2-26(tues) 最美麗的第七天
拍好擺o左成年, tvb上個禮拜終於開始播“最美麗的第七天”喇! 之前我幾期待o架, 因為我幾鍾意睇鄭嘉穎+周麗淇o既組合…“翡翠戀曲”同“天幕下的戀人”都幾好睇…仲要有我好鍾意睇o既“天幕下”o既原班人馬…連車沅沅都有喎…勁! 仲有上次個大家姐何綺雲…佢上次做o個個拜金主義者做得好好, 超搞笑!
不過睇o左幾集…無我想像中咁好…佢o地接受訪問時成日話呢一套係“天幕下”o既進階版, 話d感情寫得更加細膩動人…暫時就未睇到喇, 但頭一個禮拜o黎講, 上次o個套好睇好多 (雖然“天幕下”比較童話式, 但都拍得幾好睇…輕鬆/浪漫/搞笑/抵死樣樣都有d)…呢套暫時沉悶d, 希望之後去日本o個part會好d啦!
呢套走漫畫路線, 其實都ok o既, 但今次mk wong個角色無上次咁搞笑, 大家姐亦無咁多發揮, 仲有niki個角色設定係廿幾歲, 但思想好似一個十幾歲o靚妹多d…呢part應該可以寫番好少少!
仲有首主題曲…sorry, 雖然我幾buy鄭嘉穎, 但我要衷心講句…真係幾難聽o下, 好老套, 好似八十年代d旅遊特輯主題曲咁…好劉家昌師傅個style, 但睇番又唔係佢作o架喎!
全套劇最搶應該係隻狗狗…好得意! 同埋真係好識做戲…佢未免太叻喇!
上個禮拜上第一集時鄭嘉穎同niki一齊上“娛樂直播”接受訪問…嘩, 咁就特登捱眼瞓睇o下啦...點知呢…悶到我睇睇o下忍唔住要走去做第二d o野o既地步, 前所未有地悶, 雖然佢兩個我都幾buy, 但居然可以變成我睇過幾乎最悶o既訪問…尤其係資深dj陳永業做主持…佢做呢d娛樂節目主持真係好唔得, 個tone同埋把聲太港台, 仲要係1台…嘩! 悶爆!
鄭嘉穎同niki有時都係悶悶o地o個隻 (又可能佢o地尷尷尬尬驚俾人問到佢o地段情唔知點答好?!)…不過都要睇o下遇著邊隻主持, 同埋遇著邊d其他訪問嘉賓, 好似上次鄭嘉穎同“通天幹探”o個jar人一齊接受訪問就笑爆嘴, 陳豪同蒙嘉慧接受訪問會lively d…鄭嘉穎都被感染埋…尤其講“toby”o個part真係笑死我!
(終於搵到…“通天”演員@娛樂直播)
又或者好似上次“天幕下”加埋黃宗澤一齊做訪問, 又係好好笑…amigo係有佢o既存在價值o既…就算佢係不停over地讚d嘉賓, 起碼都帶起到話題, 同埋都有d笑位, 因為佢轉數都算快…即使搵佢女友唐詩詠做我諗都好過陳偉業囉, 至少佢都係其中一個演員, 起碼同佢o地都熟d…現役“娛樂直播”主持做訪問比較好睇o既都只係得陳芷菁, 雖然佢有時又係有點over, 但起碼無咁悶, 同埋讚美o既說話無人係唔受o既, d嘉賓被tum得高興自然會多d o野講, 氣氛都好d啦!
(“天幕下”演員@娛樂直播…又係終於o係土豆搵到喇!)
posted by 芒姐 at 1:34 上午
19 Comments:
"美七"係就係幾好睇, 不過而家唔係"高清"年代咩? 唔明點解無線仲要將呢套劇"高濛"化呢?
另外芒姐您認為鄭嘉穎唱既主題曲唔好聽, 咁唔知由泳兒唱您會點睇呢?
http://hk.youtube.com/watch?v=4jLb_zKCmsA
bosco同natalie條感情線，太抄”how to lose a guy in 10 days”喇，個女仔又係為左交稿，所以追個男仔返來，然後又要做唔同既野來激走佢。不過我都幾buy呢條橋，幾好笑!今集呢，natalie好似叫bosco幫佢買m巾添，我諗應該幾好笑，遲d要睇返。
仲有，我都覺得周麗淇個角色似乎天真得滯，成廿幾歲人架啦(死!講完好似有d含沙射影添~我都唔想)，最難頂係佢成日自言自語啊。佢在"天幕"係咪都係咁？
題外話，講開d巾呢，岩岩令我諗起"白色太陽槍"一詞。我第一聽到呢個詞語係睇"四個32a"時。想問下究竟係呢套戲裡自創呢個詞，定係不嬲都有人咁講？有冇人知呢？謝謝!!!
"紙"巾上
"白色太陽槍"? Heard about it in the late 1980s.
哈哈成套最美麗的第七天做得最好最吸引果個係隻狗仔亞JACK : )真係好得意呀!
thx al佛條link。點解泳兒會唱呢首歌既? 首歌原本係佢既? (好confused) 不過咁, 泳兒真係唱得好聽好多!!!!! 同埋帶到歌詞想講既感覺囉! 泳兒同鄭嘉穎, 個人buy後者多少少。但亞嘉穎唱歌有時...真係唱到好劉師傅feel.. 哈哈... 即係唱到好悶呀 ( i'm sorry各位嘉穎fans ). 不過我都明白呢套劇有鄭嘉穎做, 由佢唱返首主題曲係比較好d既。
btw.
我今日都聽人講話最美麗的第七天係抄好多劇，重話尤其個開頭。
芒姐，
哈哈，好認同大家，最好睇都係隻狗。如果我有隻狗咁醒咁善解人意，我真係唔怕養返隻。其實呢套劇so far唔太吸引到我追落去，以後就唔知喇。我覺得，嗯...此類劇種黎講唔算話好好睇，台劇好睇d囉。其實我覺得niki做緊戲既感覺幾著跡，唔太buy佢。
芒姐你有無睇太極，暫時黎講比想像中好睇，d情節場面仲好震撼，打殺姦淫頭幾集已經有齊哂,真係拍到亂世既感覺出黎。我覺得唔應該搵胡杏兒做呢套,第一佢個樣太時代,第二佢做得太over，佢d o拿口o拿面既表情太誇張喇，佢都係o岩拍d好似野蠻奶奶呢類喜劇。
又係我溫哥華匿名.
我呢度未有得睇 "美七”同"太極"．
Anyway, 芒姐，原來吳唱ｋ有時講ｄ嘢超搞笑． 你自己睇睇（由４min開始睇)：
http://www.youtube.com/watch?v=sLPzPJY09Ak&feature=related
芒姐,你有無睇"太極
"呀?開頭覺得有d悶,但睇落都ok!
不過我本人唔係咁鐘意馬國明,唔知點解好似咩戲都有佢咁,又唔係演技好!今次主要捧趙文卓場,因為好耐無睇佢做戲,佢係幾好睇果d黎,仲有吳美珩同林峰我都鐘意睇~
但胡杏兒做呢個角色就好似有d格格不入咁...仲有佢成日尖叫,好刺耳,唔係大聲就係識做戲...之前覺得佢做亂世佳人唔錯架,但自佢0係野蠻奶奶大戰戈師奶既演出後,對佢印象又再滑落!
唔知你又有無睇"太極"呢?
可能係口味問題啦，我就覺得呢套戲好似拍俾小學生睇既愛情片咁；好多普通過乜既鏡頭都要用濛鏡，俾人感覺濛得好濫同低手，好惡頂。唉，個導演係以為咁就叫浪漫呢？同埋唐詩詠套套戲個性格都係差唔多，真係好悶，何綺雲既發音又怪怪地咁，講野逐粒字咁"鄧"出黎。呢套野我都係間中經過電視前先會望下。
匿名,
哎...我都覺得有d失望...拍到咁...本來"天幕下"雖然都係有d"超現實"的童話感覺, 但都唔覺得太低能, 仲幾好睇...呢套真係呢...niki個角色點解要營造到咁白痴咁?! 咁樣會浪漫d咩?
好認同你話"唐詩詠套套戲個性格都係差唔多" (不過今次都做得ok)，何綺雲既發音又怪怪地咁，講野逐粒字咁"鄧"出黎"...佢o既發音真係好有問題..."妙3"最嚴重..."天幕下"因為個角色好出呀, 掩蓋o左少少...但佢應該注意o下呢個問題, 好嚴重!
匿名,
尋日終於唔覺意咁睇o左一集...都幾悶o下! 可能因為呢d劇種我真係從來都唔buy, 只係d演員全部我都ok, 所以都想睇o下!
趙文卓個配音唔係好配合佢個人同埋個樣...
吳美珩, 林峰, 胡杏兒我都幾鍾意睇...不過胡杏兒真係唔適合做民初人同埋呢種角色...吃力不討好! 上次"亂世"已經係咁 (呢套睇睇o下我睇唔落去)...佢其實比較適合做時裝同埋誇o既戲 (esp. 喜劇)...所以"野蠻"d人係ok受落...仲有我最喜歡的"律政1"超有型短髮律師...呢d o岩佢, 因為佢其實係ok醒目同埋伶牙俐齒...但千萬唔好叫佢做苦情戲...救命!
溫哥華匿名,
如果你有興趣睇呢兩套新劇可以上網睇...我都係o係土豆睇番miss o左o個d...
你o個段我會遲d睇, 我呢刻o既位置睇唔到片...吳唱k其實係ok funny o架...不過形象唔討好, 咪搞到依家咁囉...
fernseher,
niki早年作為新人o既演出我覺得算係非常好, 不過近兩年反而停留o係o個個level...不過無可否認, 佢同鄭嘉穎真係好襯...!
"太極"睇o左一集, 但真係唔係我buy的劇種...不過為o左睇d人, 都會飛快的睇落去, 再skip晒我唔想睇o既部份!
胡杏兒演呢d戲真係唔得, 難怪o係討論區俾人鬧爆...認同你所講"第一佢個樣太時代,第二佢做得太over"...兩點都中晒! 無綫都係唔好再咁玩佢, 俾佢做番時裝劇啦 (但唔係"歲月風雲"o個隻痴情女子)...佢平時俾人的感覺其實幾爽朗幾討好, 但一演呢d劇就好攞命!
christy,
隻狗仔阿JACK真係好得...所有主角d戲都俾佢搶晒!
其實依家無綫套套劇都係東抄西抄...不過天下文章一大抄...抄得好又唔怕抄, 但最弊佢抄得唔好呢...
re: "白色太陽槍"
...死啦, 我好"背"...我無聽過添!
紙巾,
如果齋講劇情而唔計演員, 我都buy mk wong (哈哈...佢o地o個4個人的組合都叫做"ddmk"...係咪inspired by呢個暱稱?!)同natalie條線多d (雖然人我就當然buy嘉穎同niki多d...但佢o地條感情線真係悶爆...同埋如果佢o地年輕20年會適合d!)...尋晚o個集佢o地睇睇o下波俾natalie "mun"o左個插蘇, 之後仲要倍佢睇"藍色沙律卷"同"天國的雞批"o個段都ok好笑呀!
niki o係"天幕"個角色雖然都有d神經質, 但真係無呢套咁低能...有時低能到想打巴佢 (雖然suppoosedly係想portray到佢個人好單純好好咁)!
Al佛,
嘩..."溏心"的Al佛好耐無見!
"美七"呢個short term都ok抵死呀o下!
嘩! 你點搵到首泳兒版主題曲o架? 點解佢又會唱另一個version呢? 好多疑團添...
咁坦白講, 雖然我buy鄭嘉穎, 但泳兒又真係唱得有感情好多, 好聽好多喎 (雖然首歌依然係麻麻...可能先入為主啦!)...成個感覺唔同晒! 嘉穎o既歌藝真係...一般啦...鼻音重得太交關...其實佢講對白都係, 但可能因為佢靚仔, 大家分心o左, 無唱歌時咁明顯! 佢都係做番戲比較適合!
其实我觉得鄭嘉穎唱得有feel D
泳兒个version太惨情勒
过路人,
哈哈...不過如果話邊個唱得好聽d, 又真係無可否認泳兒version好好多...:p
泳兒version太卖弄技巧 =.="
發佈留言
<< Home