2-22(fri) 陳冠A
陳冠A籬埋咁耐千呼萬喚終於返o黎…佢好好彩, 禮拜日話返又唔敢返, 拖多幾日居然爆o左幾單大新聞出o黎, 包括肥姐逝世同埋新地郭氏家族單o野, 點都分散o左d注意力…同埋拖o左差不多成個月, 件事點都比起一開始淡化o左…你依家先敢走出o黎…仲話無逃避…真係當大家又天真又傻喇!
嘩, 見佢o係九展離開時動用o既警力, 我仲以為有國家元首級出巡添…真巴閉! 係呀, 我真係幾唔buy佢…我認喎!
其實佢o係記者會講o既o野…ok啦, 基本上無咩內容, 好空洞咁兜來兜去…話會退出“香港”娛樂圈 (用意話佢都sacrifice o左d o野)…真係坦白講, 佢唔講我都唔知原來佢仲o係呢個圈囉!
至於佢叫律師出o個段claim番d相o既版權o既聲明…真係會唔會遲o左少少呀? 上次段 “疑似塔利班”短片已經唔得, 今次段聲明更騎呢 (再睇o下原來搵胡關代表佢做呢單o野…唔怪得知出o左d咁o既聲明!)…你係打算認d相係自己o既, 好心就早d認啦, 依家傳到個個都睇過你先去禁止人o地…係咪白痴o左d?! 我以為你話一路都唔打算公開認 (即阿嬌的approach) 都話o者…成年事最illustrate到o既o野, 係佢真係好無腦又好論盡! 又一次證明美貌同智慧, 真係永遠都唔可以並重!
(全男班)
(全女班)
(仲有…芒姐’s choice)
都係睇o下d開心o野好…首先係大晒冷的時候! 要再次多謝santa claus送我的絕對珍藏限量版tvb藝員宣傳卡, 每個力捧藝員一人一張…唔知點解, 我覺得好似細個玩認生字o個d生字卡咁…好搞笑!
唔講唔知…原來敖嘉年英文名叫pierre…真係估佢唔到! 仲有, d相片o既質素呢…其實都ok, 係唔知點解d男藝員要[手查]晒唇膏, 真係名副其實o既唇紅齒白 (仲要係好紅o個隻)…好恐怖!
仲有今年tvb的賀年mv…第一個係tvb力捧小生花旦一齊拍o既…林峰排頭位, 胡杏兒都企最中間, 佢兩個今年應該有運行…
(恭喜恭喜 歡樂年年MV)
第二個係2007年樂壇新人的賀年mv…又係林峰打頭炮...今年想話唔係“林峰年”都唔得…
(恭喜發財MV)
題外話…早排睇d音樂節目…點解王浩信同胡杏兒會有首合唱歌? 王浩信簽o左tvb咩? 定係胡杏兒簽o左佢間唱片公司 (佢仲係咪neway?)? 上次見王浩信有份做“野蠻奶奶”已經好怪o架啦…點知依家兩個仲合唱添?!
posted by 芒姐 at 10:36 下午
18 Comments:
芒姐, 其實我同你既諗法都好唔同下
我始終覺得陳冠希都算肯付責任, 雖然係遲d行出黎, 但係佢都算肯交化呢件事, 而且仲認自己係壞榜樣, 亡羊補牢未為晚也, 好過阿嬌, 係到好天真好傻, 我不過有一個諗法, 其實英皇會唔會有高層比人拉, 因為陳冠希認左d相係佢影既, 咁姐係入面d女星係真架啦, 天真嬌仲要係到扮晒陰公, 英皇係到懶醒報警
Edison比gill既道歉誠懇好多囉
牙gill得果幾十秒...又冇直接"成"認佢做過..係度扮天真扮傻..
仲笑得咁開心..好輕佻
Edison走係有佢苦衷..影響人身安全?
牙GILL道歉係為可以再留低係娛圈..
EDI就係引退都仲肯道歉
佢如果係都打算退佢可以唔理繼續玩失蹤..
所以我覺得佢有負責任wo
我都唔覺佢有好空洞咁兜來兜去..
我唔覺得叫"冇咩內容"
佢都講左好多野..例如話自己係壞榜樣等等
其實佢都係受害者..
佢都5想 D相比人睇到掛?
D相係雙方你情我願..我唔覺得有咩問題..
呢D亦係人地既私隱..
芒姐, 我幾鍾意今年個"歡樂年年MV"呀, 做得唔錯...
不過你發唔發覺無左黃宗澤同楊怡? 係唔係呢兩個唔受捧啦?
芒姐
其實陳冠希件事我一直都覺得唔應該搞到咁大,好大程度上係d傳媒同d好反智的網民將成件事越炒越大。新正頭年初一的報紙頭條竟然係呢單新聞我真係相當之火滾。完全成件事俾d 無關痛癢的第三者同局外人搞到越來越反智。
我其實並唔覺得事件中的男女私下響房影呢d相有幾唔o岩，始終都不過係佢地自己的私人事,我真係睇唔到同公眾利益有乜野關係。個男仔係就係濫交，咁全世界不嬲都知佢女友多架喇，如果你要到呢件事先知佢唔係純情處男，咁天真好傻o個個應該係你至真。我自己覺得陳冠希錯並不錯在影這些相(因為我相信多數人都會有某種fetish，差在你自己未必知，知都未必會認)，亦不是錯在濫交(講得好聽係風流-- 大把男人都風流喇，有口話人無口話自己)，錯在佢真係太無危機感，d咁sensitive 的珍藏應該收得密一密，保護自己同女伴。
至於班女仔，我就覺得都好可憐，雖然話影相時你情我願，但都係因為信得過個男仔先肯俾你影。但係你竟然咁唔放在心上，咁容易就俾人偷左去。而且當中有d係名正言順正印女友嘛，拍緊拖同男友響屋企你儂我儂又有幾錯?最慘的我覺得真係Bobo。柏芝係人都知佢以前係蒲精，咁人地結左婚收心養性晒乖晒，你搵返佢喪蒲時期的往事出來做乜?唔見得人地從良?
阿嬌佢個「交待」的而且確係好行貨，場戲做得實在頗差。真係個script 好似擺明唔係佢寫咁，好心搵槍手寫都搵個文筆好少少架喇!佢同得陳冠希斷斷續續成六年咁耐,仲要個男的身邊緋聞無停過，我相信佢真係十分之愛這個男人先會肯維持段地下關係咁耐。我倒寧願佢真情剖白話自己愛過，但係愛錯呢個男人，以後會更加帶眼識人，咁反而大家會俾多d同情分佢。始終佢都成廿六、七歲，無可能仲賴自己天真無邪，真係會俾人笑死o架嘛。
陳冠希個道歉真係...好似無講過野咁，不過都算係道左好多次歉，我覺得佢已經為自己的「年少輕狂」(?)付出代價。咁如果佢真係生性地做人的話，我都覺得佢應該大有作為的。大家真係唔應該再打落水狗喇，人地重新振作之後的成就分分鐘叻過你幾十倍喇。
呵呵，唔贊成我的儘管無視我呢段廢話，我絕對唔介意，哈哈。
我係桃桃
Re: Edison
即係咁…我覺得點解冠a同天真嬌的”交待記招”後坊間對於冠a的接受程度會大過陳嬌呢, 最主要係因為佢o地一向o既形象…陳冠a一向係壞孩子, 大家對佢根本無咩expectation, 佢做出o既o野你亦唔會太驚訝 (柏芝個case一樣), 但係阿嬌一向走可愛純情路線 (雖然大家都知道形象同真實係兩回事, 但知道同親眼睇到始終係兩回事)…一旦睇到原來佢係咁大家都不敢”o”左十o下嘴, 同埋有”被騙”的感覺…所以o個段”我們鄙視的是你的虛偽而不是你的放蕩”會咁有迴響! 相反edison一向都係咁o架啦…所以大家對於佢o既尺度一定寛鬆d!
其實”道歉”…佢兩個都無必要, 阿嬌係為飯碗, 冠a為減低俾人斬的機會同埋第時若果d女星真係告佢, 或者可以以此減輕賠償金額…各自有自己o既原因啦…兩個都唔會係真係好有心道歉o架喇, 只係逼不得而…同埋我一向都話呢件事無話對與錯…你情我願+個人喜好…陳冠a最錯係佢無好好去保管d相仲引致佢外洩, 人o地咁信你你就咁唔小心, 咁唔去保護朋友或自己的私隱…佢如果真係要”道歉”, 應該向d女星道…因為真係因為你的唔知有心定無意的大意而令佢o地受到傷害…當然更hurt係揭發o左你當年一腳踏十船! 而對於公眾, 佢話有d年青人會look up to him as a role model…其實呢句反而應該留番俾天真嬌講比較貼切!
但係出o黎”交待”佢兩個都係必須o既…唔係為公眾, 而係為自己…阿嬌要保飯碗, 陳冠a為人身安全, 同埋起碼出到街唔洗變過街老鼠…所以呢個係必須! 你一日唔企出o黎, 一日你都會俾幾百記者追住…除非你呢世唔返香港! 佢係有”承擔”, 不過遲o左一個月, 等到件事淡化o左少少, d女星俾人問到口啞啞, 人人自危, 滿城風雨過去o左之後先返o黎承擔o者…
佢今次個look同埋講話個tone, 就絕對好過阿嬌的輕佻笑 (呢part係最錯o既)…阿嬌反而要向edison學o下戲! 佢段聲明雖然其實無咩具體內容, 但都好過阿嬌段“天真”宣言…o個段”天真”論擺明寫出o黎俾人笑…但佢又要避重就輕, 因為佢仲要o係呢個圈到玩落去! Edison o個段就擺明只係一段法律聲明…尤其呢兩段:
“I admit that most of the photos being circulated on the Internet were taken by me. But these photos were very private and have not been shown to people and were never intended to be shown to anyone. These photos were stolen from me illegally and distributed without my consent.
There is no doubt whoever obtained these photos have been uploaded them on the Internet with malicious and deliberate intent. This matter has deteriorated to the extent that society as a whole has been affected by this. And in this regard, I'm deeply saddened.”
…又”malicious”, 又” have not been shown to people and were never intended to be shown to anyone.”
桃桃,
你話: “我倒寧願佢真情剖白話自己愛過，但係愛錯呢個男人，以後會更加帶眼識人，咁反而大家會俾多d同情分佢。”
…呢個十級認同!
今日睇報紙陳冠a爸媽走出o黎將件事”laam”上身, 話係自己教導無方…又係係因為佢o地離婚令到edison反叛…嘩! 呢招真係好得! 勁呀! 我睇完都俾o左十個叻佢o地! 邊個獻計o既真係要加人工…成功將視線轉移, 仲可能可以搏得一d家長同情, 覺得呢對父母就真係”有承擔”喇…good move! 呢個好得呀! 又學到o野! 都話睇呢件事上, 真係會學到好多公關技巧!
wahaha,
其實我無睇清楚晒有咩人, 淨係見到胡杏兒企好中間...得閒再睇o下先!
無理由呀, 佢黃宗澤同楊怡都應該係力捧對象之一o架!
芒姐,
"林峰排頭位, 胡杏兒都企最中間, 佢兩個今年應該有運行…"
佢地今年一定有運行。報紙話梁家樹升職,同珍姐平起平坐。阿梁生近年開劇唔算多,但幾乎套套都有林峰同杏兒。有3套仲要係"峰杏配"...唔理阿梁生會唔會開套劇捧佢地,至少多個高層撐佢地。
梁生近年既劇集,from 維基百科:
# 2002年：流金歲月
# 2003年：律政新人王
# 2006年：爭霸
# 2007年：歲月風雲(與潘嘉德共同監製)
# 2007年：廉政行動2007
# 未播映：太極
其實疑似藝人淫照事件到左呢個地步,當事人出黎交待左,又赤棵棵比全地球人睇哂,就無謂再咬死人唔放。(even我對阿嬌係好反感,但都唔想佢無左份工,女仔人家又要養屋企,唔通真係去嫁阿juno咩?)即使作為一個好八掛既讀者,我都唔想再見到日日淫照相關話題做新聞,香港變淫港。
re: "唔通真係去嫁阿juno咩?"
咁講唔公平, 老實講, 如果天真嬌真係同juno結婚的話, 賺果個應該係阿嬌, 我覺得今時今日嘅天真嬌絕對配唔起juno lor!
re 匿名:
我咁講唔係話juno襯唔起阿嬌.我反而覺得係倒返轉。其實我只係想講阿嬌無路可以行,juno呢個只係個example黎。佢有個咁既底,短時間內都好難搵人嫁,男方接受家人都好難接受,所以一定要keep到份工,at least要養得起自己同屋企,佢仲有個讀緊小學既妹架。
以後陳CEO可以名正言順咁專心做潮童生意, 都好嘅
呢排啲新聞真喺冇幾件喺好嘅, 都開始有啲抗拒了.
回應下Monjeh嘅題外話, 胡杏兒同埋王浩信嘅個首合唱歌喺唔喺"最難過今天"? 應該喺網上已經傳咗有段時間了, 當時仲以為喺"野蠻奶奶"嘅插曲. 其實首歌幾唔錯, 尤其喺胡杏兒, 佢唱過嘅幾首歌都幾好聽, 唱功唔算得話喺專業歌手的程度, 但喺唱得好有感情, 佢把聲都唔錯, 比其他女演員好好多.
再講下王浩信, 其實喺睇"野蠻奶奶"之前完全不知道佢喺邊個(雖然睇完之後都唔喺好清楚), 不過覺得佢演戲幾自然, 真喺一個活生生嘅輕佻太子爺. 如果佢本身喺個咁樣嘅人嘅話, 就要佩服佢嘅本性演出; 如果佢本身唔喺一個咁樣嘅人嘅話, 就要佩服佢嘅精湛演技了.
start,
王浩信唱歌係算ok o架...佢同方皓文o個首合唱歌成日o係k都聽到, 都幾好聽! 同胡杏兒呢隻ok啦...但真係唔知佢幾時簽o左無綫?! 同埋之前打去neway訂位每次都係佢(把聲)接聽, 叫你香港按1字, 九龍按2字o個隻...好搞笑! 第一句係: hello, 我係vincent王浩信...好騎呢的電話錄音服務!
胡杏兒o係花旦o黎講算係唔錯, 不過如果要出碟仲需要練o下 (雖然我本人都幾buy佢)...
Vince,
係囉...唔知佢指退出香港娛樂圈, 包唔包括幕後或者做老闆呢? 如果唔係佢旗下o既農夫都唔知點算...
fernseher&匿名,
我同意呀...其實juno一向俾我的感覺都唔差, 有錢得o黎都無咩真係好擺款, 唱歌跳舞都幾好 (係個樣...其實我覺得睇睇o下都幾順眼)...如果佢肯娶阿嬌, 係阿嬌執到先o岩!
fernseher,
原來係咁...梁家樹好似又真係幾鍾意用林峰同埋杏兒...可能佢最愛o既撈家同宣萱已經升o左上神枱(或者即將轉台)...照咁睇, 阿toby今年都應該可以做番10套8套女主角喇...
fernseher,
原來係咁...梁家樹好似又真係幾鍾意用林峰同埋杏兒...可能佢最愛o既撈家同宣萱已經升o左上神枱(或者即將轉台)...照咁睇, 阿toby今年都應該可以做番10套8套女主角喇...
發佈留言
<< Home