H-E-J-N-O-M <=> 芒姐再現: 2006年11月17日

2006年11月17日星期五

11-17(fri) 2006翡翠歌星賀台慶+回顧

講完“翡翠歌星賀台慶”, 點都要講埋今年個“翡翠歌星賀台慶”…雖然遲o左兩個禮拜…

因為之前睇(聽)o左個preview, 所以特別期待…但係平心而論, 今年“翡翠歌星賀台慶”其實都幾鬼悶!

係搵到呂方同dodo姐做司儀, 一開場唱番首“天各一方”, 同埋老黎+劉華o既萬眾期待大合唱叫做有番d綽頭囉…其他都驚喜久奉, 同埋個cast都頗弱! 當然不能同十幾年前o既“翡翠歌星賀台慶”比o架喇…但係就算同番舊年比, 個cast都差一截…可能因為舊年係停辦o左七年之後第一屆搞番, 所以大家都比較重視! 今年一開場全部歌星大晒冷, 好似仲弱雞過“歡樂滿東華”!

2005翡翠歌星賀台慶都叫做多d人…今年連無線自己o個四小生 (舊年“男人魅”力谷o個幾個呢…包括林峰, 鄭嘉穎, 陳豪同林保怡) 都無出席 (無線仲要o係同一日自己搞個“我們的世紀金曲演唱會”, 洗走o左林峰同吳唱k…已經人丁好單薄o架啦嘛!), even呢期幫tvb做“美女廚房”o個三個主持鄭中基+方力申+梁漢文都無出, d二三線o既歌星仔好似cookies, 薛海琪, 2R…都全部唔見晒!

係得twins+衛蘭+蘭詩+soler o個段孖仔孖女舞比較好睇, 其他項目都頗悶o下!

個“粵劇帝女花”都有d綽頭o既, 不過要d歌星做粵劇簡直係要佢o地自暴其短…反而係反串o既張敬軒唱+做得最好囉!

(粵劇帝女花@2006翡翠歌星賀台慶)

同埋年年都係搵hocc出o黎代表女歌星隊鬥唱功…仲要次次都係同劉浩龍鬥…應該搞d新意嘛!

最核突我覺得依然係知道佢連頒錦旗俾紅組o個part都練埋…你內定我都預o左, 但可唔可以唔好呢part都rehearsal埋呢?

至於劉華同黎明合唱o個part…坦白講, 兩位都真係唱得幾難聽o下, 而且唱對方o既歌都係完全無o個種味道! 黎明唱“忘情水”已經係唔得o架喇, 但係華仔唱leon隻超經典歌“對不起我愛你”(其實我唔明點解黎明唔揀番華仔o既“一起走過的日子”囉…呢兩隻歌當年打得好勁, 依家咁樣對唱番先有意思o架嘛…“忘情水”都唔係o個回事!) 就更加唔得…真係完全無o個種味道…怪晒囉! 同埋咁難得同台, 你唔係唔合唱呀? 你唔好話我聽last大合唱“朋友”就當係呀? 真係失望晒…tvb捉到鹿都唔識脫角!

同埋佢o地d對話真係唔知想點囉…不過leon o既金句王本色我真係好欣賞! 佢已經比起當年o既“左手又係肉, 手背又係肉”更高層次…依家報紙寫出o黎o個d黎明每日一金句真係笑死我! 什麼「原則會取代默契，默契會產生更多議題」…仲要押韻喎…咁先抵死呀嘛! 佢一定係以前睇得多“蝦仔daddy”!

o係網上search到更多黎明每日一金句…真係“a golden phrase a day, keeps the dog dog team away” (呢句我作o既…芒姐都可以做半個金句王呀…oh, 忘記o左, credit to my idol sammi…)

「當華仔同你講我愛你，你會好開心，當佢唔記得講我愛你，你會好傷心，但記得飲一杯《忘情水》。」

「勇氣呢，就係做一d平時唔習慣做o既o野，但一定要挑戰，挑戰產生樂趣。」

「一時又話我金句王，一時又話黎先知，唔知答邊樣好。」記者笑他今日未有金句時，Leon即笑言：「今日用先知取代金句。」

真係好鬼死鍾意leon…呢d先係答問題o既最高技巧呀嘛…牛頭唔撘馬嘴咁…係唔鍾意答你呀…唔得咩?! D人話佢癲, 我話佢呢d先係最高智慧呀! 答問題, 有時係唔洗到point o既…好笑咪得囉!

雖則話佢o地無合唱真係可惜o左, 不過兩大天王再次聚首都真係有紀念價值o既…佢o地一邊唱仲一邊播番d佢o地多年來o係“翡翠歌星賀台慶”o既經典表演環節! 嘩! 唔經唔覺原來呢個節目已經有15年歷史…真係話咁快! 仲幾得1991年第一次聽到有呢個新搞作時我感到幾咁振奮呀!

其實我覺得最失色係無o左一字排開唱經典歌o既環節…雖然要一個接住一個唱, 又唔知入咩key其實都幾高難度, 但咁先好玩嘛…同埋咁樣個感覺先人材濟濟o架嘛!

等我帶番大家到15年前, 第一屆“翡翠歌星賀台慶”睇o下個盛況啦…

1991年:

最精彩, 最大陣仗o既第一次…你還記得嗎?

呢一段係芒姐o既珍藏, 我最鍾意睇o既第一屆“翡翠歌星賀台慶”…但因為餅帶都好舊, 所以都幾花o下!

OPENING!!!!!!!!!!!!!!!!!!!!!!!!!!!! 全港歌星由譚校長+梅姐帶領唱“stand by me”…o個時華仔都未有得做隊長!“stand by me”又確係o岩呢d咁grand o既場口萬人大合唱o既…好似92年一開場亦都係唱呢隻歌!

好勁呀…人多到呀! 依家全部一係就升o左上神枱變天王天后, 一係就已經消聲匿跡…求其搵一個依家都可以擔起一個show囉…校長, 梅姐, 華仔, 學友, 黎明, 克勤, SAMMI, 安仔, 梁炳, 呂方, 甄妮, 彭bell, 周慧敏, 劉鍚明, 太極, 劉美君, 仲有劉小慧, 黎瑞恩, 海潮, LMF (李美鳳呀!), 蔡立(兒), echo, 黃翊 (原來當年話佢係扮leslie…我真係完全唔知! 睇番d雜誌成日都係咁“dai”佢!), 周影 (到依家去k仍然好鍾意唱佢隻“情路茫茫”…好好聽!), 譚又銘 (成日作日本妹打扮o個個…你仲記得佢嗎?), PP GALS (見到當年仲係叫TINA o既張可頤…好醜樣), 仲有另一隊我成日都提起o既組合FACE TO FACE…相隔空氣 (其實佢o地o係邊度走出o黎o既呢?! 歌唱比賽?! 佢兩個都真係唱得唔錯, d歌亦都幾好聽…可惜可惜…)…太多喇, 數唔晒…你又數得出幾多個呢?!

睇番第一年已經有出席o個d歌星, 有幾多個依家仲o係個樂壇玩緊又仲有出席今年o既“翡翠歌星賀台慶”呢? 好似真係得華仔, leon, 克勤, 呂方, 甄妮姐姐, 同埋阿mr.[火羅]安!

其實我當年咁期待睇“翡翠歌星賀台慶”…其中一個原因係o個年暑假o岩o岩做完“浪族闊少爺”, 所有有克勤同sammi o既演出我都唔會放過, 仲會珍而重之地錄起佢! 但係可惜呀, 本來諗住sammi都算係o個期幾hit o既新人, 點都有得玩番一個半個環節o卦, 點知佢好似o個晚話唔舒服定唔知點, 半路中途就走o左喇…實在太掃興喇! 當年o係大合唱, 佢都係做o下活動佈景版咁…克勤反而紅喎, 都排第一行第三個, 仲勁過黎明!

仲有經典的一字排開晒冷環節…估唔到除o左我仲有人會keep住呢個節目o既帶! oh, 呢一group好勁呀!!! 有克勤, 學友, 許志安, 蘇永康, 譚耀文, 黃翊, 鄭敬基…仲有刑偵李家強!!! 同埋鄭梓浩…好鍾意聽佢同劉彩玉o個隻“一對妒忌的心”o架: