2-29(fri) 一生不變的神奇功能
農曆新年之後深夜12點3重播 “酒店風雲”…我都講過好多次話呢d時段依家最煞食, 返屋企沖完涼坐定定睇戲就最開心…所以依家呢個深宵時段都多o左好多廣告客戶! 唔知點解…d劇集擺o係呢個深夜時段即刻吸引晒…可能真係同“沖好晒涼舒舒服服等睇戲”呢個主觀心理因素有關! 事關首播時真係反而麻麻地鍾意睇, 依家居然晚晚捱眼瞓好落地咁追 (雖然其實可以上網睇番, 但我依然覺得每日o係電視追同上網一氣過睇番係兩種味道, 兩種情趣!)…覺得好好睇, 尤其好少可會頭5集劇情可以做到咁緊湊囉!
05年首播時頭十幾集睇o下又無睇o下咁…所以唔係完全知道個劇情…依家由頭睇, 有d位明白番, 感覺又無咁差…好似呢段曹永廉o係菲律賓忽然高歌一曲“一幽風飛散髮披肩”的笑爆嘴橋段…我相信到第26集睇番時依然笑爆嘴…但原來套劇一開始就不停咁舖排播 “一生無變”, 話係官恩娜最鍾意o既一首歌…咁就make sense好多…但唔代表呢個橋段唔好笑!
不過到後段o個d “你玩我玩你”同埋“局中局中局”就真係玩大o左…over o左d!…永遠都唔知邊個講真話…可能真係要帶出首主題曲“心計”啦!
(一生不變@酒店風雲)
不過真係不得不承認加插o左“一生不變”落d劇情度真係神奇地好睇o左, 動人o左咁…一首好歌真係會將劇情改變! 勁! 最勁係個編劇 (定係配樂定邊個決定用呢首歌呢?!) 真係應記一功, 識得搵番首咁陳年o既金曲o黎放o係套劇度, 仲幫首歌“翻hit”番添! 佢都應該係成長於我o地個年代的朋友…05年睇電視的“小朋友”, 好多居然未聽過呢首歌囉!
tvb真係好愛克勤, 不停搵佢唱d大劇o既主題曲, “酒店/歲月風雲”都係佢, 仲o係戲裏面幫佢sell舊歌, 令呢首歌又一次hit番…我記得o個期真係好多人o係網上search呢首歌! 咁又係, 近年d歌又真係無d咁咁咁kum聽o既…仲要配埋落d劇情度更加好! 不停都有d劇集用呢隻歌做主題曲/插曲…除o左十幾年後o既呢套劇, 仲有89年亞視o既 “藍月亮” 呢…
(一生不變@藍月亮)
其實呢套劇馬德鐘+郭可盈同埋吳唱k+官恩娜兩段感情線都算幾好睇! 馬德鐘當時形象無依家咁差, o係劇裡面仲幾型添…ok討好喎!
至於吳唱k同官恩娜o既訂情之作…依家睇番兩個當年作為新人其實都演得ok! 吳唱k做呢d衝動派o靚仔都係開正佢o個瓣…官恩娜又係靚o既, 即使做個賣魚妹角色, 無咩點打扮, 個樣都幾靚…同埋角色討好嘛! 吳唱k個角色亦都ok討好…好明顯o個時tvb真係勁力捧佢, 又大製作, 仲要角色度身訂造, 然後每日力推佢隻“別怪她”… 日日咁播法唔好聽都變好聽, 雖然其實我覺得係ok好聽, 只係歌詞有d怪雞, 同埋最後o個段“原諒我付了代價”比較趣緻…只係當時連續幾個月咁熱播法聽到有d煩…但不得不承認, 05年有邊個會唔識唱“別怪她”?!
但係另一個新人姚子羚就大鑊喇…新人被派演d咁o既角色, 吃力不討好, 仲要樣又唔及官恩娜靚, 演技又唔係特別好, 個角色仲要超級超級克人憎…真係無運行!
其實“酒店風雲”隻主題曲都幾好聽o下…仲有吳唱k的首本名曲“別怪她…別怪她…”…停o左一排再聽番又係幾好聽, 日日咁播法點都聽到順耳, 可能重播完呢套劇, 首歌+唱k哥哥本人都有機會再hit番添!
(post過九萬幾次o既吳唱k+官恩娜@勁歌金曲唱“一幽風飛散髮披肩”+ “別怪她...別怪她...”...不過睇完呢套劇重播再睇番呢段, 又有另一番滋味!)
“一生不變的多功能”延伸閱讀:
2005-9-19(mon) 曹永廉
2005-9-23(fri) 酒店風雲大結局
2005-12-31(sat) 除夕冬日群星音樂會
2006-10-12(thurs) 八/九十年代亞視青春劇…一幽風飛散髮披肩…
2006-10-26(thurs)“藍月亮”結局篇
posted by 芒姐 at 11:53 下午
22 Comments:
芒姐你好：
唔唱ｋ經過 兒歌金曲一役之後, 人氣大不如前, 仿佛係香港消失左- - 官上次既律政新人王2都有ok既演技, 不過果套劇既劇情好過份, 係法庭結婚都得? 超低能
你的長期忠實fans Ken 上
芒姐!你講得實在太好了。李克勤首"一生不變"真係令"酒店風雲"一部普通既電視劇變得經典哂，好似一聽"紅河村"就諗起"大時代"，或聽到"big big world"就諗起"刑偵四"咁(不過個方向應該有點不同，我係因為睇"大時代"同"刑偵四"先聽果兩首歌，但我追"酒店風雲"係因為鍾意"一生不變")。尤其係在天橋播"一生不變"果part，真係好難忘!近年來好似冇乜咁成功咁有劇味既ending~
為左引證"一生不變的神奇功能"，同埋表現我係有幾咁鍾意"一生不變"(因為"酒店風雲")，我決定講少少私人野:p （希望唔好悶親大家）。話說幾年前，我同男朋友一齊左冇耐，佢就要離開香港一段時間，當時都幾唔捨得。所以佢臨走之前果晚，我就約佢唱k。同佢唱到咁上下，就專登洗開佢，偷偷地點左"一生不變"。之後佢返到來一陣，喇叭就傳來"登登登登"呢段經典前奏。就在呢段時間，我就懶浪漫咁送d小禮物俾佢，嘩哈哈。諗返都好老土兼核突當肉麻!!我諗，我真係中左"一生不變@酒店風雲"既毒...哈哈...
酒店/歲月風雲”都係佢
also have 賭場風雲--風雲三部曲
Can you post your 電 視 撈 飯 here(or from http://hejnom2.blogspot.com/)? I am from oversea and can't read from appledaily
我係溫哥華匿名人
我其實覺得吳唱k好慘吓. 佢係冇天份. 不過唔係佢錯晒喎. 捧佢到天咁高, 又唔let d 時間佢去進步, 跟住就踩佢跌到咁. 佢好無辜好可憐! d 記者唔知又點解咁鍾意針住佢. 佢被放逐咗去大陸3個多月 (自11月台慶之後). 呢3個多月, 香港娛樂圈可以話翻天覆地. 佢完全out晒,好奇怪. 重有,佢老友已經由藝員變咗一個金唱片歌手/登台掘金王/萬人迷
芒姐，
我無咩點睇過酒店風雲都係因為吳唱k,佢d戲真係唔得。有一次我一打開電視，巧合地見到吳唱k同ella深情對望，但阿吳唱k d 眼神完全無戲可言，搞到我即刻熄電視,以後都無再睇酒店風雲。
agree with 溫哥華匿名人。吳唱k真係好慘，佢係樂易玲捧人策略失敗既最大犧牲品。吳唱k本身無咩料到就唔好咁快比男主角佢做啦，仲要唱唔到歌跳舞油麻地都幫佢出碟，自暴其短哂唔該。加上my飛佛，johnny deep，欣宜事件，香港人一沉百踩既心態，比人越寫越衰，搞到依家咁。
佢老友人氣旺盛都唔係突然之間既事，林峰不嬲內地海外都有好多fans，因為出碟有銷量統計,有實質數據比傳謀寫證明呢班fans既存在,所以搞到佢係好似突然紅起黎咁。
btw係唔知邊度見過話無線有意幫鐘嘉欣出碟。真係服左無線，吳唱k衰過一次仲未識吸收教訓。
d 人一題到"吳唱k老友" 即刻諗到係林峰,睇嚟(d人心目中)佢真係冇乜朋友
芒姐,你有冇聽過幾個月前吳唱k同Bosco响後台幾乎打架呀? Bosco同吳唱k因為雙方唔肯讓路闢係嘈起上嚟,嘉穎走埋去幫拖Bosco, 兩個唔知同吳唱k講咗d咩,攪到吳唱k想揼佢地,跟住林峰聽到衝去拉住吳唱k. 最後樂易玲出嚟大駡...林峰話佢好加入戰團
re 匿名，
吳唱k有無其他朋友就唔知，不過眾所周知佢同林峰係真係兄弟果隻老友，唔係果種為左係記者面前扮人緣好果種。佢兩個既訪問我都有睇過，至少佢兩個講返對方既野同一齊做既野係好一致。以前我對佢地咁高調既兄弟情都有d懷疑，不過我好記得台慶，林峰拎完獎順住座位次序同一眾人握手，但明明第二行第一個係mk，佢反而係先隔住mk同吳唱k貼臉擊掌，先再同馬明&mk握手。呢下親疏有別十分明顯，所以好深刻。
你講果單傳聞我係d forum睇過，疑似係07年台慶發生。內容仲話林峰成晚黑面係因為比樂小姐罵，又話楊怡拖手係安慰佢。講真我覺得都係以訛傳訛成份居多，咁嚴重同咁精彩既至少雜誌d乜乜手記會用代號黎講下掛?我唔排除暗地裡有不和﹑言語間暗串，但班上到位既小生點都有一定待人處世之道，唔會明爭到咁低莊，至少一定唔會係台慶呢種日子打出手掛?
芒姐,我諗要打救吳卓羲,tvb可以比個啱佢的角色等佢可以再次入屋.你知啦,一個好正的電視角色真係可以令一個"半死"的演員突然翻生. 不如開個時裝劇叫吳卓羲同林峰做兩兄弟.喜劇/溫情嗰隻.咁佢地演得自然,呢d劇種又易入屋.實lum到d帥奶/OL
話時話,tvb點解唔make故事比賽? 我不時諗諗埋埋d故仔可以變做電視劇!
溫哥華匿名人上
我覺得俾一D角色係唔駛sell靚仔呀萬人迷果d角色俾唱K就得架喇 :P
其實唱K重有得救架個人氣, 睇下志雲大師同樂小姐出唔出手架姐。
溫哥華匿名人，
大唐雙龍傳已經玩過你講果條橋，香港觀眾好似唔太受wor，可能時裝會有唔同既效果掛:> 但係海外內地雙龍就紅左，唔少仲要鐘意其中一個就鐘意埋第二個;林峰仲憑呢套拎左大馬視帝，早過陳豪添。唱k既火羅王+無料但串貢貢既形象太深入民心啦,佢d戲路又咁局限,皆因係香港上位一係靠傻一係靠深情,佢喜劇感不及mk,情深款款又不及林峰,真係神仙都難救也。
好提議，無記應該搞個呢ｄ比賽，吸納編劇新血。係時候吸引班罵tvb罵大既人入去有一番新改革:>
re: 吳唱k
其實我又唔覺得佢真係完全無料o既, 即係佢做番呢d衝動少年角色係ok稱職同埋討好, 好似佢o既一炮而紅之作"衝上雲宵"咁...但係好局限, 永遠只可以做呢d角色...
同埋當初佢點解會跌得咁勁, 可能真係因為捧得太快, 過份曝光 (tvb捧人的最大弊病), 咁就自然反感, 就算佢幾好睇得多都厭, 同埋人人都有缺點, 即係暴露晒出o黎!
本來佢唱歌同跳舞作為一個普通藝員o黎講係ok, 最弊你俾佢出唱片, 仲要係年青小生之中第一個, 跳舞又話係舞蹈藝員出身, 但係林峰都跳得好過佢好多...咁自然"露晒底"...一沉百踩...錯可能真係錯o左捧得太快...
睇番"酒店風雲", 佢o係裡面都做得ok o既...不過呢兩年真係好似消失o左咁 (即係我知佢有做"歲月"/"學警"o個d...但係人氣等於零 {if not負}...所以都好慘o下!
fernseher & 匿名,
re"吳唱k同Bosco响後台幾乎打架"事件...我真係無聽過...如果係真呢兩位年青人都幾無聊o下...你話好似當年冠a同魚文樂單"射嬌英雄傳"後台撞膊事件因為爭女都無咁無聊...我諗可能真係好似fernseher所講"暗地裡有不和﹑言語間暗串"就或者會o既...不過傳聞永遠都會誇d o架啦...
時裝feel唔同古裝. "大唐"响香港唔受係劇本累事.佢兩個d兄弟情幾好睇+幾好笑,尤其唔知點解要成日瞓埋一張床
咁,唔演兄弟不如演一pair啦....(寫包單tvb一定唔會拍呢d嘢)
溫哥華匿名人上
fernseher,
幫鍾嘉欣出碟? 唔係又簽英皇呀嘛? 林峰簽英皇已經好九唔搭八...王祖藍更甚...我唔明點解要揀呢間囉...?!
不過坦白說, 雖然我對鍾嘉欣的感覺一般 (真係literally一般, 又唔會話好憎佢, 但亦唔buy佢), 佢o既唱功係令我有驚喜! 聽佢平時講o野把聲以為佢唔多唱得...但係舊年"溏心"上勁歌唱live, 佢係出奇地唱得好! 之後幾次live都ok...tvb咁多個花旦, 佢幾乎係唱得最好(or最穩定)o個個...當然, 唔代表可以出唱片 (吳唱k如果唔係出唱片, 只係得閒o係d show度唱o下歌, 大家的comment可能唔會咁harsh!)
匿名,
哈哈...之前講過唔再post自己articles的原因...除非我忽然心血來潮啦...
如果你唔介意可以睇呢度:
http://bbs.ent.163.com/bbs/tvb/42792854.html
有晒所有香港報紙的視評, 一目了然...幾方便...不過有d係簡體字, 可以post落word轉為繁體...
匿名,
re "酒店/歲月/賭場風雲”...哈哈, 你唔講我都無留意係"風雲三部曲"添...好明顯tvb作劇名都好求其o下!
嘩! 紙巾...睇o黎呢首"一生不變"真係對你有好大意義呀o下...仲勁過對李開心的意義!
在天橋播"一生不變"果part係有d騎呢...不過又真係幾特別! 不過呢首歌真係令呢套劇生色不少...記位留意第26集的"一生不變@菲律賓"...好好笑!
Ken,
其實"兒歌金曲"一役真係騎呢到爆...大家可以話欣宜錫吳唱k一啖(not even係咀)唔好睇, 但又未至於不安呀嘛? 仲要不安到打電話去投訴...需知道打一個電話快則幾十秒, 慢則幾個字...都要put好多effort...有無憎佢o地憎得咁交關...香港有d人有時真係好難以理解!
係啦...律2後段的浮誇劇情係over晒囉! 破壞晒成套劇!
溫哥華匿名人,
林峰同吳唱k演...一...pair...pair...pair...pair...pair?!?!??!?!
er...以電視劇o黎講...意識比較大膽...不過你都可以試o下向志雲大師或者樂小姐獻計...
套野真係勁好睇,但越睇越嬲,邊有人可以咁奸,而且佢仲話好鐘意三表哥,但佢咁做擺明想整死佢,咁叫鐘意咩??
patrick,
chloe個角色真係太克人憎...加上姚子羚當年o既演技...無綫排明玩佢! 佢應該鍾意三表哥間酒店多過個人...
發佈留言
<< Home