2006年10月4日星期三

10-4(wed) 鋒芝戀+蒙面戀

呢期d娛樂新聞都咪話唔趣緻…無啦啦霆鋒同柏芝兩個後生仔居然話結o左婚…其實就並唔係話特別出奇o既, 因為佢兩個不嬲都係神神化化, 忽然戚起條筋話想結婚, 其實大家亦唔應該感到意外! 最意外可能係阿拉姑囉…哭訴話佢個仔同新抱唔俾面佢! 咁又係o既, 如果俾人問起, 居然連個仔結o左婚都唔知, 又係騎呢d! 但佢同四哥一家四口不嬲都無奇不有…又“離婚亦是朋友”, 成日都約埋一齊去我最鍾意hea o既地點…caf? landmark度食tea, 個婷婷又比我更好食懶非, 大學畢業o左年幾都唔搵o野做, 一日就係通街蒲! 所以佢o地都唔可以怪阿謝檸檬成日處事都咁騎呢囉!

即係唔係話唔睇好佢兩個…如果論相襯程度, 佢o地直情爆燈添…無論係外型定係性格定家庭背景, 全部都應該屬於“坐埋一?”o個隻…“天生一對”呢個詞語, 用o黎形容佢o地係最貼切! 當年睇“老夫子”, 已經覺得佢兩個好襯…點知佢o地無幾耐真係走埋一齊!

不過佢o地咁樣忽然間結起婚上o黎, 又真係好似倉卒o左d囉…可能佢o地係plan o左好耐, 但係咁後生就結婚, 仲要佢o地係做娛樂圈喎…如果你話普通做個OL, 26歲結婚都ok o既…但作為明星, 就真係早o左d喇! 就當我黑心, 我真係覺得佢o地似係一年後會離婚o個隻囉…sorry, 我太坦白! 但佢兩個個感覺都係太衝動同埋太不顧後果, 又太火爆o個隻! 係就係好襯o既, 不過其實兩個太相似o既人, 相處落又未必work囉!

仲要一日都俾d相士咀咒, 無o野都咒到有o野啦…什麼“一致狠批必有一死”…真係大吉利是! 俾著我係拉姑都唔贊成呢段婚事啦!



下個禮拜就上o個套“樓住有情人”…興趣不大! 如果得閒都可以睇o下o既, 但o係依家咁多戲要睇o既情況下, 我諗我唔會睇呢套, 因為個cast很不吸引! 吳啟華真係大勢已去o架喇…依家見到佢個look, 只係會令我諗起佢當年拍三級片做o個d變態色魔!!!

蒙嘉慧我係ok o架, 但又唔會係特別喜歡o個隻! 不過佢同鄭伊健o個段“蒙面戀”我又覺得幾ok喎…起碼好過“奪面雙琪”好多! 大眾普遍都好接受佢同鄭伊面, 仲要感到好心涼…雖然客觀地睇, “奪面雙琪”事件鄭伊面o既“錯”係大過好勝gigi, 但係人人都係唔likey gigi多d…好明顯係因為好勝gigi o既attitude, 令到d人又唔鍾意佢, d記者又要寫衰佢…

呢件事其實o係呢度discuss過好多次, 都係唔好再repeat喇…未睇過o既朋友請自行去呢度睇番晒佢啦:

“奪面雙琪”系列


佢做得最錯就係主動去約記者逼鄭伊面公開戀情, 但係同d記者關係又唔係好, 總會俾人篤爆再寫得你衰d o架啦…如果唔係都唔會整o左單係伊面屋企行落o黎仲展示“勝利者笑容”事件, 再有埋“好勝gigi”呢個花朵! 搞到連鄭伊面個金牌經理人林珊珊 (其實究竟係林姍姍定林珊珊呢?) 都俾佢搞到撻o左一次Q, 諗o左條生日party橋諗住幫佢o地補鑊, 點知愈補愈核突…不過呢d都係非戰之罪…係佢個師妹好勝gigi累o左佢!

講開林珊珊…真係不得不讚o下佢! 佢做經理人同埋搞宣傳真係有一手…唔好睇佢人仔細細, 睇o下草蜢俾佢搞到幾有聲有色就知啦…仲有當年o既鄭伊健都係由佢一由捧紅! 其實舊年一篇日記中都有讚過佢, 睇佢做訪問就知佢幾咁醒!

基本上佢成家都係叻人, 你睇o下林海峰同林曉峰平時轉數幾咁快就知啦…雖然我依然唔明林狗點解會鍾意彭bell…不過呢d o野無得解o既, 亦同一般八卦讀者一樣, 唔係好喜歡林曉峰最終拋棄o左曾許下諾言話會照顧人一世o既毀容女友而一個屈尾十娶o左個康子妮 (可能大家唔識佢係邊個…可以話係無線三/四線藝人, 大家應該會認識醜版唐詩詠=江芷妮多過佢!)…雖然話感情呢d o野好難話誰是誰非; 但係作為藝人, 形象好緊要…做第三者始終會好影響人o地對你o既睇法! 而呢個故事亦都教訓d男人, 正如阿lo同佢個好兄弟鄭伊健一樣…唔好立亂許下承諾…尤其係o係廣大市民面前許下承諾! 一旦兌現唔到, 唔止要面對你o既舊愛, 仲要面對全香港七百萬人囉!