10-12(thurs) 八/九十年代亞視青春劇…一幽風飛散髮披肩…
weekend終於有機會睇番期待o左十幾年o既亞視經典青春劇“藍月亮”…哈哈…其實又無咁誇o既, 不過因為多年來大家講起亞視經典青春劇, 除o左會提到“大提琴”, “點解阿sir係隻鬼”(但係呢套又not exactly係呢個範疇) 之外 (咁仲有七/八十年代o既麗的o既青春劇“IQ成熟時”, “青春三重奏”, “甜甜廿四味”, “驟雨中的陽光”等)…一定會講到呢套曾經都幫亞視吸納o左一班年青捧場客, 搶到少少收視o既“藍月亮”…因此作為一個資深電視精, 尤其有時都幾挫強扶弱地喜歡睇亞視, 學況天佑話齋: 會欣賞亞視o既誠意o既電視迷…未睇過呢套劇的確係一個遺憾!
多得亞視o係17年後終於肯重播 (我唔排除o係十七年裡面佢係有重播過但我miss左…咁只可以話我o地係無緣份…永遠我都只係睇到“大提琴”同埋“q表姐”)…等我可以還o左呢個心願!
依家只係睇o左頭幾集, 仲係講緊羅頌華哥哥o係街上邂逅o左驚為天人o既潔儀姐姐, 視為夢中情人…萬二蚊亦都出現o左, 佢飾演依家癲o左o既容錦昌哥哥o既夢中情人…咁故事發展落去我諗會係容鍾意萬, 萬又鍾意羅, 羅就鍾意袁…愛情十角錯咁囉…咪就係青春劇o既typical劇情…無無聊聊, 好“荳芽夢”o個隻…但唔知點解又幾好睇喎?!
其實點解叫劇名叫“藍月亮”呢? 純粹係因為當時呢首歌hit呀? 定係另有別情?! 不過就算係純粹因為隻歌hit而改呢個名都無壞o既…起碼可以引起大家注意嘛! 同埋克勤o個期又真係紅透半邊天o既! 至少一響起主題曲個音樂, 都會引起到大家注意…成套劇暫時最搶o既, 我覺得真係首主題曲囉! 一開始o係度“一幽風飛散髮披肩…”已經令你望去個電視度…經典o既歌, 始終都係經典, 尤其係我o地成長階段o既經典歌…難怪克勤可以不停咁唱舊歌, 開佢d “食老本”concert都長賣長有, 仲因此而鹹魚翻生…因為喜歡“老本”o既大有人在…我都係“老本”界o既一大支持者!
多得讀者m o係youtube搵到o既“藍月亮”片頭…估唔到真係有人有keep呢d片仲keep左咁耐…但點解唔早d放上o黎呀? 等到重播呢套劇前先upload…我o地實在係等得太久喇!!!
哈哈哈…個片頭係一張張定格o既相…唔知點解好有當年大紅組合夢劇院o既feel! 真的好八十年代啊! 就咁睇個片頭, 呢套劇裡面又好似真係潔儀姐姐吸引過萬二蚊...唔怪得知劇中羅頌華哥哥情傾佢啦!
同埋, “一生不變”真係好好聽, 好o岩做呢種青春劇o既主題曲…克勤o個期真係好多呢d大熱歌, 熱足廿年…唔睇番都唔知當時佢隻歌真係咁hit…唔怪得知o係十幾年後九唔搭八o既“酒店風雲”, 都要一連幾個occasions唱呢隻歌, 令佢十幾年後無啦啦又熱播過…我記得舊年仲有好多人因為search呢首歌而進入o左我o既日記添!
呢套“藍月亮”仲要突破到每集開場前都搵個不同o既少女出o黎講o下o野, 講o下d少女情懷, 再relate落劇情度…幾騎呢, 但幾得囉! 同埋會扮到好似d點唱環節咁, 懶係點o下歌, 好似話當年仲令到有好多少男少女寫信去亞視點唱添…都幾成功o下!
當年無線就每年有青春劇, 八十年代尾至九十年代初幾乎套套都由克勤擔正…當時o既佢又真係幾適合做呢d青春劇o既主角o既…88年o既“不再少年時”, 89年o既“淘氣雙子星”, 91年o既“浪族闊少爺”, 之後o個d雖然唔係青春劇, 但佢以歌星身份都幾乎每年有一套劇上, 係威囉…果然係無線契仔! 咁佢又青春活力, 又幾精靈, 做戲又唔差, 唱歌又得, 個樣其實都唔錯 (我唔明點解大家唔認同囉…objectively, 我真係覺得佢以前幾靚仔o架喎!)…
tvb 青春劇就俾克勤包辦晒, atv就幾乎係羅頌華o既天下! 雖然佢同克勤無得比…但o係亞視o黎講佢都真係幾適合做呢d青春劇男主角o既! 當年亞視一連幾套青春劇, 都係有羅頌華+袁潔儀+萬綺雯…羅頌華哥哥同潔儀姐姐直頭係螢幕情侶添啦!
睇番呢d“陳年”青春劇都幾搞笑…好typical o個種八十年代feel…亦都同tvb同年代o既“不再少年時”感覺有d相似! 最鍾意就係有好多當年o既街景睇 (呢個亦都係我深夜時份好鍾意睇粵語長片o既原因…但只限時裝o個隻, 因為有好多六七十年代街景)…睇到d舊街道, 商舖十七年後o既變化 (真係估唔到咁就十七年…好恐怖!)…仲見到我成日行o個條中環通去上環o既橋! 同埋仲可以睇番當時個trend…例如d少女會送幸運星俾心儀o既男同學…因為1989年o岩o岩播完“義不容情”, 掀起o左個摺幸運星熱潮!
跟住又會搞o下d聖誕舞會, 影o下d聖誕燈飾…感覺好festive囉! 你知我最鍾意睇呢d校園戲…仲要有埋歌聽o個o下抵死! 除o左好配合個feel o既主題曲, 仲有每集都配好多歌落d劇情度, 好似音樂特輯咁…好o岩年青人! 仲發覺原來o個期好興郭小霖d歌…“夢中見”都播o左幾次!
潔儀姐姐當年個感覺真係好純潔, 好天真瀾漫…萬二蚊塊面包包o地咁, 都幾可愛! 羅頌華同容錦昌哥哥都ok o既! 仲有一個做羅頌華個妹o既細路, 好熟口熟面, 仲有做邊套戲呢?! 嘩, 佢真係超老績, 成個八婆仔咁…但係d戲都做得幾好, 幾自然!
呢套咁係我杯茶o既劇…真係點解當年我無睇過o既呢?! 聽金美姐姐講, 呢套劇係同無線“天涯歌女”打對台…咁唔怪得知啦! 我o個時又好似真係掛住睇松松姐姐o既 “天涯歌女” , 唔怪得知連同時段有套潔儀姐姐o既 “藍月亮”我都唔知啦!
睇睇o下原來呢幾個主角都曾經係兒童節目主持…潔儀姐姐唔在講啦, 容錦昌哥哥我都有睇過佢主持“500飛虎隊”(同“430穿梭機”打對台o既節目)…咁究竟羅頌華哥哥係咪都曾經主持過同一個節目呢?! 我好似有d印象…有無人記得呀?!
好勁呀…o係youtube“藍月亮”o既相關片段之中, 居然見到連我之前提過又無人睇過o既"四驅橋聖"都有...真係令人振奮! 睇睇個片頭, 原來除o左羅頌華同袁潔儀, 仲有張錦程…佢應該又係同羅頌華爭潔儀姐姐啦! 仲有王艷娜同埋仲係童星o既李泳漢添! 哈哈! 睇番呢d片段…真係回憶返晒埋o黎!
初時睇以為upload o個位仁兄係亞視fans, 點知睇埋佢o既其他片段…又"藍月亮", 又"四驅橋聖"又“八婆會館"…仲要全部都係揀o左有羅頌華哥哥o既片段…原來佢係羅頌華fans先o岩!
“藍月亮"真係ok o架喎…如果你係同我一樣鍾意睇青春劇o既朋友…不妨都錄幾集o黎睇o下! 一齊懷緬o下八十年代嘛!
posted by 芒姐 at 11:53 下午
22 Comments:
夢中見好似播左一次咋, 另一隻係迷惘呀~
同埋我想講, 我覺得佢係借用左'橙路'橋囉~
哎呀! 點解D字變晒怪獸? 每次都要轉番Unicode, 好煩呀! 咁樣會令讀者流失架...
同意"m"既講法!!我一睇就覺得抄"橙路"!!所以連名都抄抄地囉!! (橙路v.s.藍月亮), 咁當然係加埋hacken首"藍月亮"好hit所以改個咁既名!!
突然令我諗起另一套抄日本動漫既劇:"樓下伊人" (抄相聚一刻)
睇返久違了0既藍月亮,真係幾OK,萬綺雯都幾得意,不過宜家睇返我會比較鍾意袁潔儀多d!呀羅頌華0係劇中d畫外音有d都幾搞笑抵死,至於演羅頌華妹妹0個位童星都幾精靈,人細鬼大但不失童真,我都覺得佢好熟口面,唔知係唔係做過etv之類0既電視節目呢?
至於開埸前0既類似讀來信和點唱環節,不但止有少女,還有"少男",而且呢個環節仲勁打朦朧鏡頭,好似有d騎呢,但都製造到0個時0個種情懷0既!
羅頌華好似真係有主持過"500飛虎隊",我細個都幾鍾意睇呢個節目,依稀記得首主題曲d歌詞:".......要盡力去做,今天參與飛虎隊,歸隊......終於會踏過崎嶇."
哈哈!連"四驅橋聖"片段都有,勁!呢套我都未睇過,好似幾好睇咁,不過同當年0既四驅車有冇關呢?
袁潔儀響'藍月亮'演得好差, 連眼神都唔知望向邊好咁
monjeh 我今日特登搵舊報紙, 天涯歌女七點半做, 八點半TVB播娛眼, ATV播藍月亮! 可能你好鍾意娛眼??
Why so?
睇完你的日記，我就睇藍月亮，好好睇，屋企人以前睇亞視，我當年都有睇，記得當年好鐘意羅頌華(有D孫耀威feel)，有無人知道佢依家做緊乜呢？我無睇亞視好耐啦。
另外我一路都好鐘意袁潔儀(唔知點解我覺得姓袁的人好靚)，仲記得當年佢同莫家堯拍拖，萬2蚊就同呂頌賢tim
Carman,
係呀係呀, 我都覺得羅頌華有d孫耀威feel...睇番呢套戲, 佢都算幾靚仔, 同埋o係咁多人之中算relatively做得好...其實d男角都做得唔錯, 係d女角演技差d!
羅頌華做緊咩...真係無從稽考喇...可能要o係網上search下有無佢d網頁!
係呀, 我睇呢套劇都忽然醒起潔儀姐姐以前好似係同過莫家堯...亞視真係個個一家親..除o左你提及o個兩pair, 仲有駱達華同同寶珮如, 安德尊同趙靜儀etc...
anonymous+Can't read what you wrote,
sorry, i also have no idea on what's happening...very frustrated...
I just randomly switched my blog to the "beta version" out of curiosity (and blogspot said it's a better version w/ more functions)...but then my blog became like this...and I can't switch back to the original version...perhaps I have to make a complaint to blogspot...
in the meantime, perhaps switching to "unicode" is the only way to deal w/ the problem...sorry for any inconvience caused.
m,
你講得o岩, 我又的確係好鍾意睇"娛眼"...出o左街都會錄起佢...但娛眼唔係得十分鐘咁o既o乍咩?! 咁之後做咩節目呀?
我以為"藍月亮"係七點幾播o既添...呢隻刻種都唔似放八點半線o既...
我都同意袁潔儀o係"藍月亮"入面做得勁差...照背對白, 眼神又遊離..唔知佢之後d戲係咪咁? 反而羅頌華演得ok喎!
Kitty,
睇番發覺同樣作為新人, 萬二蚊係做得好過潔儀姐姐好多o既, 抵佢之後紅咁多! 潔儀姐姐好生硬, 仲有個位無啦啦輕撥秀髮...嚇死我! 不過潔儀姐姐之後做兒童節目好似變o左另一個人咁, 生猛晒, 仲有d巴喳添...同初出道個形象完全唔同!
開場前d少男少女都幾騎呢, 不過都幾有特色o既!
嘩! 你連"500飛虎隊首主題曲都記得咁勁? 其實我有時都會larp o下亞視d兒童節目, o個時覺得d遊戲好玩過無線好多, 仲成日出外景去青龍水上樂園玩遊戲...好鬼勁!
"四驅橋聖"好似真係關四驅車事, 因為o個期好興呢個玩意...但劇情我又真係唔多記得...應該都係同一般青春劇一樣無咩劇情o個隻!
Anonymous,
哈哈...橙路v.s.藍月亮都俾你諗到? 勁!
其實我無咩睇過橙路, 所以不願置評!
樓下伊人邊個做o架?!
”樓下伊人”係鄧浩光同柏安妮做．
講開"500飛虎隊",除左羅頒華同容錦昌做過之外,"藍月亮"入面做萬綺雯好友既吳秀芳同明戀容錦昌既"小花"陳巧儀都係同期女主持.
之後既"德尊老師"真係唔幾多得,所以自此之後我就無再睇亞記既兒童節目.
Oh…咁我記得喇…我都好似有larp過o下“樓下伊人”!
哈哈…我都有見到吳秀芳姐姐…其實o個時睇"500飛虎隊"都比較喜歡佢, 因為佢似o係d好公正, 同埋又比較字正腔圓o個隻!
"德尊老師"我都有睇過o下…比較另類…唔知安德尊係咪想走周星馳路線, 成日懶惡死咁對住d細路! 不過都幾騎呢, 幾好笑o下…o個時都有時不時轉去睇o架!
我都好鍾意睇"藍月亮"架,可惜我唔知亞視又重播所以miss左/ . \,如果我冇記錯,計埋今次,"藍月亮"已經重播左3次,第1次在1993年,第2次忘記了,另外我又睇過呢套劇的原著小說,是友禾出版社出的青春體驗小說系列第3部,作者是劉敏如,可惜而家已經搵唔反,網上面又搵唔到..../ . \,另外我好希望有人可以將成套"藍月亮"upload,因為真係好想睇番....
小山羊,
哎吔! 咁實在太可惜啦...你上網search下有無人upload左啦...好好睇呀!
我都好鍾意羅頌華，真繫好想知道距衣傢過得點啊，點解距無繼續繫ATV呢？真繫希望以后可以再見到距齣來拍戲啊。
【老片回放】1990年《蓝月亮》土豆在线播放（仅供FANS交流）
主要演员：万绮雯 罗颂华 袁洁仪 容锦昌 邓浩光
集数：16
产地：香港
出品：ATV(亚视)
每集30分钟，1990首播，类似丽的当年制作的《青春三重奏》、《甜甜廿四味》等的校园青春剧。
http://www.tudou.com/playlist/id/482972/
FANS
我覺得 500飛虎隊入面主持人,有幾個都好得意,如羅仲華,陳巧儀,羅耀雄,唐品昌,唔知道佢地而家仲有無做電視呢!如果可以重播番就好啦...
我当年就是听到主题曲，就想看，可惜上学父母不让看电视，多得有youtube，感谢科技：）
發佈留言
<< Home