10-19(fri) 徐子珊定官恩娜?!

"雷霆掃毒"原來好鬼多集…咁in general都算ok o既, 但劇情o黎講又係可睇可唔睇o個隻! 但我都會睇…呵呵!

o係網上成日見有人討論究竟如果你係林峰會揀徐子珊定官恩娜, 邊個正d之類…其實林峰o係戲裡面應該揀陳家碧定高希璇我無興趣知…反而我想知現實裡大家覺得徐子珊正d定官恩娜正d? 呢樣我有興趣探討吓! 男同女o既選擇又會唔會唔同呢? 你話平時一個靚一個性感咁我大概會估到個取態…但係佢兩個又基本上都有種sex appeal的特質…咁大家又會點揀呢?

其實佢兩個我都覺得ok正…但如果要我揀一個, 我都係會揀…官恩娜! 我覺得男仔可能會揀徐子珊?! 做個民意調查呀…呢樣我有興趣知道…

至於依然係呢期最hit o既"最佳男主角"…係唯一晚晚要追睇番o既節目! 暫時最好睇依然係劉青雲同黃秋生兩集! 黃秋生直頭自己一個人已經可以係咁講係咁講, 仲幾好笑吓! o係呢個情況之下芷珊姐姐作為主持o既功用其實不太大! 不過佢o既人脗又的確係勁! 成日都話, 人緣好的人…性格一定唔差得去邊! 所以雖然佢唔算係美女, 但咁多人like佢! 我都好like芷珊姐姐!

嘩! 但古天樂o個集真係睇得人好辛苦…佢講嘢好似急口呤咁...終於o個晚全個fb都係呢個comment…古仔, 你好趕時間呀? 哈哈!

呢單好笑…其實我真心唔明點解謙謙可以幫羊兒換到視后？這並不是等價交換…唔好玩啦！我係tbb都唔制啦!

無意中睇到n年前曾post過的黎明金句...覺得好值得repost一次...其實leon佢真心有智慧的...只係你班友仔唔明! 有時答問題的技巧, 咪係在於耍太極囉…耍完又唔得罪你喇…呢d咪最高境界囉! 呢d係名副其實的"眾人笑我太瘋癲...我說他人看不穿!" 勁!

有日睇蘋果見到黃翊的訪問…真係好那些年囉! 我同大部份人一樣, 依然以為佢係同黃寶欣一齊…點知係同咗前亞視藝員陳存正…感覺十分風馬牛不相及! 仲有我想話, 佢哋個仔個樣勁似陳存正! 我search番原來我曾經提過呢樣嘢, 但我居然係完全唔記得咗...可見佢同黃寶欣幾咁深入民心! 呵呵! 黃翊我最記得o既…當然係佢當年同黃寶欣一齊做"淘氣雙子星"…仲有佢首“最愛的妳”我都好like!

都是那些年：黃翊撐起一頭家

上世紀，英國溫莎公爵不要江山要美人，20年前，黃翊也為愛情而放棄歌唱事業。現年44歲黃翊曾是新藝寶力捧歌手，被喻為張國榮接班人，可惜他不顧公司反對堅持與黃寶欣交往而被雪藏，黃翊名字從此在樂壇消失。7年前，黃翊轉行在大埔開大排檔，結果給他絕地翻身。黃翊：「我執枱掃地有乜問題？我為屋企人咁做，我覺得自己好man。」
撰文：戴彩煥

黃翊1986年參加第五屆新秀歌唱比賽，跟黎明和許志安同期出道，雖然當年黃翊空手而回，但有幸被新藝寶唱片公司睇中力捧，88年與李明珠合唱漢城奧運香港版主題曲《一呼百應》，翌年再推出個人大碟，被喻為哥哥張國榮接班人，獲哥哥親自作曲《太陽傘下》，又獲安排唱第一首《龍珠》廣東話主題曲，加上主持無綫《Sunday新地帶》及接拍《淘氣雙子星》等劇，事業發展一帆風順。

哥哥接班人

提起當年「哥哥接班人」稱號，黃翊一味苦笑搖頭：「其實係公司炒作，嗰陣我同哥哥同公司，公司想搵啲嘢畀人講。講真，自己何德何能？呢樣嘢對我唔係好事，係害咗我。哥哥係我唯一偶像，記得有次我睇哥哥演唱會，有fans指住我話：『嗰個咪新簽嗰個囉！超！吔嘢啦你！』我真係無地自容，好醜怪。」

黃翊在新藝寶3年先後出過8、9張唱片，盛傳當年他只顧跟前歌手黃寶欣拍拖無心工作，所以被唱片公司雪藏及放棄。黃翊澄清說：「寫梗係咁寫，阿Lal接手新藝寶之後好睇我，但亦因為佢，我冇得喺呢個圈發展，我拍拖佢好反對，當時我21歲，血氣方剛，第一次拍拖，梗係成個人沉晒落去，但冇影響做嘢，唱片公司要我哋分手，我唔肯。本來我重有年幾合約，但佢突然畀份新約要我簽5年，我唔肯，咪雪藏我。我諗住重有年幾約啫，使乜驚！自己都識好多人，可以靠自己，就係咁諗錯咗，當我合約一完，已經好多新人湧上嚟，啲人話與其畀錢做你呢啲唔新唔舊嘅人，不如做自己一手一腳捧出嚟新人。」

開舖頭重生

冇唱片公司收留，黃翊惟有到內地登台搵食：「呢個世界好現實，冇喺電視出現，就會俾人遺忘，歌酬愈嚟愈少，初初唱一次兩萬幾，一個月唱兩次夠晒生活，但慢慢一路跌到幾千蚊，自己唔可以接受，有人搶爛市，3,000都肯唱，我面皮薄，做唔到，覺得要轉變。三家姐好錫我，大家諗有乜可以搞，幾十年前我老豆喺大埔開酒樓，不如做番呢樣嘢。」就這樣，黃翊與三家姐在大埔墟街市熟食中心開了三小姐海鮮小菜，開業至今七年，生意愈做愈旺。
由歌手轉做大排檔，黃翊沒半點不習慣，畢竟，更難過的日子，他也捱過：「喺內地唱歌遇到好多衰人，啲人嘴臉令你好唔舒服，自己將尊嚴降低，我有捱過，所以當我做呢度我好清晰，我要搵食，要養屋企人，我執枱掃地有乜問題？為屋企人咁做，我覺得自己好man。我冇乜錢，但夠生活，家生活好滿足。」可有興趣復出唱歌？黃翊笑說：「出唱片就無謂啦，但搵我出嚟唱一兩隻玩吓，我都有興趣嘅。」
黃翊跟黃寶欣分手後跟前亞視女藝員陳存正拍拖，05年生下囝囝黃睿，但到今時今日仍有人以為他跟黃寶欣仍是一對：「試過啲客問我個仔：『你媽咪黃寶欣呢？』好尷尬。我同老婆（陳存正）冇結婚，大家一齊開心就OK。」