11-11(fri) 郭可盈

嘩! 呢期娛樂新聞真精彩!

尋日講開“郭藹明過海搵郭可盈, 話郭可盈個袋好型, 郭可盈叫郭藹明過海改個袋型, 改成郭可盈個袋型。”…跟住今日居然有人笑住咁俾份報紙俾我睇, 佢話:“喂! 好o岩你睇呀…!”一睇個標題:“不滿被叫?台慶老人獎 阿姐扯火同郭可盈死過”…幾好笑o下!

佢夠膽得罪阿姐, 真係無運行! 成日都開口夾著?…當年我覺得張可頤先係得罪人多, 但依家睇睇o下, 原來我曾經好喜歡o既“車匙”, 有時比佢更口沒遮攔! 呢篇關於郭可盈o既“搞笑”報導, 仲同時附帶佢之前同人展開過o既罵戰…又令人記番起兩年前張可頤?o左個女主角獎, 揶揄郭可盈拍戲咁耐無代表作 (咁我又唔認同喎, 百集“刑偵”都算係o卦?!), 跟住郭可盈就反擊話佢“贏o左獎輸o左品”…再加上佢老公林文龍又加把口叫張可頤“勝莫驕”! 呢堆人真係好好笑…好似潑婦罵街咁! 為o左個咁o既“台慶獎”, 每日上演鬧劇俾人睇…不過咁又成功俾佢o地霸o左幾日頭版…又係互惠互利o既!

不過算啦, 雖然話今年郭可盈係大熱門, 其實我覺得佢都可以慳d…佢點同阿姐鬥呀? 同埋就算唔係阿姐?, 我都唔覺得佢個酒店風雲“顧碧琦”值得?囉! 我覺得佢最值得?獎o個次, 反而係97年o既台慶頒獎禮, o個年佢都食到個尾糊有套“刑偵3”…雖然口碑同人氣都唔及“刑偵2”, 但大家都叫做睇開有感情呀! o個時第一年有台慶頒獎禮, 我都好落力咁去投佢一票o架…點知佢同張大勇連最大機會o既“最受歡迎螢幕情侶”都?唔到 (事關佢o地之前幾年都好似o係“壹傳媒”個頒獎禮?到呢個獎…我又覺得以佢o地當時o既受歡迎程度, 係好實至名歸囉!)…無法啦, o個時陶大宇要離巢, 咩獎都無行啦! (我睇到“刑偵3”集vcd, 個封面居然係擺郭可盈同陳法蓉o既大頭; 而陶大宇, 梁榮忠同鍾麗淇都只係靠邊站…明明係主角點知得幅細圖, 配角都不如…就知佢地位不保啦!)



我覺得當年o既車匙就應該?獎…依家就真係唔該晒喇! 當年o既郭可盈, 真係好樣好多喎, 睇番“刑事偵緝檔案”, 雖然佢塊面包過依家幾倍, 著衫又娘過依家幾倍…但就順眼過依家好多倍! 仲要睇睇o下, 佢o係“刑1”個look, 仲好過當時覺得最掂o既“刑2”, 個髮型幾清爽…幾fresh囉! 同埋“刑2”o既車匙變得有d麻煩, 一日o係度發脾四, 有d蠻不講理…真係俾我係張大勇都飛佢啦! 都係“刑1”o個個爽朗高婕討好d!

其實我以前真係曾經幾鍾意郭可盈…但依家佢無論個人定個look都好騎呢, 個樣變晒…成個dodo姐咁款! 個樣好artificial, 係就係瘦o左好多, 但真係好怪…以前靚得自然好多! d牙又唔同晒, 面型又唔同晒…你話佢無整過, 我一定唔信! 頂多信佢係失敗o左!



仲有, 今日larp到一集“刑偵”(只係唔覺意larp到, 因為我o既“私家影院”只係播到第7集)…原來已經做到我o地當年曾經熱烈討論o既一集…第27集! 故事係講車匙同張大勇已經分o左手, 車匙同o左蔣志光飾演o既王維安一齊; 張大勇就同o左carmen一齊…但係兩個人其實仲好心愛對方…跟住呢一集有一幕係講車匙撞車, 張大勇唔知點解又o係現場, 就撲埋去睇佢有無事, 跟住睇睇o下王維安就走過o黎話:“oh! 張sir! 唔該晒…呢度等我搞掂啦!”張大勇就無奈走o左! 跟住去到醫院, 車匙又喊苦喊忽話好後悔同大勇分手…其實佢仲好鍾意佢! 但係張大勇話已經大遲喇 (睇到呢度大家都同聲一哭)…跟住好似有一幕係carmen個阿哥o係酒樓逼大勇同carmen訂婚, 最騎呢係車匙無啦啦衝o左入酒樓間房見到呢一幕…但已經太遲喇!



哈哈! 好記得睇完呢一集後, 大家第二日返到學校係有激烈咁討論呢集o既劇情 (其實當年全港o既人都o係度討論緊…我聽番好多人講話當年都有o係學校同d同學一齊discuss劇情)…上緊堂又discuss, 食lunch又discuss…因為呢集對全港一齊追緊大勇同jessie o既朋友o黎講係好震撼…大家都覺得好慘好慘, 想同jessie同聲一哭!

我記得我當年都同d同學講, 話睇到呢集jessie o係醫院度痛哭, 搞到我個心都“la”住, 直頭睇到我都想喊…你知啦, 我d咁冷血o既人, 好少俾劇情感動到想喊o架嘛 (對上一次, 我記得應該係4年級睇“義不容情”見到藍潔瑛被判死刑, 著住成身紅裙被吊死o個幕)!