最悶o既一環, 但一由佢講就唔同晒! 佢就好似大家身邊o既朋友一樣, 所以呢個消息o係香港o黎講都幾震撼o下, 至少尋晚至今日個個都會提o下! 同埋真係幾突然…因為上年tvb40周年台慶個特備節目“新聞話事‧人” 先係由佢主持…o個時見佢完全無事o架嘛…所以話人生真係無常!

“新聞話事‧人”本身個節目已經好好睇, 再加上由佢o黎主持更加係晝龍點晴…令到呢個節目d訪問同埋回顧環節更精彩!


(2003 - 伍晃榮攪笑報道綿羊大賽)

我敢話佢真係前無古人, 後無來者…無新聞報導員可以做到佢咁, 報體育新聞可以做到咁自成一格, 一聽就知係佢…令到唔睇體育新聞o既人都會因為佢而望兩望! 同埋我再次聽番佢報導體育新聞先發現, 原來佢最煞食除o左生鬼有趣o既對白同埋自創o既口頭禪之外, 係因為佢講o野其實好有節奏感, 所以聽起上o黎好動聽, 好吸引!


(伍晃榮精彩講波)

我覺得無綫真係應該快d整個悼念伍晃榮o既節目, 等大家可以重溫番伍生咁多年o黎o既精彩片段…畢竟佢真係陪伴無數香港人成長…見佢仲多過見d自己d親朋戚友!

我會永遠都懷念呢句: “無綫電視記者伍晃榮報導”…雖然以後都唔會聽得到!