2006年3月14日星期二

3-14(tues) 楚留香之蝙蝠傳奇(下)之明星篇

睇呢套戲仲發現好多當今“紅星”, 當時只係做茄喱啡…最重戲o個個應該係歐陽震華 (當時仲係好瘦o既歐陽耀泉!)…仲有劉青雲同吳鎮宇做有兩句對白o既茶客甲/路人乙…好一套真人版o既“難兄難弟”!

oh, 當然仲有好多一路大家都未必知佢o地叫咩名o既 “80年代老友記”…好似胡美儀 (依家幾乎每個禮拜o既“超級靚聲演鬥廳”都有佢!), 黃敏儀, 高妙思, 方伊琪, 王允財, 鄧汝超, 虞天偉, 同埋霍潔晶 (呢個本來真係唔識佢, 但因為佢個名同埋個樣都好似我o地一個中學同學, 所以特別記得!)...仲有, 有無人知做蝙蝠公子個隨從o個位仁兄叫咩名呢?

除o左苗僑偉, 其實任達華都幾型呀, 佢做o個個蝙蝠公子原隨雲…令我諗起想嫁入豪門o既袁彩雲!

龔慈恩個粉紅+粉綠色look…令我諗起當年我好鍾意食o既士多啤梨+蜜瓜雪糕蓮花杯…依家好似無o左呢隻兩溝蓮花杯lu!

惠天賜o既中原一點紅…塊面渣到好白, 好核突!

仲有80年代初期最紅童星馮志豐…呢套又有佢, 幾乎o個幾年每套戲都有佢份! 但我最深刻o個套叫“無冕天使”…佢做一個計數好叻o既神童, 主角好似係李司棋! 唔知點解, 佢 o係台上面比賽心算o既劇情, 令我好深刻!

仲有郭峰…唔知點解, 自從“創世紀”之後, 淨係記得佢叫霍景良!

Oh, 當然唔少得做胡鐵花o個個陳榮峻啦…佢o係呢套戲?面都算擔幾重戲…依家佢同高阿嵐(楊盼盼)o個段我反而覺得係全劇最好睇o既! 佢胡鐵花一角真係反而最出囉…但係好似呢套之後就無以為繼…呢期睇番d舊雜誌, 仲搵到一篇“忽週”訪問講關於佢同佢家人…原來佢有一對龍鳳胎!

Image hosting by Photobucket

好記得隻主題曲“笑踏河山”…好好聽! 80年代d主題曲真係特別好聽!

睇呢套戲重拾番80年代好多回憶…例如, 80年代d武俠劇好興易容同埋點穴, 以前覺得點穴好得意, 仲成日同d表哥表姐扮點穴添, 唔知點解依家d戲無呢樣o野o既呢?! 亦都好記得當年首播好似有睇呢套戲o既大結局, 仲好似係禮拜六添 (當然, 呢個我唔sure, 因為當時只得幾歲!)


In Association with YesAsia.com



In Association with YesAsia.com


p.s.原來真係有咁多八十年代的die hard fan屎…我覺得應該成立一個”八十年代視迷會”囉!

3-14(tues) 楚留香之蝙蝠傳奇 (上)

不經不覺, 極期待重溫o既“楚留香之蝙蝠傳奇”已經做o左廿集…好似仲未做完, 咁究竟total有幾多集呢?! 十年無睇過, 初頭o個幾集都覺得依然係咁好睇…但睇到中段, 坦白講我覺得有d悶…點解仲未做完?! 可能因為中段focus唔係太多楚香帥同埋永靖公主…無阿苗同阿翁睇, 又太多枝線, 有d雜亂無章! 又或者係因為十年前重播時遇o岩mock exam時期…每逢考試季節…連廣告呀, 婦女節目都特別好睇, 所以當時每日都好有推動力咁10點幾碌起身睇完先開始溫書…可能因此有o左呢個極好睇o既“錯覺”, 唔記得有一大part係悶悶o地o既!

其實如果喜歡“苗翁配”o既朋友, 未必會最喜歡呢套劇, 因為正如幫ya寫o個兩篇文所講 (如果唔係因為要寫呢兩篇要做research, 我都唔知原來翁美玲一生只拍o左九套戲, 仲要七套都係古裝…而o係1984年, 佢一連拍o左四套戲都係同苗僑偉…“決戰玄武門”就唔係齋佢兩個, 但跟住o個套“天師執位”做情侶檔就非常受落, 所以同年仲一氣過拍埋“生[金秀]橋王”同埋“蝙蝠傳奇”)…呢幾套佢o地合作o既戲當中, “天師執位”就好經典, 不過又係好似“再生緣”o個隻因誤會而追追逐逐, 搞o左廿集到最後先可以o係埋一齊, 睇得人好激氣…而“生[金秀]橋王”就比較有趣d, 鬼馬d…不過其實套套戲都係差唔多班底, 除o左苗翁, 仲有李香琴呀, 秦煌呀 (雖然廿年後o既今日, 仍然有佢o地), 唯一最特別係有師奶殺手張大勇囉! 至於呢套“蝙蝠傳奇”, 因為有太多角色, 佢兩個反而唔算十分多戲!


In Association with YesAsia.com



In Association with YesAsia.com


頭o個幾集幾好睇…雖然廿年前o既製作係就係有時有d粗糙, 但幾有心思…同埋打得好落力, 好逼真, 好過依家o個d戲淨係識搞特技效果…! 第一集一開始講楚留香同幾大高手較量, 有一幕係講佢同其中一個高手o係水池打交…o個度真係好係一個現代o既泳池囉…幾搞笑, 但我鍾意! 之後去o左個排舞室咁款o既地方…幾十塊鏡…好粗糙, 但又係好搞笑!

苗僑偉確係好型…佢做大俠真係不作他人選! 又高大又威猛…當年洪A話佢最鍾意苗僑偉, 我仲恥笑佢, 真係sorry晒! 廿年後做“學警雄心”, 依然咁型…型過晒班年青學警吳唱k, 陳鍵鋒好多! 雖然條眉畫到好鬼戚, 好鬼誇…但都係型! 呢個白衫大俠楚香帥造型, 係佢先襯得起!

d女子o既妝好鬼厚…不過八十年代係咁o架喇! 翁美玲個公主造型唔算特別靚…反而鍾意佢o係“生[金秀]橋王”個千金小姐look…最好可以播番“生[金秀]橋王”啦!

Image hosting by Photobucket

跟住阿香帥身邊o個三位姐姐就真係只認得個樣, 但又o翕唔出佢o地個名o個隻! 睇完銀姐姐“我們的老友記”網頁, 我都只係知道做橙色o個個蘇蓉蓉叫呂靜紅…佢係三個之中擔戲比較重o個個…仲有o係“新?師兄”做過曾華倩二家姐, 應該算係佢o既代表作…原來無線當年搞o個個公開招募王蓉活動 (不過聽聞宣傳成份居多), 佢係四強之一喎, 其餘三強係司馬燕、後來當選亞姐冠軍o既黎燕珊、同埋翁美玲 (資料來自“我們的老友記”…真係唔講唔知, 講完都無人知…呢位姐姐居然可以同另外三位齊名?!

另外兩位藍色宋甜兒(?!) 同埋粉紅/紫色李紅袖 (好高好瘦o個位)…都係夾硬追字幕先知叫劉妙玲同池佩芬, 不過邊位打邊位真係唔多清楚?! 仲有, 發覺今次重播個片尾d字幕無啦啦改o左, 唔同以前o個d…80年代應該係d typical手寫撩草字, 今次重播無啦啦變o左齊整電腦字, 仲加o左句原著作授權“真善美書報社”!

不過呢套劇又係無字幕, 搞到唔可以fast forward d悶位, ff左又唔知佢講咩…可能就係因為咁, 所以某d位都覺得有d悶!