2-27(mon) on call 36小時

呢期追緊"on call 36小時"! 喂, 又幾好睇喎! 都話Tbb拍有關專業人士的劇, 就算唔係特別好都唔會差得去邊, 有質素的保證! d人話呢套比起之前d醫生戲寫實d…不過咁, 唔知點解個個都係trainee, 搞到我呢d行外人好混亂...以前分houseman, mo, smo咪好清楚囉...搞到我要去問番d醫生朋友邊個係咩rank呢d基本資料先清楚d! 不過佢哋都話呢套真係算拍得幾真實吓...我睇訪問連千嬅都係咁講!

同埋我想話, 楊怡同黃智雯個樣真係幾似兩姊妹...情況同當年cast張可頤同楊怡做兩姊妹一樣!

楊怡同羅仲謙呢一對緋聞男女, 睇落居然又唔算太唔襯喎...其實都幾ok吓! 但我本來以為劇情一定係羅仲謙鍾意楊怡, 然後阿妹黃智雯又會鍾意羅仲謙呢種姊妹三角戀...點知睇完劇情+人物介紹, 羅仲謙居然唔係同黃智雯, 而係同另一個houseman張慧雯...真係估佢唔到! 同埋呢, 套戲真係無啦啦都要佢show吓肌肉o架喎…會唔會刻意咗d呢?! 雖然佢又真係操得幾fit吓!

呢套劇又係好多”超級巨聲”, 不過今次係謝東閔同林景程做得好過之前”潛行狙擊”o既陳康健好多 (sorry, 佢真係完全唔得...算吧啦, 人哋”超級巨聲”你都係俾番佢唱歌吧啦!)...尤其閔大人做得幾自然喎!

Oh, 上星期四深宵開始重播番"學警狙擊"…之前做完”學警1,2部曲”忽然俾"獵鷹"斬開咗, 其實佢就算要宣傳“桃姐”, 一連播埋"學警3”先播"獵鷹"唔係仲啱咩? 斬開佢怪怪咁! 同埋下個禮拜先上“桃姐”, 依家播timing唔係更啱咩?

"獵鷹"呢…初頭都ok, 但睇睇吓節奏真係勁慢, 畢竟係三十年前o既戲…坦白講有d悶! 接住落睇番"學警狙擊"…第一集已經好好睇, 好緊湊! 仲要第一晚已經出晒laughing哥, 孝哥, 天哥…個個都好型! 最頂唔住係江若琳同唱k o個段”小公主”…其他都好得!

至於剛剛大結局的”4 in love”, 我居然只係睇到第四集…實在太慢! 但係無法, 真係好忙追唔切…呢期又咁多嘢睇!

嗰日去腳底按摩, 咁o岩睇到呢篇訪問…其實呢期本身已經對葉翠翠改觀咗d…睇埋呢篇, 又真係覺得佢依家幾識諗喎…所以話, 呢個世界真係沒有無用的經歷! 人生遇到的每件事, 無論好與壞, 對你的成長都一定有幫助! 信我!

************************************

葉翠翠 愛一個上一課

若然人生際遇一定是有得必有失，那麼，葉翠翠○八年遇上內地富商黃有龍之後，便可以寫成以下方程式：

遇上黃有龍 = 勁多傳聞 + 形象變得負面 + 遭朋友離棄 + 被其他藝人落井下石 + 被無綫雪藏

結果，沒多久，她和他分了手；再沒多久，他跟「中國四大花旦之一」的趙薇結了婚，兼有了愛情結晶品，葉翠翠卻只能背着這一切是是非非，斯人獨憔悴。

然而，人總要進步呀，所以，失去了黃有龍後，接下來那幾年，翠翠的際遇方程式反而變得正面：

失去黃有龍 = 懂得自我檢討 + 改善個人態度 + 人緣催旺 + 工作量增加 + 懂得自我調節心理等待真正適合的人出現

因為一個不值得愛的人而付出了如此沉重的代價，當事人今天回想起來，只能怪自己當其時沒有帶眼識人，「我以前拍親拖，就會舂晒個頭埋去，乜都睇唔到！但事隔幾年，我依家只係想搵到一個可以細水長流嘅人，我唔怕等，我會利用呢啲等待嘅時間，去調校好自己嘅心態，做好自己！時間亦證明咗，我咁樣諗嘢個人會開心咗，一切都順利咗同變得好咗！」

我問她，如果可以選擇刪除人生中的某部分，會不會選擇○八年？「其實今日嘅我，都要多謝過去嘅我，我唔希望delete過去，咁樣會冇得同今日嘅我比較，我亦唔會知道，我嗰陣時有幾傻！」

確實是好一個愛情習作。

填充題

葉翠翠不擅辭令，也不懂得把說話包裝，多少也代表了她是個想嗰句、講嗰句的人，也代表了她過往很少接受個人專訪。

「我以前真係好驚做專訪，好驚我講咗嘅嘢，人哋會扭曲晒。真係o架！嗰件事發生嘅時候，我只要講一啲嘢，啲人都可以有十個變化走出嚟，然後將我寫到罪人咁，我每吸一啖氣、做一個動作都係一個罪，真係令我好驚！」

她說的「嗰件事」，是○八年她與黃有龍的一段情。當時有報道以「葉翠翠被內地富豪包養」作標題，結果，單單這十粒字隨即令她形象插水，慘上加慘的是，當時的她為了維護戀情，不能公開澄清，惟有啞子吃黃連。

我問翠翠，當時選擇不公開，是否黃有龍的意思？她即點點頭說：「我唔可以怪佢，係我自己聽佢講，又accept佢咁講，我先唔講出嚟。嗰陣人哋問親我，明明係事實嘅，我只可以講嗰一、兩成，咁人哋咪可以忖測另外嗰八成囉！其實公司都有叫我講出嚟o架，但我都係冇講到，我依家諗番起，我咁樣處理咪唔得囉！將來我唔會係咁o架啦，叫我唔好講呀？好呀，咁分手啦！哈哈哈哈！」

確實很快，因為，這段情最終只維持了短短三、四個月，分手原因在於黃有龍要求她先產子、後結婚，她不肯，他即走，她失戀了，可是外界當時看到的，就只有她忽然變得富貴的生活，加上她主持奧運時傳出她跟其他拍檔不和的是是非非，負面新聞不絕，奧運一過，無綫馬上把她雪藏起來。

「公司都冇話明係雪藏嘅，不過奧運之後嗰幾年，工作量真係少咗好多，未至於零工作，只係間中安排我做吓啲兩個禮拜嘅主持咁囉。搞到咁，我唔可以怪人，我當時的確做錯嘢嘛！」

數學題

感情撲空，工作量遞減，還要承受外界的白眼和輿論，翠翠坦言，○八年下旬的那段日子，是她人生中的低潮期。「我嗰陣日日喊，好唔開心、好唔明白！我諗到好想死！如果地獄有十八層，我當時已經跌咗去三十六層！」

感情亮紅燈後，有嘗試過箍煲嗎？「冇！仲搵佢嚟做乜？咁做唔會覺得更加心如刀割，一下一下咁鎅緊自己咩？我當時只可以選擇自己嚟承受呀！」

當時令她更煩的，是跟黃有龍感情結束後，還有另一個要跟進的手尾——物業。那時有報道說，她自從「被包養」後，即大拿拿以三千萬購入兩個賽西湖單位，其中一個更是一個轉手便賺了逾百萬，有博見報藝人也乘勢加多兩嘴落井下石，笑指她是「股神」。

「呢兩個物業，當每個千五萬。一個只畀咗首期五百萬，包括埋我投資股票所賺到嘅，仲要租畀人嚟供。另一個已經畀佢收返，我同佢講：『我唔想咁醜，你on
top加一百萬，當我獲利套現啦。』當時所謂嘅買家就係佢。我依家講番出嚟，係因為我朋友鼓勵我，佢話我講咗出嚟，起碼還番我一個公道，我亦可以澄清，我並冇擁有到兩個三千萬嘅單位。」

選擇題

直至○九月下旬，黃有龍與趙薇結婚，不夠半年，又證實了趙薇已懷孕。

看到報道，可有難過？「嗰刻係囉。不過好快我就諗通咗：佢（趙薇）不過係一個再紅啲嘅明星，我同佢（黃有龍）係點樣分手，人哋又點樣一齊，都已經過咗去啦，都唔關我事啦！呢個人既然唔係我命中注定嘅嗰個，咁我咪等我嗰個囉！唔係每段感情都可以開花結果o架嘛！」

只是，這幾年來，有關翠翠的感情新聞，男主角都只是傳足緋聞N年的港男高鈞賢，以及去年年初拍《4 in love》時，公開表示對她有好感的劇中拍檔韋家雄。

「追，係有嘅，但試過嗰次（黃有龍那段情）之後，我真係要小心啲去面對愛情呀！我唔想再受傷害，我承受唔到啦！我啱啱先走出陰影，如果我再唔帶眼識人，或者立亂識人、拍拖，到頭來受傷嘅咪只係我自己！」

但那兩位緋聞男士，條件不好嗎？「有時唔係話人哋追你，就同嗰個人一齊嘛，愛情除咗要講感覺，我依家覺得仲要喺拍拖前畀多啲時間去了解雙方，如果對方真係鍾意我，我諗佢唔介意用時間嚟了解咗我先囉。所以我呢幾年我只會盡量去做好自己，改善自己，我唔想拍散拖，我只係想搵真正啱我，可以細水長流嘅人，我好相信當我調節好自己嘅心態後，個天就會畀個適合嘅人我！」

不怕寂寞嗎？「有時都悶到爆燈o架，新年、情人節、平安夜、聖誕、倒數、生日都係一個人，你明唔明呢種感受呀？我都會諗，我係咪衰到咁呢？但跟住我又會同自己講：『如果你係一個好人，自然會搵到一個對你好好嘅人！』我真係信，係你嘅自然你嘅，若果個天真係畀我搵到一個好好嘅人，我真係唔怕等，就算要等三年、六年、十年，都值得呀！」

是的，信則有，不信則冇，道理很簡單。

葉翠翠愛情冇問題

時間是否人生際遇跌至谷底時的最佳良藥，關鍵只在於你懂不懂得自救。

翠翠說，她的人生谷底自○八年起，至一一年才開始有起色。「上年年初，我就有得拍《我的如意狼君》，拍完過咗幾個月，就話拍《4 in
love》，兩套劇個角色都好好，戲份又多，中間又有好多工作，我覺得好開心o架！因為我呢幾年真係不斷係咁自我檢討，不斷咁去改善自己對人對事對工作嘅態度，我覺得真係有人會睇到o架！」

只是，在一切稍為安穩之際，去年十月一次身體檢查，卻驗出了胰臟有個數cm的腫瘤，令她一下子來回地獄又折返。「我當時真係好灰！要做手術，所有工作要停晒，我啱啱先喺地獄走返上嚟，唞到啖氣，點解又要我落返去呢？個瘤係良性定惡性呢？我會唔會死呢？我又唔敢話畀人知，好彩係，我唔係因為乜嘢唔舒服或有乜嘢病徵先發現個瘤，亦好彩係，醫生話以佢嘅經驗，個瘤係良性嘅居多。」

然後，切割手術順利完成，翠翠身體亦無恙了，而且有了更大的得着。「我依家真係冇乜嘢驚，地獄我又去過，生死關頭我又試過，我覺得，人只要做好自己，個天一定會畀條出路我行囉！」

如果她跟黃有龍那段情，是讓她看透愛情的習作，那割腫瘤這件事，應該是一個讓她看透生與死的習作吧！