2007年9月30日星期日

9-30(sun) 請~坐~低~

Oh…原來今晚“超級靚聲演鬥廳”真係重播“支持靚聲王o既就請坐~~~~低~~~低~~~低~~~低~~~~” o個集…好精彩! 笑爆嘴! 幾驚因為聽日係公眾假期會抽起呢個節目呀…咁好睇…好少可重播節目都會每個禮拜追o架嘛! 出o左街都要趕番屋企睇呀…除o左呢個節目, 就只有每年歡樂滿東華“卡拉之星”o個part!

無綫真係勁, 勁就勁在揀o左伍小生o黎主持呢個節目…呢d真係獨到的眼光喇! 一般人一定唔會cast佢做, 但就係因為佢o既“符碌”, 令到個節目充滿娛樂性, 連重播都吸引到我o地一睇再睇! 本來呢個節目就真係無咩特別, cast又弱, d嘉賓又成日重覆, 但係因為有o左伍小生, 真係生色不少…我真係完全為o左睇佢先會目不轉睛地睇呢個節目, 反而d嘉賓唱歌就不太吸引!

佢真係好得, 除o左例牌o既走音, 仲可以keep住口窒窒, 無一句台詞係可以一口氣講晒o既 (佢做危天行時都無咩嚴重o架?!)…仲要唔記得台詞時, 又真係會可以咩都唔o翕dead air o左3秒…真係唔知想點?! 仲有佢o既大無畏“亂咁o黎”精神又真係一大賣點…連“每天愛你多一些”都可以講成“每天多一些”, 隔離阿細契都“O”o左兩o下嘴!

真係好鍾意伍小生, 直頭係大家快樂的根源…I love伍小生…依家一聽佢講o野, 就同一睇到王祖藍個樣一樣…簡直係一見你就笑! 近期再加多個錢嘉樂...事關前兩日睇“色戒”…一見佢出場, 我差d忍唔住笑o左出o黎 (但o個個場口一d都唔係搞笑o既)…唔知點解…可能諗起佢前兩日上“味分高下”亂o翕廿四個樣…真係好好笑! 但奇就奇在居然有好多朋友都話俾我聽佢o地睇呢個場口時都有同樣感覺…不過我相信o係外國放映就無呢個問題o既! 但其實點解呢個角色會搵錢嘉樂做? 佢好似無咩啦間咁…!

真係忍唔住又要睇多次呢段“請坐低~~~”…哈哈哈哈哈哈…你睇馬浚偉o係後面笑到呀…!!!!



又因為睇其他o野, link link o下睇到tvb歷年o既節目巡禮…以前真係會年年錄o架, 因為每年都係o係台慶之後接住播o架嘛! 不過近年都無錄lu…依家過後睇番又真係幾得意!

TVB2002節目巡禮…但好多都係2002年播o既劇, 咁即係2001年台慶之後o既巡禮啦?! 睇番又真係幾得意…好多劇都真係拍時都換晒d人做! “衝上雲宵”真係完全面目全非, 仲有“帝女花”, “我要fit一fit”都係唔同晒人! Oh, 仲有“再生緣”添, 不過呢套已經拍好晒, 只係播番d精彩片段…仲有好多巡禮裡面提過o既劇, 都係無拍過或者無播到o架…



TVB2003節目巡禮…嘩! “戀愛自由式”居然係由阿sa, 阿gill拍方力申, 呢個組合吸引好多啦…後尾點解會變o左bobo, 唐寧同埋“o雪…o雪…o雪…”o既蕭正楠o架?!

“金枝慾孽”本來係蔡少芬同邵美琪! 套“肝膽崑崙”仲騎呢…忽然變o左吳唱k班後生仔! 仲有套“天涯俠醫”…又係唔同晒人! 個巡禮本來有套叫“撞板法術”…好似幾得意呀, 點解無拍到? 仲有宣萱+古天樂套恐怖片“鬼迷心竅”…好似幾好睇, 點解又係無拍到呀?!