8-28(fri) LAUGHING GOR之變節 + 殭屍之緣盡1938

“千呼萬喚”…尋晚終於睇o左"LAUGHING GOR之變節"…感覺似睇無綫d大show如"星光熠熠耀保良"多過係睇緊電影囉...連d茄喱啡都係無綫o既二/三線藝員 (即係一般非電視迷都應該可以o翕得出名o個d)...真係十分"星光熠熠"~~~

睇之前其實已經聽過好多comment…有人話爛得很, 有人話ok…我本身就抱住無咩expectation o既心態去睇…都可以接受o既…因為正如我之前都講過, 睇電視同電影的觀眾層面完全唔同, 睇o既“方式”亦都唔同, 拍攝手法亦都完全唔同…電視劇某程度上係用o黎“送飯”, 你可能一邊食飯一邊睇, 一邊洗碗一邊睇, 而最普遍就係一邊上網一邊睇…所以某程度上, 你對電視劇的劇情或各樣的要求係會低少少…反而係每日追一集同d主角 (+套劇) 建立o左深厚o既感情出o黎先係最重要…而再加上laughing呢個熱潮當時都可算係幾unexpected…係估唔到可以咁誇張!

我覺得當時係天時地利人和的配合, 而最重要係初時你估唔到佢係卧底咁先係一個twist呀嘛 (雖然無幾耐已經俾蘋果爆o左!)...但今次個電影橋段錯在係一開始就一五一十講晒俾你聽佢係“卧卧底”…即係黑社會派佢入去警察度, 警方又反派番佢入去黑社會度卧…卧中卧…太卧喇…好怪! 有時twist呢d o野又係見好就收…呢個卧中卧搞到好奇怪! 最奇怪就係一早事先張揚埋, 咁就無晒神秘感啦!

仲有就係當你發覺全劇有1/3主要演員都係卧底…你卧我我卧你…未免太多…我以為最鍾阿呂慧儀死時都會話: “其實我係wpc編號12345”咁囉…點知佢無!



作為一個電視棈, 我點都要入場對"laughing gor"作出支持o既, 畢竟半年前我都有好落力咁去燒o野俾佢o架嘛...而純粹抱住支持o下o既心態去睇, 其實算幾ok, 但你話好好睇又當然稱唔上啦! 講真, 電視同電影其實又真係幾難crossover o既...當年在電視界紅到踩埋入樂壇再上埋舞台o既"難兄難弟"…一拍電影即刻衰o左就係最佳例證啦...咁"laughing gor"我覺得算拍得好過"難兄難弟"電影版好多o架喇!

加上當你o係大銀幕睇到一個個平時o係“屋企”陪伴你o既熟悉面孔, 又的確係令人幾高興o既…連d差館散仔呀, 黑社會跟班呀, 甚至路人甲乙丙你都可以叫得出名, 又係過癮o既!

除o左主角laughing “gor” (佢話係風水名o黎…一定要係gor而唔係哥, 咁套電影先會收得喎~), 佢女友法拉, 黃秋生, 吳鎮宇, 曾志偉三大影帝, 仲有好紅o既柴九黎耀祥, 似乎會返番無綫o既郭靖黃日華哥哥, 連吳鎮宇兩大跟班都居然係扮o野王李思捷同埋必文敖嘉年, 仲有“o雪o雪o雪”蕭正楠做律師 (有d怪!), 另一個律師係葉翠翠 (仲怪!)…仲有o係無綫差不多做到1.5線的黃德斌都只係o係度行行企企, 同埋最後有一句對白話自己其實係“pc34567”咁囉…仲有個樣長極都唔大o既梁烈唯做laughing條o靚, 又有一jar港男高鈞賢, 袁偉豪 & 其他幾個太快睇唔晒做警察叔叔 (好似仲有呂慧儀個“男友”…即係做“大咕窿”o個個黃文迪做另一大茄…佢o地仲成日同場添)…連tbb大show主持丘凱敏都有份做元彪個老婆…佢o係呢套戲個樣幾靚, 好清麗脫俗! 嘩, “星光熠熠”到呢…你話係咪睇得好開心先?!

而最騎呢o既當然係什麼“四大美人”…除o左呂慧儀之外, 全部都行行企企到唔恨…o係“掌故王”有“傑出表現”o既陳爽今次直情封嘴, 一句對白都無…但原來佢唔講o野, 你反而留意唔到佢! 周美欣有幾句對白, 但好怪…同埋佢真係太高太瘦…完全唔適合做戲/電視…改做model可能會好d! 葉翠翠就多兩句對白…但佢都係算吧啦…! 反而最出位o既係“長腳蟹”呂慧儀…最多對白係佢, 最多發揮都係佢, 同埋佢又真係算做得幾好喎, 個樣寸寸貢咁, 同埋講對白都算進步o左好多…某程度上我覺得佢仲女主角過法拉囉…長腳蟹今次上位有望喇!

同埋其實我想問…黃秋生點解要化個咁o既妝…想表達d咩o架?! 睇佢訪問好似話係阿姐提議佢咁做…但我又真係唔太get到!


laughing gor @ wiki

Laughing gor @ 芒姐再現:

2009-3-20(fri) Laughing哥哥哥哥哥~~~~~~~~!!!!!


2009-3-23(mon) laughing效應


2009-3-30(mon) 學警狙擊大結局


2009-3-1(sun) 學警三部曲

另外, 尋晚o個集“殭屍”真係好好睇呀…本來之前好幾日都係睇o下唔睇o下…尋晚一睇番, 居然已經做到準備回到1938之前一集…即係全集係咁播"原來只要共你活一天”o個集…雖然播o左十九幾次, 但真係好配合個劇情...超正呀! 呢集當年都係勁鍾意...仲有今晚開始o個幾集"緣盡1938", 都係好得o架!

只係無睇幾集o者, 估唔到d劇情去得咁快…明明我記得o個時好似睇o左好耐先到"緣盡1938"呢個單元o架嘛...點知咁快就到! 一晚播兩集d劇情真係去得好快…咁咪好快播完囉?!

仲有之前講白蛇同青蛇大戰法海o個集, 兩蛇個妝真係好正囉...白蛇藍色唇膏同青蛇的青色唇膏加個蛇妝…真係好勁…我真心覺得好得囉!

嘩…“殭屍”真係第一輯最好睇! 無論係d人o既造型, 人物性格, 劇情編排…可能因為係最原始,最簡單, 反而最唔"造作"...到第二輯因為“殭屍”呢個朵已經hit o左, 變成亞記的大製作, 反而某d位係o黎得太刻意...不過都尚算好睇 (至少係因為睇開有感情)...但到第三輯就真係...做爛o左!