3-26(wed) 古靈精探
放假睇o左幾集“古靈精探”…都ok呀, 至少吸引過“最美麗的第七天”好多! 呢套“美七”係近年令我好失望o既其中一套劇…可能真係希望愈大, 失望愈大啦! 期待o左佢兩年, 點知turn out個劇情係咁…搵戲o黎做! 睇完我都唔覺得真係話有深度又細膩過“天幕下的戀人”好多…只係賣弄慘情!
呢種“天國的雞批”式慘情韓劇feel, 用於港劇其實唔太work…我d朋友話頂唔順佢d朦鏡, 睇到眼都花埋…呢樣我又ok o既…其實佢都算拍得幾靚o架喇! 但係劇情真係無需要太慘…唔係咁先會感人o架嘛, 我反而覺得弄巧反拙! 係…現實生活中的慘人慘事多的是, 但係唔洗睇電視劇輕鬆o下都搞到咁sad…又aids, 又n種cancer, 最後個主角仲要死埋…真係未免睇得人好辛苦! 但係睇o左開頭又無理由唔睇埋落去…所以後尾反而主要係睇mk wong同唐詩詠o個段“飛甩雞毛”…起碼有時都有得笑o下, 同埋佢o地o個段好似仲sweet d!
唔知點解鄭嘉穎同周麗淇合作三次, 有兩次niki都要不得好死…o岩o岩重播完o既翡翠戀曲又係咁, 今次又係咁…仲要兩次都搵夏萍出o黎講o下“和合二仙”…唔知阿王心慰監製係咪對“和合二仙”有個情意結呢?
講番新o個套“古靈精探”, 又唔係話特別好睇, 但係輕輕鬆鬆鄧梓峰一向都有捧場客…起碼容易消化嘛! 同埋郭晉安又真係觀眾緣爆燈o既…未必係有好多瘋狂粉絲o個隻, 但係一定無咩人唔鍾意佢囉…情況同關詠荷一樣! 所以關詠荷o係“同事三分親”同vincent o個段惜位嘴戲, 雖然突兀非常…第二個一定俾人話, 但係佢就唔會, 證明佢又係觀眾緣爆燈! 其實如果佢真係唔肯拍親熱戲, 咁擁抱交待咪算囉…好過o係呢個年代仲玩吳君麗式粵語長片借位親熱…有d搞笑!
查o下案, 猜o下謎…簡簡單單笑o下都幾好! 同埋郭晉安係旺無得講o架喇! 佢又真係得天獨厚o既…廿年o黎都係同一個樣…呢個世界真係唔公平…哈! 由我o地小學第一次睇佢做“城市故事”開始, 個樣幾乎無老過…同埋都算幾靚仔, 超級討好o個隻! (佢最唔得o個排, 算係95年去o左唱歌o個期…) 你睇o下當年被喻為哥哥o既接班人…嘩, 佢個樣居然同依家廿年後43歲都無咩大分別…勁! 仲要尋日睇報紙話佢o個仔提早出世…睇到d相, 作為一個bb已經算幾靚仔, 至少輪廓分明, 有d真係會一pat咁睇唔到個樣o架嘛! 同埋歐倩佁依家個樣都好幸福呀!
呢套劇好似係曾華倩出番o黎拍劇之後第一套 (?!), 仲同佢個緋聞男友馬國明一齊拍, 可惜無咩對手戲! 其實搵佢做女主角咪仲好, 應該會受落過郭羨妮 (不過平心而論, 郭羨妮今次做男人婆o既角色已經討好過平時好多…可能係無綫特登設計俾佢用o黎“洗底”之作)…郭晉安拍曾華倩…都幾有噱頭呀…令我諗起細個都好鍾意睇o既“嬴單傳奇”, 佢o地都係做一對…雖然我更加鍾意睇“萬家傳說”, “成功路上”, “同居三人組”etc.!
咁曾華倩係咪會同郭政鴻配成一對呢? 郭政鴻我又係ok buy…所以呢套劇我都幾鍾意, 起碼有幾個我幾buy o既演員 (不過個人認為曾華倩主持節目做得更好, 因為佢轉數快, 同埋講o野超抵死…我唯一一次日日追看“婦女節目”, 都係因為有日唔覺意睇到“女人.come”, 俾佢o既抵死吸引o左…佢even講星座, 教煑[食送], 或者做訪問都超級抵死…笑爆嘴! …所以我希望無綫會cast佢做多d節目主持!
仲有, 其實今次羅敏莊都做得ok…佢做呢d誇誇張張, 大癲大肺角色好過“天機算”o個d含羞答答少女好多!
居然仲見到又係八十年代o既歐瑞偉…令人諗起當年o既“大運河”, “蜀山奇俠”etc….o個時佢都有主角或者第二男主角做o下, 後來唔知點解唔見o左…再到近年出番o黎已經係做中生喇! 佢中途去o左邊呢?
posted by 芒姐 at 11:01 下午
16 Comments:
馬國明今次都算第二男豬腳
上次[律政II] 之後都幾 buy 佢
但這次這個督察角色，就唔明點解要插褲袋
調查時又要戴太陽眼鏡
都係[律政II]時個款好 D
想問有冇一出戲是唐寧同馬國明做情侶呢？
anyone know where 歐瑞偉 went between 1993 and 2001? I quite enjoyed watching a couple of the TV series with him as the lead actor/leading supporting actor.
Actually I don't think he aged too badly compared to some other actors.
古靈精探都幾好睇架！唔關邊個演員事，本身輕鬆搞笑+查案推理懸疑=自然多捧場客。
D.I.E每個人都有各自性格，有男人婆發姣婆大男人怕血李小龍fan...都幾鮮明。郭政鴻自從上次camp之後又做喜劇，都幾成功。我都一路都幾buy佢，希望繼續有機會啦！
馬國明每次笑起身，我都諗起變態絲襪佬。我覺得佢都係唔笑好，坦白講，佢一笑，就好似淫笑咁（sorry，fans得罪晒！）
我想睇女鬼小儀！哈哈！
"想問有冇一出戲是唐寧同馬國明做情侶呢？"
有呀, 師奶兵團囉!
"馬國明每次笑... 就好似淫笑咁"
哈哈, 十分同意, 真係好似!
"我想睇女鬼小儀！"
我唔想呀, 我其實幾討厭佢!
芒姐話關詠荷觀眾緣爆燈, 一定無咩人唔鍾意佢... well, 等我掃下你雅興先, 因為我係一個exception, 一直以來我都冇太特別buy阿關詠荷, 雖未至於憎, 但都真係幾唔鍾意佢, 唔知點解。
芒姐又話郭晉安個樣同依家廿年後43歲都無咩大分別, 呢點我又只係partially agree, 你話佢保養得唔錯係事實, 但話佢廿年後都冇咩大分別就假嘅, 睇真d其實佢都老左好多(其實曾華倩都係, 真係有d可惜), 唔似得auntie v果d真係名副其實一d都唔覺佢有老到, 好勁!
芒姐覺得郭晉安個仔"作為一個bb已經算幾靚仔, 至少輪廓分明", 呢點我超認同, 我覺得個bb個樣生得好四正, 好得呀!
嘩, 好驚呀, 芒姐你呢篇野講哂我既feeling呀! yeahyeah! 就連美七我都係同你一樣, 初初就好期待鄭嘉穎果條LINE, 我甚至可以話係因為想睇佢同Niki而睇美七, 點知到最後都係過檔左睇飛甩雞毛。
講真, 我真係麻麻地郭羨妮架咋. 不過我都覺得佢做呢個角色都算做得ok架喇. 我最唔鍾意睇佢喊/做一d好需要演技既感情戲, 所以佢今次呢個角色ok喎真係。
成套戲最鍾意睇都係郭晉安! 見到佢有時會不自覺地諗起亞旺 :P 其實佢幾OK架, 做搞笑又得正經又得。
而馬明我都係鍾意佢做呢類型正經角色多於太極傻傻的佢。
BTW
芒姐有冇睇今日勁歌? 好辛苦呀.. AMIGO唱歌仔呀..... 我真係看不清亦感覺唔到TVB呢個安排既用意呀....(唔好話我知係想試下觀眾對於AMIGO唱歌既反應如果唔太差既就俾幾首佢唱呀下 -_-)
其實我一直都覺得郭羨妮幾靚幾好ga,點知佢越來越cheap,但就算cheap,我都覺得佢做男人婆唔似呀,找第二個做會好d
我未睇過曾華倩做戲,昨天看到場鬧交戲罷明係俾佢威,都唔錯呀
馬國明個樣...實在太唔得太體,我全家都覺得,佢個樣唔係樣衰,之前幾套劇(除了太極,個角色實在太討論會)其他我都覺得佢唔差,但個樣實在太唔得太體,只係做CID仔都仲話得,但係做到咁高級就唔似啦,仲要扮型喎,真係好難頂
套戲最難頂就係朱慧敏,記得初時知佢係港姐都覺得麻麻地,點知之後搞到人分手,現在一睇佢個樣(同上次套劇一樣),一出場就知佢係會做人地第三者啦,真係個樣"作住" "第三者"呢三個字,仲有佢講野把聲好難頂!
係唔係第七天太令人失望呢﹖搞到fans寧願Kevin同Bosco係一對
你睇﹕
http://www.youtube.com/watch?v=Yg6CeHuhQFY
http://www.youtube.com/watch?v=8jNyDESmFjI
(過幾日哥哥死記﹐呢首歌讓我好懷念哥哥)
嬴單傳奇”, “萬家傳說”, “成功路上”...嘩嘩 嘩! 芒姐我哋果然啱咀形!
你有冇留意新出爐"壹週刊10大藝人"? 我有d感觸. 又係有闢呀林少爺. 如果你提開呢個topic我先講啦.
溫哥華匿名人上
溫哥華匿名人,
我有睇o左少少"壹週刊10大藝人", 不過無睇到有關林峰o架添...唔緊要啦, 佢依家就算呼吸大力d都會俾人話o下...個個紅藝人都要經過呢d階段, 無壞o既, 咁先會成長o架嘛!
不過反而我想講係我一路最有印象o既"十大藝人"都係陶大宇為首, 又有郭可盈呀, 歐陽波比呀咁...今次一睇呢段新聞, 先發覺已經改朝換代o左好多次...哈哈! 陶大宇依家雖然都係電視人, 但係已經十大都唔入...真係無咩人可以紅一世...
匿名,
哈哈...其實"美七"唔得我又覺得唔太關大家睇厭o左鄭嘉穎同niki呢一對事, 而係個劇情寫得差, 令人好唔想睇落去...同埋都係o個句, 未免太慘喇...
話咁快哥哥已經離開o左五年...時間真係過得快...但係大家一定唔會忘記五年前的四月一日...
笑哈哈,
雖然我一路都唔buy郭羨妮 (即使未發生o個件事前), 但佢選港姐o個時真係好靚, 但唔知點解近年連樣都唔得埋, 尤其個嘴怪o左好多, 太薄...以前都唔係咁o既...唔知佢搞過d咩?
咁我都覺得個男人婆角色搵第二個做會更稱職, 但今次無綫好明顯係想繼續幫佢"洗底", 至少形象無咁邪唔討好嘛!
曾華倩d戲我覺得ok啦, 又唔可以話好好, 但佢真人原來咁抵死, 轉數咁快, 我更希望佢做主持!
馬明最討好之作應該係"律政2", 又係擺明無綫用o黎捧佢之作.
朱慧敏其實如果無"車震"事件形象真係無咁差o既...仲要係當大部份人都未認識呢個人時, 第一單聽到佢o既新聞就係呢樣...印象分都蝕晒...第一個印象好緊要o架嘛!
佢選港姐時我又覺得佢ok喎, 起碼佢係比較對答如流o個個...不過亦因為口才比較好, 先被安排做當年的"香港直播", 咁先會同梁榮忠搭上然後搞到今日咁...
christy,
郭晉安其實o係九十年代都dup o左一段頗長的時間 (又唔係話好dup, 但係由八十年代尾的第一男主角, 變到有時要做第二男主角或者無咩發揮o既角色...所以見佢後來憑阿旺再起番, 都好戥佢高興...畢竟呢d真係由細睇到大嘛!
有啦...我返到屋企一開電視就咁o岩睇到"勁歌"...即係咁, amigo作為一個普通電視主持係唱得more than ok添...但係如果只係一個主持人, 點解要每次都安排佢同d歌星jam歌呢? 咁以後dodo姐做做o下節目係咪都要唱番首歌呢?
勁歌呢幾年有呢個叫主持唱埋一份的practice, 係因為佢cast做主持o既全部都係歌星, 咁叫佢o地同其他嘉賓crossover搞o下gimmick都ok o既...但係amigo作為一個電視人, 做咩要佢次次都唱歌...係咪其實想幫佢出碟呢? 我好同意你講: "看不清亦感覺唔到TVB呢個安排既用意呀"...
匿名,
咁當然郭晉安一定有老到, 廿幾年喎...但係老得算比較少, 個樣仲好後生...即使佢個好兄弟羅嘉良, 感覺都老o左好多 (雖然都ok man)...曾華倩其實老得多d添...不過女人同男人無得比啦, 仲要生過仔仲難keep...佢都算ok o架啦, 反而劉嘉玲感覺仲老...
周慧敏簡直係神蹟, 我反而覺得佢好樣過同埋fit過以前添...因為佢以前實在太厚粉, 我個人不太接受厚粉人! 依家好靚!
匿名,
係啦...郭政鴻努力o左咁多年, 我都希望佢上到位!
我都想睇女鬼小儀喎...前兩日睇佢"娛樂直播"訪問, 佢個人都幾得意, 幾有個性o既!
Moo,
um...佢依家個look都算ok o既, 配合佢真實年齢, 只係要拼埋"不老的傳說"郭晉安身邊先顯得佢老o左好多o者!
匿名,
係...馬明o係"律政2"個角色算係佢做過咁多個角色之中最討好一個...度身訂造嘛!
發佈留言
<< Home