2-23(sat) 你的克勤演奏廳

農曆年當然一如以往會去睇李克勤演唱會…依家真係變成每年新晶頭生活的一部份, 唔去睇過佢或者左倫右李演唱會, 好似有d o野未做咁…! 個人認為克勤真係最適合新年開演唱會o既藝人, 因為佢係咁多個歌星之中比較識得講o野, 轉數快同埋識搞氣氛o既…其他o個d可能會悶爆!

今年初三去睇…已經係第唔知幾多次喇! 記憶中克勤o既演唱會, 除o左93年o個次, 我幾乎次次都有去睇, even佢自己話座率得五成 (我現場睇覺得都應該有七成呀) o既95三面台演唱會我都有去睇…學廣播道fans殺人事件話齋: 我諗, 我都算係fans!

佢咁多個演唱會之中, 我又覺得02年o既“情情塔塔”演唱會最好睇, 成個flow, 選曲都做得好好…可能呢個係佢“省招牌”之作, 唔可以衰俾人睇 (當然, 如果講到“翻身”之作, 當然係同“港樂”合作o個個演唱會…當年真係覺得幾喜出望外 [連我都咁覺得, 相信o個d以前唔係聽開克勤o既朋友應該覺得更驚喜!]…就係因為o個個演唱會, 令佢“鹹魚翻生”, 重踏樂壇頒獎禮!)…基本上我覺得佢次次演唱會個流程都做得唔錯, 起碼應該真係有用心諗過, 唔似得某d歌手真係好求其!

費事重覆又重覆, 有好多points o係前年李克勤06得心應手演唱會講過o既o野我就唔再講喇…今次搵o左成隊樂團o黎做現場演奏, 仲有每part穿插唔同樂器演奏, 對於我呢d都ok鍾意睇類似“港樂” o既人, 算係幾唔錯o既安排…當然克勤d金曲係功不可沒…你話佢食老本再食老本…又如何?! 慘得過大家真係buy! 同埋佢d舊歌真係…唔知點解可以聽二萬次仍然咁“kum”聽! 呢d所謂“食老本”o既八十年代歌手演唱會, 係近年最收得o既演唱會, 就知呢個“老本”market係幾咁龐大…人人都愛懷舊, 那怕你係二十幾歲! 當然, 克勤的粉絲群應該係三十幾歲o既佔更多數…呢個年紀係最愛+最有經濟能力+最願意付出去尋回童年/青少年時代o既記憶…所以呢d演唱會係長賣長有!


(今年的“鳯陽花鼓”玩意…居然唔係pong pong棒…係有d新意喎!)


我最喜愛的克勤經典歌曲…雖然講過一百次, 但點都要再講多次…

1) 月半小夜曲
2) 大會堂演奏廳
3) 一生不變 (呢隻本來細個係無咁鍾意o既…係可能05年俾“酒店風雲”翻抄番令佢重新hit過後, 又覺得好好聽…之後06年亞視重播“藍月亮”, 又再reinforce到呢種感覺@)
4) 深深深
5) 命運符號
6) 眷戀
7) 夏日之神話

仲有90年代o既“一個人飛”(佢好鍾意o係演唱會唱呢首不屬於“一線”o既歌曲…睇o黎佢自己都好鍾意), “沒有你贏了世界又如何”, “偷偷摸摸”etc.都唔錯…仲有佢o個首由最初被佢稱為“滄浪遺珠”到近年俾佢o係演唱會唱到個個聽過佢演唱會都識o既 “好戲之人”都唔錯呀…其實, 我真係幾鍾意聽克勤d歌!

某d舊歌用o左新arrangement, 不過我呢d老套派都係鍾意原裝多d, 事關大家真係一聽個前奏已經會“起雞皮”! 實在太經典!

作為無綫契仔, 當然會唱o下一系列電視劇歌…但係點解今次唔唱番“酒店風雲”隻主題曲呀? 反正呢期重播可以做o下勢呀, 同埋隻歌本身都幾好聽!

至於跳舞, 佢成日攞呢part o黎自嘲, 講真, 我又唔覺得係咁差…其實佢節奏感好ok, 都跟到d舞步…不過到o個個吹“鎖吶”(sorry, 唔識點寫) 個肥叔叔出o黎同佢一齊跳“舊歡如夢”, 我又明佢o既唯一問題o係邊…叔叔雖然肥嘟嘟, 但係跳起o黎都好靈活…克勤同佢一比之下, 係跳得硬好多囉…不過真係一d都唔算差! 當然, 你不能話同阿城城呢d舞王比!

延伸閱讀:


2004年-左倫右李演唱會


2006年-李克勤06得心應手演唱會


李克勤n年前音樂特輯之...熱浪迷情

克勤的私家blog…大家得閒又可以睇o下喎!

最後仲可以睇埋呢段90年代初期歡樂今宵o既“李克勤+關淑怡之雙星戀曲”…o係youtube無意中睇到…又幾好睇喎! 勝在多好歌聽, 同埋可以睇番佢o地o既後生樣! 仲有梅小惠同吳剛師傅添! 一見到梅小惠同李克勤o既配搭, 就令我諗番起當年超好睇o既青春劇“淘氣雙子星”…oh…李西西同學你好!


(李克勤 關淑怡 雙星戀曲)