3-14(tues) 楚留香之蝙蝠傳奇(下)之明星篇
睇呢套戲仲發現好多當今“紅星”, 當時只係做茄喱啡…最重戲o個個應該係歐陽震華 (當時仲係好瘦o既歐陽耀泉!)…仲有劉青雲同吳鎮宇做有兩句對白o既茶客甲/路人乙…好一套真人版o既“難兄難弟”!
oh, 當然仲有好多一路大家都未必知佢o地叫咩名o既 “80年代老友記”…好似胡美儀 (依家幾乎每個禮拜o既“超級靚聲演鬥廳”都有佢!), 黃敏儀, 高妙思, 方伊琪, 王允財, 鄧汝超, 虞天偉, 同埋霍潔晶 (呢個本來真係唔識佢, 但因為佢個名同埋個樣都好似我o地一個中學同學, 所以特別記得!)...仲有, 有無人知做蝙蝠公子個隨從o個位仁兄叫咩名呢?
除o左苗僑偉, 其實任達華都幾型呀, 佢做o個個蝙蝠公子原隨雲…令我諗起想嫁入豪門o既袁彩雲!
龔慈恩個粉紅+粉綠色look…令我諗起當年我好鍾意食o既士多啤梨+蜜瓜雪糕蓮花杯…依家好似無o左呢隻兩溝蓮花杯lu!
惠天賜o既中原一點紅…塊面渣到好白, 好核突!
仲有80年代初期最紅童星馮志豐…呢套又有佢, 幾乎o個幾年每套戲都有佢份! 但我最深刻o個套叫“無冕天使”…佢做一個計數好叻o既神童, 主角好似係李司棋! 唔知點解, 佢 o係台上面比賽心算o既劇情, 令我好深刻!
仲有郭峰…唔知點解, 自從“創世紀”之後, 淨係記得佢叫霍景良!
Oh, 當然唔少得做胡鐵花o個個陳榮峻啦…佢o係呢套戲?面都算擔幾重戲…依家佢同高阿嵐(楊盼盼)o個段我反而覺得係全劇最好睇o既! 佢胡鐵花一角真係反而最出囉…但係好似呢套之後就無以為繼…呢期睇番d舊雜誌, 仲搵到一篇“忽週”訪問講關於佢同佢家人…原來佢有一對龍鳳胎!
好記得隻主題曲“笑踏河山”…好好聽! 80年代d主題曲真係特別好聽!
睇呢套戲重拾番80年代好多回憶…例如, 80年代d武俠劇好興易容同埋點穴, 以前覺得點穴好得意, 仲成日同d表哥表姐扮點穴添, 唔知點解依家d戲無呢樣o野o既呢?! 亦都好記得當年首播好似有睇呢套戲o既大結局, 仲好似係禮拜六添 (當然, 呢個我唔sure, 因為當時只得幾歲!)
p.s.原來真係有咁多八十年代的die hard fan屎…我覺得應該成立一個”八十年代視迷會”囉!
posted by 芒姐 at 11:10 下午
19 Comments:
哈哈, 我好鍾意睇馮志豐, 覺得佢好吸引, 我曾經search 過佢d資料架, 不過搵唔到佢d 料
講番八十年代0既劇集, 有好多都印象深刻, 好鍾意, 除左阿翁一堆劇之外, 香城浪子同埋IQ成熟時我都好鍾意 (所以我都鍾意睇莊靜而); 不過其實呢d 劇集我全部都係睇重播, 首播時太細個, 得個幾歲, 同埋父母唔俾我夜晚睇電視, 所以都無機會睇
講開search 馮志豐, 頭先走去search, 搵到...噢~ 原來係佢, 我好鍾意佢細個, 尤其做香城浪子, d 戲真係好掂
係呀...細個o既佢的確係幾精靈! 但又係大個個樣差好遠...好彩佢無好似李氏孖仔咁走番去做電視, 佢做電台可能會適合d!
我都勁鍾意睇"IQ成熟時"...但我係buy鄧靄琳...呢期先重溫多次自己珍藏o既版本! 好cutie! 但睇真d, 發覺鄧靄琳個裝未免太厚!
to芒姐、銀小姐&各位:我真係愛死你o地!!!!!你o地「料」起晒我收收埋埋十幾廿年o既八十年代電視回憶!!多謝阿銀介紹我o黎呢「恕」， 可以有個地方俾我傾呢d話題。我好懶，打字又慢，但係為o左同你o地交流，我會俾心機，多謝大家!!!(打打o下想喊添...實在太感動啦，平時無人同我傾呢d話題，d friend當我怪獸，佢o地又扮細，死唔認係o個個年代o既人)
ok言歸正傳，係呀，係呀，係「挑戰」呀。阿翁+偉仔+陳敏兒+呂良偉呀。我記得劇情係呂良偉鍾意陳敏兒，但係陳敏兒暗戀偉仔。有一次陳敏兒搭電車，見到阿翁同偉仔當街當巷kiss o咼(我記得細個睇o既時候，覺得『嘩!好開放呀!』，同埋佢o地kiss個到係灣仔接金鐘個大水池，而家變到好細個啦。細個覺得認得拍電視劇o既地方，好勁o架!!!)，陳敏兒至接受呂良偉o架咋!!!
阿苗好似已經將藝視賣o左俾人，唔係佢做老闆啦。
我都好想好想睇番「飛越十八層」呀。請問tvb有無重播過呀?又有無出vcd呀?好掛住個句「高『足爭』鞋跌落水」，令我覺得大個o左，係應該搵一個同阿苗一樣，同自己個女人約埋下世再見o既痴心好男人o架!阿苗又再一次影響我o既擇偶條件啦!
重有「無冕天使」呀。我記得當時宣傳呢套劇，好似係K-100訪問過d記者or幕後人員，話記者o既花名就叫「無冕皇帝」，因為佢o地為o左採訪，咩o野地方都去得，好有特權。所以套劇個名咁特別。阿司棋姐又真係無得彈，佢係套劇?面，為o左寫新聞，會勇往直前，咩都唔怕。又肯幫d被訪者。就係因為佢，我o既志願係要大個做記者o架!!!
芒姐，真係要攪個「八十年代視迷會」o咼!我一定參加，難得你o地唔嫌棄我呢個阿婆，肯陪我講咁多年前o既電視經!
如果真係攪「八十年代視迷會」我第一個報名呀。講真，九十年代既劇，唔係唔好睇，但唔係套套都有力量推動我地去追黎睇，唔知大家同唔同意呢?
我都係一個電視精(同事係咁稱呼我)雖然好多都好鍾意，但有幾套重播都一定會睇，有「天師執位」(有靚靚阿翁同型仔三哥)、「都市的童話」(睇親結局都喊到死，果時既朱茵，未被人污染，純過蒸餾水)、「射鵰英雄傳」(又是阿翁)、「十月初五的月光」(有初哥哥呀)、「新紮師兄系列」，你地呢??
差d 漏左，仲有「飛越十八層」
芒姐﹐我覺得你淨係經營呢度﹐同覆你D fans留言﹐真係唔洗番工喇﹗:P
哈哈, 金美姐姐...真係要我代你哭, 你代我覆喇!
「八十年代視迷會」我仲未諗到可以點搞起佢...你有咩提議呀? 唯有大家o係呢度研討o下先! 不過真係好高興知道原來有咁多朋友同我一樣咁熱愛八十年代, 睇電視比我睇得更成"精"...都係o個句: i'm not alone!
仲要係一班咁高質素o既電視迷 (至少行文通順同埋講o野好"籮直"呀)...我就係要話俾世人聽, 沉迷睇電視一樣可以讀得成書, 仲要讀得比人好...我o地要為一眾電視迷平凡...哈哈哈哈哈! (沾沾自喜-ing)
其實嚴格o黎講, 我係屬於九十年代o既, 八十年代我係喜愛, 但所有o野我都只可以靠僅餘o既童年回憶同埋其他人提供o既資料得悉...所以對於真正成長於九十年代o既我, 對呢個屬於我o既年代同樣喜愛...尤其係九十年代初期!
九十年代我o既favorite有成日講o既"浪族闊少爺", "我本善良", "邢偵1&2", "今生無悔", "成功路上", "難兄難弟"...仲有好多好多!
至於八十年代, 我會揀"儂本多情", "生[金秀]橋王, "淘氣雙子星", "鬥氣一族", "義不容情", 當然有"iq成熟時"啦...一時間諗唔起太多, 下次先講!
「挑戰」其實我印象唔深, "灣仔接金鐘個大水池"o係邊o架?! 係咪依家有間pacific coffee o個度?! 好細個area架喎!
我最記得尖東個噴水池鐘同埋海旁d天橋, 90年代仲成日用, 但依家好似少o左...依家多收要有ifc做景!
「飛越十八層」好似幾年前真係有重播過...至於vcd, 真係唔記得出o左未?!
芒姐﹐我邊夠你資料豐富﹐詞鋒銳利丫﹐真係‘Thanks, thanks, thanks, thanks! 芒inca, 誰-能-代-替-你地位’﹗﹗﹗
「飛越十八層」vcd出左好耐啦! 我有!!
講真好多舊劇出番vcd後睇番都覺得有點悶, 可能以前既節奏真係慢d, 又幾多拖戲位。好似「生"金秀"橋王」我好辛苦先挨得完, 好似睇完成套都冇咩主線內容。但「飛越十八層」係而家睇番都覺得幾好睇既!
「挑戰」真係會出vcd嗎? 我等左好耐架啦! 有梁朝偉又有呀翁, 仲要係時裝劇, 講真我唔太喜愛睇古裝, d劇情黎黎去去都係打交同報仇, 時裝劇好睇好多, 又可以睇番當時d時裝打扮同風景呀咁。
睇番明周, 拍挑戰時呀翁已經同呀湯成日冷戰, 所以睇得出當時佢都瘦左憔悴左好多。呀翁遺作應該係「楚河漢界」, 佢客串3集做一個名妓(應該係)。之後本來由呀翁同呀湯主演既「大香港」拍左幾集都要易角重拍, 換左關禮傑同龔慈恩。
"生"金秀"橋王"好難挨﹖乜原來唔係好睇架..我尋日仲晌網上面訂左添 -_-" 仲有邊套苗橋偉既劇集好好睇值得買 vcd 呀﹖有無人睇過個套"天龍神劍"呀﹖好唔好睇架﹖我晌網上面訂唔到呢套 vcd 呀 (話缺貨窩)
By the way, 我細個果陣都好鐘意個套"都市的童話"呀~~呵
無錯,「無冕天使」主角係李司琪, 佢嚮刻入 面好似係做記者架.
不如講下「挑戰」丫, 我好鍾意呢套戲. 不過記得當年套刻播到中途, 翁美玲就自殺過左身. 我細個好鍾意翁美玲架! :~~
to 芒姐；「挑戰」o個個噴水池的確係依家有間pacific coffee o個度。不過以前好大個，銀色o既。後來拆o左再起番而家呢個蚊型版本。
係o咼，「都市的童話」o咼，我都想睇番。
「八十年代視迷會」可以攪放映聚會呀。播d八十年代劇集o既經典場面or大結局。如果可以請到「老友記」做嘉賓，大家都會好開心!!
嘩! 搞放映會又請「老友記」做嘉賓咁勁呀? 我頂多可以幫你o地搵"都市的童話"其中一個主角簽名(哈哈哈哈哈...我講笑o乍! 唔好真係叫我咁做)
"天龍神劍"真係無睇過, 唔知無線有無播過呢?!
"生[金秀]橋王"好悶o架?! 我印象中幾ok o架喎...但認真睇可能已經超過十年前, 唔太記得...但我鍾意佢一人分飾兩角o個兩集唔同裝扮!
銀姐姐呀...係呀,「挑戰」會出vcd, 其他仲有"巨人", "勇往直前", "火鳳凰", "婚前昏後", "天子屠龍"...仲有已經出o左o既 "無頭東宮", "馬場大亨", "大運河", "烈火2" (哈哈...好似有鄭嘉穎, 當年都無留意佢添)...連亞視o既"夜中環"都出埋!
係啦, 我同你一樣都係鍾意時裝劇多d...又bingo喇...原因亦都你差唔多, 同埋寫實d嘛! 但通常d朋友都係愛古裝多d!
寫"挑戰"時搵資料, 都係話當時報章有好多消息話湯翁o既感情有問題, 所以令佢演起劇中同偉仔情海翻波特別入戲...
無錯, 佢遺作係「楚河漢界」, 所以sell呢隻product都係sell呢樣, 但佢好似得好少戲o者!
我記得睇到o既資料話佢o地(湯翁)原本係拍"拆檔拍檔", 但之後搵o左張曼玉做...咩原來"大香港"都係咩?
而之後本來cast阿翁做o既戲都全數俾晒曼玉...但其實佢兩個又好唔同style喎!
但講開套"拆檔拍檔", 我細個都好鍾意睇, 因為又係好似生[金秀]o個隻民初, 仲有賭局, 幾趣怪...仲有三姐妹配唔知三兄弟定點! 而o個兩個妹好似係莊靜而同陳安瑩, 仲要一人一隻色花裙(好似楚香帥的三位紅顏知己一樣)...好得意! 但當時唔知原本係阿翁做o架, 係後尾因為寫"八十年代當家花旦"先research到!
嘩! 唔好玩我啦, 金姐! 雖然我都好喜歡呢隻歌仔!
唔該你呀！係“黃允財”、“霍潔貞”，將人哋嘅姓同名都寫錯埋。:-|
做蝙蝠公子個隨從o個位仁兄叫“許建邦”。
發佈留言
<< Home