2010年1月16日星期六

1-16(sat) 2009年度十大勁歌金曲頒獎典禮

今年o既勁歌總選, 係芒姐 (亦都相信係大家) 睇過最令人尷尬o既十大勁歌金曲頒獎典禮!

個cast弱過d咩"禁毒滅罪耀北區"之類的細show…真係前所未有! 以前細個勁歌總選係一年一度最期待的大show中的大show, 感覺勁grand, 直頭要推晒所有約會捕o係屋企睇! 一到宣佈最受歡迎男/女歌星, 直情要企o係電視機旁一邊叫囂…個心仔差d跳埋出o黎咁滯!

雖然近十年都已經唔係o個回事 (廚房宣言o個年算係近十年比較好睇的一屆)…但都未至於去到一個咁肉酸o既地步! tvb同hkria的鬥爭…真係兩敗俱傷囉…雖然某程度上, 我覺得tbb傷多d添…今次呢個一年一度大show搞成咁已經係最大例證!

都唔好講話好似80/90年代咁grand喇…呢幾年總選直頭係星光暗淡…但係都未至於人丁單薄成咁囉! 少人到有d尷尬…成個show氣氛都好沉悶, 唔知點咁! 無論係tbb, 司儀, 或者d歌星都好尷尬! 仲要鏡頭一影過去, d吉位多到呢…連胡杏兒都坐第一排 (雖然我都ok buy佢但都係咁話)…我戥tbb好尷尬!



今年最大o既回響…莫過於林峯攞亞太區最受歡迎男歌星獎啦…哎! 我一睇到都心諗…今次無綫真係玩死佢! 直頭係連舊年安排黃宗澤同陳奕迅合唱o既“愛佢變成害佢”都唔係喇, 今次直頭係齋玩佢多d! 雖然你話among今年有份出席o既男歌手之中, 唔俾佢又真係唔知可以俾邊個...咁我寧願你俾十級作狀的古巨基起孖, 又或者頒俾屬於hkria o既tbb契仔克勤or even陳奕迅以彰顯風度都好過咁樣害自己個親生仔!

稍為有腦o既人都會諗到o係今年咁o既情況之下, 你頒個咁大o既獎俾佢會換o黎一個咩o既結果…反正今年任何人攞任何獎都係勝之不武o架喇, 真係唔攞好過攞...尤其係"親生仔"更加應該要避嫌呀嘛...哎! 佢都好慘…正如討論區都有人都講中話佢都係俾人擺上枱, 係tbb同hkria鬥爭下o既犧牲品! 無啦啦又要俾網友話「亞太」=「亞皆老街至太子道西地區」(雖然你又真係不得不讚一下網民的創意...:p)…tbb咁害自己d藝員又為咩呢?

不停收到d sms話今年個頒獎禮真係好爛…tbb真係玩大o左等! 哎, 一個頒獎禮搞到咁肉酸…今年應該cut鬼o左佢好過啦! d人話變成“2009年度英皇十大勁歌金曲頒獎典禮”都真係不無道理~



個賽果就一定係具“爭議性”o架喇…有一半人無玩…你就算俾我考第一都無意思啦!

四台聯頒歌曲奬居然係”地球很危險"!!! 一聽到呢個賽果...我真係覺得地球很危險囉!

連鍾嘉欣都有傑出表現獎, 其實點解又唔分個俾陳總新寵張繼聰呢? 佢o係咁o既情況之下都分唔到半個獎, 都真係好唔俾面!

同埋既然好似鄭融隻歌唔算太hit都有金曲喇, 容祖兒仲要破例有兩隻添…咁應該俾埋金曲獎chi lam啦, 反正佢隻“妳太善良”都ok hit呀!



同埋容小姐件衫…真係恕我又再一次唔識欣賞喇!

亦都估唔到tbb真係咁憎容姨, 勢死要阻止佢破梅姐紀錄攞六連霸…連續兩年無論點玩都係唔俾佢…連今年無晒人之下都勢死唔俾佢! 不過呢part亦都係我所有朋友一致認為最大快人心的, 事關10個朋友之中, 有11個都唔buy佢…佢係唱得好, 但觀眾緣真係差…楊千嬅唱歌係有d危o架喇…但即使唔buy千fa o個d都話好開心佢攞喎!

唔知點解今次頒獎禮個個都唱得差過平時好多, even平時表現好穩定o既容祖兒同王菀之都係咁! 至於呢期好紅o既鍾舒漫…佢以前唱功係ok o架喎, 唔知點解近期有首hit歌成日有得唱, 反而唱得差o左咁多, 每次聽佢live唱“給自己的信”, 把聲都震過貓王, 仲要勁flat…已經唔係要求佢好高standard o架喇…但佢呢幾次o既表現係即使參加“超級巨聲”都會俾人foul o個隻囉…佢搞咩呀?!

同埋我都唔明, 既然都無晒人參加喇…咁應該更加要俾多d機會有出席o既歌手發揮呀…點會仲係每人唱得o個半首歌?! 實在太奇怪!



今年d新人真係超弱雞, 基本上大部份都無人識…徐子珊根本係攞硬, 不過佢又真係唱得異常難聽! 如果要我揀, 佢都係做番高青或者齋跳舞都ok…但千萬唔好唱歌, 佢o既歌藝真係僅僅好過yumiko或者陳文媛等人! 同埋佢話驚無獎攞d dancers會收唔足錢o個part都幾好笑…最好笑係曾志偉窒得佢好應…以為佢有成班dancers啦, 原來得兩個咁大把! 仲有, 佢d fans整o個個橫額有隻tvbuddy都好頂癮o下! Hoho!

基本上今年成個show都好蝦碌, 大家好求其hea過佢就算咁…好流水作業! 係d嘉賓比較吸引!當然, 全晚最最最精彩係草蜢o既演出啦, 係我唯一放低手上o既o野全神貫注睇住電視o既一刻…佢o地o既演出完全同成個節目o既yim悶氣氛形成好大對比…但真係好戥無綫擔心, 無晒現役歌手, 平安深夜show又係咁, 今次又係咁…次次都要靠草蜢出山…靠得幾多次?!

同埋我唔明, 既然都請得太極o黎…點會唔叫佢o地表演番o下?! 實在太浪費!





《 2008 年 度 十 大 勁 歌 金 曲 頒 獎 禮 》 得 獎 名 單

2009年度十大勁歌金曲頒獎禮得獎名單

最受歡迎男歌星:古巨基
最受歡迎女歌星:楊千嬅
金曲金獎:《搜神記》容祖兒
亞太區最受歡迎香港男歌星:林峯
亞太區最受歡迎香港女歌星:容祖兒

最受歡迎新人獎
金獎:徐子珊
銀獎:王梓軒
銅獎:樂瞳

最受歡迎組合獎
金獎: RubberBand
銀獎: 農夫
銅獎: HotCha

最受歡迎唱作歌星
金獎:王菀之
銀獎:側田
銅獎:藍奕邦

傑出表現獎
金獎:鄧紫棋
銀獎:蔡卓妍
銅獎:鍾嘉欣

四台聯頒音樂大獎歌曲:
歌曲:《地球很危險》
作曲: John Laudon
填詞:林夕
主唱:古巨基

最受歡迎華語歌曲獎
金獎:《寂寞先生》曹格
銀獎:《這就是愛嗎》容祖兒
銅獎:《明天以後》林峯、泳兒

最受歡迎改編歌曲獎
金獎:《給自己的信》鍾舒漫
銀獎:《開動快樂》容祖兒
銅獎:《今天終於知道錯》陳偉霆

最受歡迎合唱歌曲獎
金獎:《我的回憶不是我的》泳兒、海鳴威
銀獎:《一刀了斷》張智霖、胡杏兒
銅獎:《戀愛令人痛》鍾嘉欣、韋雄

新人薦場飆星獎:余翠芝

最受歡迎廣告歌曲獎:《雙冠軍》容祖兒

幕後大獎
最佳作曲:雷頌德《就算世界無童話》
最佳編曲:張美賢《如果時間來到》
最佳填詞: Jonny Yim《如果時間來到》
最佳歌曲監製:雷頌德《 Where did you go?》

十大勁歌金曲
《給自己的信》鍾舒漫、《搜神記》容祖兒、《如果時間來到》林峯、《金剛經》何韻詩、《地球很危險》古巨基、《 Here we are》吳雨霏、《二缺一》蔡卓妍、《借》鄭融、《原來過得很快樂》楊千嬅、《可歌可泣》容祖兒

十大勁歌金曲飛躍舞台大獎:草蜢


勁歌金曲@芒姐再現:


2009-1-13(mon) 2008年度十大勁歌金曲頒獎典禮



2008-1-14(mon) 2007年度十大勁歌金曲頒獎典禮



2007-1-13(sat) 2006年度勁歌金曲頒獎典禮



2006-1-18(wed) 2005十大勁歌金曲頒獎禮 (下)



2006-1-17(tues) 2005十大勁歌金曲頒獎禮 (上)



2005-1-29(sat) 2004頒獎禮



2004-1-16(fri) 大迷信, 大迷信, 大迷信1993/2003?!



2004-1-11(sun) 勁歌後記



2004-1-10(sat) 2003勁歌總選



2003-1-5(sun) 2002年度勁歌總選review



2003-1-4(sat) 勁歌總選前奏



2006- 3-26(sun) 時光倒流12年...1993樂壇頒獎禮回顧