3-24(fri) 為食在香港

睇o左2R一篇報導, 其中一part佢o地話發覺鍾意食o野o既人係開心d…呢一點我好認同! 佢o地話試過同自己o既司機做試驗, 發覺次次邀請佢都唔肯一齊去食o野o既司機, 通常都係苦瓜乾d! 咁又真係…好有道理!

我呢期就無啦啦培養o左一舖“掃街癮”, 成日心郁郁想落街篤魚旦, 燒賣, 仲有我最喜歡o既格仔餅! 其實以前都曾經有一排好鍾意食呢d街邊小食 (其實又有邊個唔鍾意食呀?!), 但後來都戒o左呢舖癮…唔知點解呢期又重拾番?!

我都知呢d食物又唔健康又污糟…不過真係好好味! 我發現銅鑼灣大部份檔口都又貴又唔係特別好食…反而7仔d燒賣幾得喎, 魚旦就腍o左d! 最掂係西灣河太安樓…又平又好味…有一檔魚旦只係賣3蚊咋!

o個日o係尖咀食完飯, 11點幾都忍唔住走去買o左個格仔餅o黎食…嘩! 整得勁唔掂, 仲要賣十蚊, 我見太安樓有檔只係6蚊, 仲要整得幾脆! 細細個已經對呢d雞旦仔呀, 格仔餅呀情有獨鍾…我仲成日o係屋企拿兩個羽毛球拍中間夾住d積木反來反去扮整雞旦仔…係咁o架喇, 我o地呢d獨生子女o既自娛能力係特別高!



香港真係美食天堂, 咩都有得食, 仲要又平又正又方便…尤其對我呢d視搜尋美食為終身職業o既人o黎講, 更加係無得頂!

1) 有一間甜品我想推一推, 不過已經唔記得佢叫咩名喇…係有一日無意中行過灣仔見到o既, o係修頓附近一條橫街, 好近大胃王茶餐廳…嘩! 個芒果糯米?好好食…尤其我特別鍾意食芒果甜品(唔關我個名事)! 仲有好多唔同種類o既甜品…又唔洗等位…不過, 唔就腳囉! 難怪銅鑼灣o個d咩發記, 滿記食物其實幾一般, 但仍然一日要排長龍!



2) 呢間長期位列open rice第一位o既“澳洲牛奶公司”…我以前都有去過 (仲撞到未紅o既何韻詩添…記得嗎?), 今次去開佐敦特登去食多次…係唔錯, 但又係無大家吹到咁天上有地下無! 不過d多士同炒旦係最得o既, 價錢份量亦算ok, 難怪長期佔據第一位!



3) 另外一間又係成日有雜誌介紹o既叫“the flying pan” (即係周麗淇o係blog度介紹話超好食english breakfast o個間), o係中環行人自動電梯/差館附近…係24小時, 全日有得食我最喜愛o既english breakfast…但係d食物質素又係無大家吹到咁好, 一般啦! 作為tea又貴得滯 (average70蚊一碟), 晚餐我又會認為唔夠大碟…所以都係不太推介, 試一次就無防! 可能真係因為我o個晚夜媽媽o係網上面睇到關於呢間o野o既介紹, 好鬼餓之下俾佢吸引o左…但係日頭去到又就一般啦! 我諗如果你夜晚3點肚餓想搵o野食, 見到呢間o野會幾高興o既! o個晚仲見到road show個viann, 真人比上鏡靚好多喎!




(無錯…我都好鍾意食三文魚o架!)

4) 仲有一間要推介, 但唔係一間食肆, 而係neway卡拉ok, 尤其係位於銅鑼灣信和o個間…d食物質素係超高呀! Tea我又有食過, 晚餐我都有食過…一樣咁掂! 唔唱歌都可以去食o野, 如果執到支好籌o既話, 仲可以有靚景睇同埋有得打陳年street fighter 2…唔怕失禮講句: 我咁大個人都係第一次玩咋…以前就算去機舖, 我都一定唔會玩街霸, 因為呢種打人game我最屎!


(美味的石頭飯@neway卡拉ok)