2008年3月5日星期三

3-5(wed) 同事三分親

被人“投訴”我無咩講過“同事三分親”…其實之前都有提過o下, 不過開一個topic講又好似真係無試過…今次一定要講喇…因為上個禮拜係戲肉所在…好好睇! 俾朋友話我咁耐都未追番, 唔同我discuss添呀!

其實一路睇“同事三分親”, 最好睇o個段當然係黃家嵐同言為信啦…等o左一年佢o地終於都o係埋一齊! 其實好少睇黃子雄做主角 (亞視就好似有o既…無綫我印象中只係睇過佢做“真情”鄺美雲個男友, 十年前咁滯, 但佢個樣又無咩變喎…都話男女係唔公平o架啦!)…vincent個角色算係十分討好o個隻, 女孩子夢寐以求o既白馬皇子, 有事業有學問有風度, 仲要樣樣都幫黃家嵐頂 (雖然o係乞兒兜度拿飯食 [literally] 係over o左…不過都係要加強個戲劇效果o者), 仲要咁癡情…所以個個女觀眾都好鍾意vincent…今次佢真係執到支好籌, 有個咁討好o既角色! 係幾乎perfect得滯, 現實世界邊有咁“筍”o既盤, 仲要咁癡情, 暗戀o左黃家嵐廿年! 不過算啦…做戲俾佢“失實少少”…唔好搞到好似“最美麗的第七天”咁“白痴當有趣”就ok啦!

其實有一段時間無追“同事”…因為通常o個個時段好少o係屋企, 咁佢又唔係個個單元都好睇…我個人最唔喜歡睇韋一同湯盈盈o個段…但唔知點解偏偏我每次咁o岩睇到一兩集, 都會係佢o地! 仲有早排田在山同戴菲o個段都好煩…陸哲同彤彤o個段我都麻麻…通常年輕人o個段係最好睇, 但呢套劇出奇地係d中/老生談情反而幾吸引喎! 除o左vincent同黃家嵐, 武紀勇同文丞君o個part都好好笑…尤其好耐之前“四川移動城堡”o個集! 仲有言大哥同小恒都ok好睇!


(同事三分親-信嵐mv@土豆)

嘩! 唔經唔覺佢已經播o左一年, 係舊年3.12開始播o架, 我仲記得o個日一開開3線劇, “同事三分親”, “亂世佳人”同埋 “寫意人生”, 仲有“向世界出發2”添…點解我咁記得…因為上年我寫過呢樣o野…! 又真係估唔到佢一播播足一年, 仲要係似乎仲有得拍落去!

其實舊年一開始睇係俾佢d辦公室政治吸引住…呢part幾好睇, 仲幾寫實…同埋真係學到d o野! 佢o地d office戲同埋親情戲係拍得幾好! 跟住爆出o左一見佢個樣就想笑o既樓華…佢又真係討好o既…到幾個月後我先知道原來係有舖排言為信同企問一齊…其實係直到有一集講武紀勇鍾意o左黃家嵐仲錄o左餅帶唱“喜歡你”向佢示愛, 點知輾轉落o左o係vincent手中, 佢睇完之後嬲爆我先知道原來有咁o既舖排…我真係後知後覺! 呢集又係好好笑! 我直頭係食食o下飯差d噴出o黎!

之前o個十集 (由240-250) 好好睇呀…雖然要上網追番呢套劇比其他劇難, 因為要put effort去跟番每集劇情先去load番自己想睇o個集o黎睇…除o左講到vincent同黃家嵐終於o係埋一齊, 仲加入o左陳錦鴻同蘇玉華 (佢兩個又係有份拍“真情”…對比起十幾年前個樣, 又真係無咩變, 甚至靚o左添!)…佢兩個我都鍾意睇, 加埋關詠荷…幾個都係好戲之人, 難怪大家近期講開有睇咩劇…反而唔係黃金時段兩線劇, 而係“同事三分親”!

關詠荷d戲又真係好得, 尤其d喊戲, 好感動到人…佢同言為信o既感情戲同埋同個仔/奶奶o個段都好好睇 (上個禮拜五o個集“言大哥你專登o黎搞喊我新抱…”又係正!)…真係抵佢做第一屆視后o既! 同埋佢呢期個直髮look好靚喎…40幾歲算keep得好好 (反而佢00年o個期係忽然老o左好多…依家又靚番)! 同埋佢個高清裝算化得幾靚…濃得o黎都可以接受, 反而diana個裝真係化得太行喇 (雖然要代表個角色性格)!

正當呢期睇得最開心之際, 居然唔覺意睇到段新聞, 令我好震驚…因為我之前都無聽過o既…

突然辭演《同事三分親》

香港藝人關詠荷去年2月重返無線出演情景劇《同事三分親》,至今已一年。該劇仍在邊拍邊播,但關詠荷卻突然請辭,並已于農歷新年前停工,令劇中其他演員感覺突然,因而傳出關詠荷被疑再度懷孕的消息。

據悉,平日一收工就趕返家帶女兒的關詠荷,于農歷新年前突然主動提出跟劇中台前幕後的工作人員吃團年飯。而在劇本的故事編排中,關詠荷飾演的黃家嵐將放長假去旅行。大家這才發現,原來“團年飯”是一個告別派對。

對於辭演的原因,關詠荷守口如瓶,她稱只是放假兩個月,會再回來。但是據了解,關詠荷將不會重返劇組,原因不是懷孕,而是為了全力再“造人”;加上無線有意讓其老公張家輝拍攝新劇,如果兩人同時拍劇,就沒有人照顧女兒,故關詠荷決定停工。張家輝接受訪問時也否認太太懷孕:“她停工是想全力帶女兒,希望在女兒的成長期可以有多點時間照顧女兒。”

《同事三分親》的監制羅鎮岳承認,3月中就會播完關詠荷的戲份,他曾挽留過對方,可惜不成功,不過相信此事對該劇不會有影響,“我們會加入新演員,如王喜、徐淑敏等,將繼續拍下去”。


我唔制呀!!!!!!!!!!!!!!!!!!!!!!! 最好睇係佢同vincent o個段o架嘛…仲要係正當大家睇得最開心, 居然收到呢個消息…佢辭演, 可以唔洗睇呢套劇喇…! 無o左黃家嵐, 成套戲失色晒! “加入王喜、徐淑敏”…我覺得係完全彌補唔到囉…oh!!!!!!!!!!!!!!!!!!!!!!!!

同事三分親wiki

17 Comments:

Blogger Amazing said...

Exactly~~~!!! 我又係咁o岩最近早左番屋企,結果日日就係追睇同事三分親(另外果兩套完全無意欲睇,甚至睇到都想即刻轉台/熄電視,真係唔好話「追」喇!)咁o岩又俾我睇到最精彩o既武紀勇+文丞君同埋黃家嵐+言為信兩條感情線(其實仲有阿maymay大佬同doris呢pair都ok),仲要難得地連續幾日交代晒黃家嵐點放低佢個陸堅同vincent開始!唔知係咪就係因為esther要走,所以無線要快o的交代清楚佢地o既關係呢?

7:17 下午  
Anonymous 匿名 said...

係呀係呀,知道關詠荷唔做,勁唔鍾意呀,點解喎!!!!我現在都係只睇這套劇咋。之前有陳錦鴻呢,幾開心呀,點解呀!!!

11:57 下午  
Anonymous 匿名 said...

冇左關詠荷仲有咩吸引力..
佢條vincent條line係好最睇架嘛...

9:32 下午  
Anonymous 匿名 said...

乜關詠荷咁紅架咩?

12:23 上午  
Anonymous 匿名 said...

真係好唔想關詠荷唔做呀~
明明去到最重要關頭家嵐同vincent一齊左架喇嘛
之後都唔會追架喇...無左關詠荷成套戲失色哂
...加王喜同呀徐淑敏喎...
諗下就知差ge遠...
何況我係hk勁多阿姨都話係因為關詠荷先咁出力去追...
我唔濟呀...

2:01 上午  
Anonymous 匿名 said...

haha... 匿名 you must be about 15 years old or under?

you don't know esther kwan is famous? anyone watching tvb series 10 or so years ago would know how popular she was at that stage.

she was the actress to win the first tvb female artist award back in 1997.

i miss her old series. wish i can watch them again.

5:44 上午  
Anonymous 匿名 said...

唉..如果連個主角都唔拍..加入新角色又有咩好睇呢..!!信嵐條線真係拍得唔錯..我又係晚晚都追..

9:18 上午  
Blogger 芒姐 said...

四,

我睇到呢個消息真係由個心到失望出o黎...因為好耐無追"同事", 近期先因為呢段睇番...點知...哎...點會咁o架...仲要已經拍晒, 即係得番幾集睇!

10:18 上午  
Blogger 芒姐 said...

MC&匿名,

re: "乜關詠荷咁紅架咩?"

MC講得好o岩, 關詠荷真係幾紅o架, 即係佢未必有當年的蔡少芬, 宣萱, 張可頤咁多fans,但最支持者層面全廣應該係佢...同埋佢做o既劇真係收視o既保證, 當年o既"醉打金枝", "苗翠花", "陀槍"etc...有d大我少少o既姐姐仲要係90年代初已經因為要睇關詠荷先會睇亞視...

11:37 上午  
Blogger 芒姐 said...

yan,

我初時都奇怪點會咁快就交代vincent同黃家嵐一齊, 因為通常主角o個段都會拖拉到成套劇完先會大團圓...原來關詠荷要離開...依家主角都無o左, 都唔知套劇仲繼續拖落去做咩? 就算加入新角色都係另一回事, 何況加入o個幾個仲要一d都唔吸引...你話繼續叫陳錦鴻同蘇玉華做落去都好d呀...

11:40 上午  
Blogger 芒姐 said...

藍,

咪係...雖然武紀勇同文丞君o個段都幾好睇, 但最主要都係vincent同家嵐, 同埋黃家嵐本身係牽引住好多條線...無o左佢真係無晒意思...點解仲要拍落去?!

11:41 上午  
Blogger 芒姐 said...

敏兒,

呢兩個禮拜對"同事"o既感覺係大起左落...上兩個禮拜超好睇, 跟住一下子就睇到關詠荷唔做o既消息, 仲要話佢o既集數已經拍晒, 播埋3月...好失望呀!

11:43 上午  
Blogger 芒姐 said...

g_amazing,

咪係囉...平時講一兩集, 又做第二條線, 但上兩個禮拜係連續十幾集做佢o地...點知原來係舖排黃家嵐走...真係估佢唔到!

11:45 上午  
Anonymous 匿名 said...

仲有 marco, gary同武紀勇呢個組合都好好睇好搞笑呀~ 同埋我覺得marco同gary o的戲都唔差呀 :D

Janice

11:47 上午  
Blogger 芒姐 said...

Janice,

我個friend又係叫我記得o係呢度力讚o下gary&marco...原來佢o地真係有好多支持者!

1:04 下午  
Anonymous 匿名 said...

完全唔知家嵐走左之後套戲仲可以點做落去
尋日個集講到家嵐覺得信變左好多
唔通會講家嵐係為情出走?.?
同埋搵d新人加入黎...咁唔該都搵d同一個級數ge人呀...我懷疑緊之後ge收視可以keep到幾多...

睇新聞好似話無線會搵張家輝拍劇喎~
好期待tim~
不過如果係真ge話我諗都要到年尾or下年先睇到囉

6:55 上午  
Blogger 芒姐 said...

yan,

哎...我個人認為如果無o左黃家嵐, "同事"已經再唔係"同事"...都無為再keep住個名但變o左第二套劇, 不如完o左佢, 大家留低個美麗回憶咪算囉!

11:22 上午  

發佈留言

<< Home