2005年9月17日星期六

9-17(sat) 妙手仁心3 (下)

“妙手3”終於結局o左喇, 結局o個集其實永遠都係一套戲裡面最唔好睇o個集, 因為總要交代晒所有主角o既下場…一係就老老土土o既happy ending, 一係就死晒d人, 再唔係就以10年前o黎講可能都仲叫有d新意o既open ending作結…但呢條橋已經用到爛晒!

“妙手3”就當然一貫o既“妙手”路線, 唔講俾你聽個結局會點, 要你自己思考…同埋open ending可以留番多d空間拍續集嘛!

呢集d對白其實寫得幾好, 但太長太“翹口杉手”, 一口氣睇未必get到晒佢想講咩, 亦都未必有時間去思考…有時又略嫌太有說教意味!

其實我仍然唔多get到陳豪幾時開始無啦啦鍾意o左廖碧兒…之前可能因為佢係TY個女, 所以mc想靠佢上位, 但之後幾時無啦啦真心鍾意o左佢呢? 定係我miss o左幾集所以跟唔到個flow呢?!

同埋我想話廖碧兒雖然同陳宇琛同年, 但唔知點解佢個感覺大過陳宇琛好多…有d姊弟feel?!

Image hosted by Photobucket.com

其實睇呢套戲都令我有好多疑團…例如, 究竟check到個bb有唐氏綜合症, 俾唔俾墮胎o既呢 (我係指合法地)?! 平時話除o左係強姦或者生個bb出o黎對媽咪或bb有危險, 先可以合法墮胎…定係求其有兩個醫生肯簽名就得呢? 有無人可以話我知?!

仲有, 呢套戲搵o左好多比較“騎呢”o既藝人做d騎呢o既角色!

首先, 最騎呢o既就係搵蔣志光做呀伯, 仲俾朱翁懷疑佢同夏萍姐有染…真係“越級挑戰”! 蔣志光又洗唔洗做到咁老呀?! 仲有, 今次朱翁d戲比起“奪命真夫”時improve o左好多, 幾生鬼o下! 蔣志光其實幾多才多藝o架, 嚴肅又得, 搞笑又得…佢o個時做“男親女愛”簡直笑死我! 但佢最大o既才華都唔係呢幾樣, 而係佢唱歌+作曲+作詞o既才華…佢首曲詞唱包辦o既“相逢何必曾相識”, 真係經典中o既經典! 咁有才華,依家走o左去齋做戲, 仲要做d呀伯角色…真係o徙晒!

另一個久違了o既藝員, 係當年唱“紅太陽”o既劉彩玉…依家佢好似仲有keep住做“都市閒情”, 但做劇集真係無咩睇過!

仲有鄧英敏…佢d戲真係幾屎, 幾浮誇! 做佢老婆o既劉曉彤又係…佢o地都係去返做“歡樂今宵”呢d綜藝節目比較適合…一做d認真o既戲就好令人難受!

唔知點解呢輯咁鍾意去灣仔橋底間delifrance拍? o個度特別好景咩?! 同埋唔該唔好成日無啦啦做兩下yoga, 雖然呢期hit, 但咁好odd囉!

整套劇其實略嫌太慘情, 唔係呢個主角死就係o個個主角病…洗唔洗搞到咁呀?! 始終, 都係 “妙手1”最精彩…可以話係“壹號皇庭”o既延續…好似我之前所講, 鄧特希最擅長描繪中產優皮生活, 我唔再重複又重複喇, 大家可以click入In Association with YesAsia.com重溫一下關於“妙手仁心”o既review!