2006年5月13日星期六

5-13(sat) 今生無悔十五周年 (上)

見早前大家咁熱烈咁講起 “今生無悔”, 令我戚起條筋走去搵番本超珍藏“今生無悔”特刊出o黎, 回味o下呢套當年我曾經瘋狂追睇o既劇集! 再睇o左好多本1991年o既舊“香港電視”+“大眾電視”…咁o岩睇到, 原來呢套劇係1991年5月13日(星期一)首播…正正係十五年前o既今日…就等一眾“今生無悔”迷o係呢度同套劇慶祝十五周年 (哈哈哈…好無聊!)!

又係一個情意結…正如早前有個朋友同我講, 佢去睇F4演唱會, 除o左係去欣賞佢o地演出之外, 亦係一個情意結…睇到佢o地四年後再一次走埋一齊, 亦諗番起自己四年來o既改變, 所以別有一番滋味! 我極度認同佢呢個講法, 好似之前成日講o既“刑事偵”, 依家十年後睇番, 其實“回味當時o既快樂時光”比起“睇番d劇情”佔一個更重要o既比重…因為你睇到某套戲, 就不期然會勾起好多o個段時間o既好多回憶!

1991年5月13日, 正值final exam, 都話考試期間係會特別投入追電視劇…連廣告汁都撈埋! 同期亞視就播緊另一套我好鍾意睇o既戲 “大提琴與點三八” …又係好好睇…唯有兩邊追! 不過有好劇睇, 其實又可以推動到我更加快去溫好晒d書開開心心睇電視去…所以我覺得電視台播多d高質素o既好戲, 絕對有助學生提高溫習效率!


三年前曾經寫過一段關於“大提琴與點三八”+“今生無悔”o既內容:

“我記得佢首播時咁o岩係考緊final, 當時已經係靠電視節目推動我去讀書o架喇; 所以發現o左夜晚7點有套咁好睇o既戲o既時候, 就迫自己7點前讀好晒d書 (雖然當年讀書都真係幾求其…一邊睇電視, 一邊玩game boy, 再一邊同同學仔煲o下粥…再間唔中望o下本書); 仲記得睇到10幾集o既時候, 無線開始7:30首播更經典o既“今生無悔”…兩邊都咁好睇, 好難取捨呀! 當然, 最後緊係“左右逢源”, 錄o左佢o黎睇咪得囉!”




睇番d舊“大眾”, 有好多期都係有讀者寫信去問究竟 “今生無悔”幾時播…原來呢套劇當年2月已經拍好晒, 但因為無線一路諗住留番呢套超強製作o黎同亞視打硬仗 (依家已經無呢支歌仔唱, 因為亞視自製o既劇集一年都未必有五套)…不過後來等極亞視套“暴雨燃燒”都未拍完, 所以最終都係等唔切, 鐵定o係5月13日首播…“大眾”仲話佢o地特登同無線一齊整o左本特刊…我諗就係我買o左o個本o卦…應該無第二本特刊嘛?! 佢o地仲話當時一推出已經差唔多賣晒…可見呢套劇有幾咁勁!

搞到我都要即刻再咀嚼番當年自掏腰包以港幣38大元o係屋企留下間“ok便利店”買o既“今生無悔”特刊…

呢本o野都可算係珍藏中o既珍藏, 經典中o既經典…雖然keep得唔係幾好, 完全甩皮甩骨, 每頁都diu diu fing (但當初買o左無幾耐已經係咁, 某程度上我覺得本o野有d粗製濫造…但都不失為一本精美o既電視劇特刊)…我為小時候o既我捨得用大部份o既儲蓄o黎買呢本精美特刊而感到驕傲…須知道作為一個小學生o既我, 當時係無咩零用錢, 38蚊已經用o左我成副身家咁滯…但如果我無買到呢本“今生無悔”特刊, 必定會“終身抱憾” !



唔係睇番呢本“今生無悔”特刊, 都唔知原來邵美琪曾經係某周刊選舉o既1990年最受歡迎女藝員第一位…一眾年紀比我細o既讀者, 可能直頭唔知邵美琪曾經係無線no.1花旦, 仲要係紅到呢個地步…大家可能只係會記得佢o係“奪面雙琪”事件後出番o黎拍劇o個個年華老去o既樣…真係歲月不求饒人, 花旦o既壽命係短過小生好多!

不過即使我當年有witness佢當紅時期, 我都唔知佢曾經拿過呢個“最受歡迎女藝員第一位”…我連睇過呢段報導o既印象都無…我諗, 其實我當年係無睇晒成本特刊o既! 無錯, 雖然當時我一買番o黎係拿住本o野“luun”o左好耐, 但我主攻都係黎明同周海媚o既部份…因為當年我係最支持程朗同沈文薏o既…展翹個角色, 就真係好煩又唔多討好囉 (同埋我真係唔多喜愛邵美琪o係呢套劇個“頭盔”頭, 比起“我本善良”個“俄羅斯屋頂”頭更唔得)! 至於高天俊, 其實初段未變奸時真係幾咁年青有為又討好…愛妃even話因為高天俊而入大學時想讀archi, 可見大奸角都有佢o既支持者! 唔知o個時又有無其他朋友睇呢套劇係鍾意睇溫兆倫或邵美琪o既呢?

不過無得講, 個焦點點都o係黎明同周海媚度…畢竟佢兩個先係最主線, 而黎明又確係同海味襯過同邵美琪, 再加上佢兩個o個時傳得鬧烘烘o既緋聞, 更加順勢幫套劇宣傳埋! o個時黎明急速冒起,“人在邊緣”後就呢套“今生無悔”, 再加上歌影視三淒…紅到你行到邊都會見/聽到佢o既蹤影…所以傳出佢同海味拍拖, 佢d fans直頭話要杯葛海味!


(四位主角輪流合照…請留意老黎同發瘟張o個張…唔知阿黎生知唔知個“反v”其實係粗口手勢o黎o既呢? 定係當時仲未係呢?!)

而呢套劇o既最最最主角, 亦當然係黎明…咁佢當時又係型仔o既, 所以成本特刊都係以佢為重點…而我當年睇呢本o野, 亦都係以睇佢同海媚為重點 (同埋我當年一路都幾喜歡海味o架, 尤其係90年“成功路上”時)…所以15年後o係愛上o左“我本善良”之後再睇番呢本特刊, 個approach反而唔同晒!

其實我多年來都無咩點鍾意過黎生…唯獨係o係“程朗”年代幾buy佢囉…其實“藝員”黎明係比“歌星”黎明討好好多…至少我係咁覺得! 佢o係tvb做o個d角色, 其實真係幾唔錯o架… “天涯歌女”啦,“人在邊緣”啦, 仲有另一套同海味合作o既“回到未嫁時”啦…當然, 最討好始終係“程朗”! (不過到佢走紅歌壇後返番無線拍o既“原振俠”同埋“阿sir早晨”…我就不太喜歡喇! o個陣o既佢已經太自覺係一個歌星…好造作!)



本特刊仲勁到有個“人物關係表”列晒所有角色出o黎…連上次提過o既歐陽波比, 師奶殺手張大勇都有晒! 仲有王綺琴, 崔嘉寶, 陳慧儀, 陳家賢, 張靜, 馮素波, 黃愷欣, 許紹雄, 白茵, 關海山, 劉兆銘…當然不得不提o個時我成日將佢同黎耀祥撈亂, 近期做“潮爆大狀”要同童星江麗娜做一對o既陳國邦…呢套劇我覺得佢做得幾好, 幾buy佢個角色! Oh, 仲有第五大主角…當年o既譚詠麟歌迷會會長楊美儀小姐…佢個角色都好吃重o架…居然嫁o左俾“萬人迷”高天俊喎!

仲有o個個其實我覺得比起小柏林更好戲又更靚仔o既小演員英麒 (佢都有份做“柏林週記”, 都係叫“英麒”, 應該係佢個真名!)…佢做黎明個仔又係做得好好, 好得意, 好生鬼, 好討人喜愛…可惜做完呢套戲又唔見o左佢! 依家佢應該好似柏林仔咁入大學喇…唔知呢個小朋友又變成咩樣呢?

當時真係好迷“今生無悔”…仲同個同學仔晚晚傾電話, 將班裡面d同學全部代入劇中角色…好鬼死投入! 不知不覺, 咁就15年…真係令人勾起好多童年回憶…唔知大家又對呢套15年前o既經典之作有咩回憶呢?

(待續)