2006年5月26日星期五

5-26(fri) 飛短留長父子兵

睇o左個幾禮拜“飛短留長父子兵”…都ok o既! 個劇種係d輕輕鬆鬆o個隻, 又係新題材…講飛髮舖, 都叫有d新意! 仲要介紹一個新景點…赤柱, 講佢新舊兩面! 懷舊o個面…其實都幾吸引呀! 繼上次朗豪坊之後, 又以劇集sell新景點…不過呢招真係幾work o架喎, at least睇完套劇我真係去多o左好多次朗豪坊…哈哈哈! 尤其鍾意搭o個條長電梯…最好佢真係可以聽我講, o係個商場整條大型“sur”滑梯或者好似我最鍾意玩o既西九龍廣場o個個繞住商場頂o既過山車…實可以再增加多d人流!



不過套劇個卡士真係好唔吸引…即使為o左呢期好buy o既鄭嘉穎而睇呢套劇, 但佢d女角真係好唔得! 佢同松松姐姐真係點睇都無辦法覺得襯, 雖然松松姐姐實際上仲細過嘉穎仔, 但感覺真係老過佢好多!

同埋真係sorry呀…松松姐姐, 你個感覺真的很out! 以前你堅持走“玉女中的玉女”路線, 我都可以欣賞你的堅持, 但你堅守“保守+密實”的防線你就繼續堅持啦, 那怕你o既信念在娛樂圈根本就生存唔到…點知搞o左好多年忽然又o黎個“大解放”, 又拍性感照又拍接吻戲…真係o徒晒! 其實你做得藝員又咩都唔肯拍, 當初都俾你紅到都已經好奇怪…點知忽然你又轉性, 搞到人都唔知你想點?! 同埋近年o黎o既你, 比起初出道時o既松松姐姐 (尤其“天涯歌女”時o既驚為天人處女電視劇演出), 簡直係演技+歌藝大倒退, 個樣仲怪o左好多…我都唔知你發生咩事?! 近期重溫o左你o既成名作“天涯歌女”o既精彩片段, 再睇番依家你o係“飛短留長”o既演出…我真係好想同你講…“你發生咩事呀?”



松松姐姐係好唔得, 不過陳敏之更唔掂…唔知點解, 始終都係覺得鄭嘉穎同周麗淇最襯! 不過鄭嘉穎o係呢套劇都無“天幕下的戀人”咁靚仔, 佢都係d頭髮再長d好樣d…我諗呢套劇真係拍o左一段時間, 比“天幕下”更早! 同埋大家有無留意, 佢o係呢套劇又係叫阿朗?!

仲有做陳松伶個妹o個個落選港姐關伊彤, 真係同松松姐姐有幾分似樣, 搵佢o地做兩姊妹又幾o岩…仲有我最唔buy o既劉綽琪小姐 (好彩佢依家終於離開o左無線) 又係做佢最適合o既克人憎角色…真係o岩晒佢! 佢d戲真係咁多年都咁屎!



最搞笑係譚小環同黎耀祥呢對…唔知點解自從睇過佢o地o係“謎情家族”o既“兩人合演一角”演出, 總覺得佢o地係“同一個人”…所以依家見佢o地談情覺得好搞笑! 仲有阿1994年港姐冠軍譚小環小姐…佢真係醜樣o左好多, 近鏡皮膚仲好差添! 唔知點解逢係“4”字尾o既港姐冠軍都有一個共通點…佢同2004年o既冠軍徐子珊小姐一樣, 又係只係選o個日靚o左一晚咁多…當日佢o地都係實至名歸, 但之後睇番你又會覺得超級匪夷所思!



第二線o個套“火舞黃沙”我都仍然無睇, 只係偶然larp到少少, 果然係成套劇都好“黃gum gum”, 好點題囉…唔知點解令人諗起當年o既“怒劍嘯狂沙”?!

oh, 話咁快下個禮拜亞視就上我最喜愛o既“情陷夜中環2” 喇…好期待啊! 但係今集係全新角色, 全新行業…唔做保險, 唔知d主角會做咩呢?!

仲要安排o係近年o既新“台慶日” (注意: 近幾年亞視台慶已經唔再係323, 而係529)播呢套亞視金裝台慶劇…係威係勢咁囉! 不過要同無線套師奶熱捧劇“火舞涼瓜” (呢個名唔係我作o架, from“高朋滿座”…)正面交鋒, 都應該有d危險!