3-13(mon) 超級靚聲演鬥廳
有讀者o係留言版問我點睇“超級靚聲演鬥廳”呢個節目…哈哈, 令我更加想再講多兩咀…
其實真係愈o黎愈鍾意睇呢個節目, 因為娛樂性極高…就o黎可以媲美每年一度o既“歡樂滿東華卡拉之星”環節! 本來覺得呢個節目極悶極流, 仲遜色過阿姐個“名曲滿天星”節目好多, 但就係因為佢極度求其, 極度混亂, 咁先反而好睇…你有幾何睇到電視製作o既show可以仲蝦碌過d中學talent show?! 本來一個好悶o既節目, 依家愈睇愈趣緻!
上幾個禮拜講過兩次呢個節目 (fyi, 分別係2-28(tues)“富貴逼人”系列&2-20(mon) 義不容情)…男廳長伍衛國真係一個笑話…但諗諗o下可能tvb搵佢做呢個節目, 就係要增加娛樂性(尤其聽到佢唱歌+講幾句台詞都亂晒籠+講o野都可以講到走晒音)…否則我都諗唔到有咩原因…正如讀者「好驚伍衛國」所講: “佢又土又鈍又走音兼成日食鏍絲” …至於”又老又醜”我就唔太認同喇, 以佢呢個年紀其實算keep得幾好, 亦都係佢成日好proud of o既一樣o野…所以我仍然認為佢應該番去拍戲多d! 佢做主持同埋唱歌係完全…記住係完全…無天份o架!
佢唔止唱歌走音, 連講o野都可以不停走音; 唱隻超簡單“紙船”都可以一連入錯三次拍子…你有無her o架?! 枉你仲敢出o黎唱…真係見到你都可憐! 不過, 唔知點解睇睇o下, 呀伍小生有幾分似似苗僑偉 (sorry呀…三哥, 其實你靚仔好多!)…
個節目本身都係灰諧o個隻…夾硬玩d“龍鳳呈祥賀台慶”男女大鬥法, 但其實每次都夾定男女子組每個禮拜輪流贏! 咁都唔緊要, 呢d皆大歡喜o野好合理, 但係個cast可唔可以唔好咁弱?個節目做o左四次, 有大部份“歌星”都出過兩次…次次都repeat, “將會盲” (佢自己每晚深夜廣告時段都會講一次), 呂珊, 胡美儀, 陳浩德, 連羅敏莊都出o左兩次…唔係無人成咁呀? 次次都重複d人, 咁鬥o黎做咩? (雖然我都明只不過係扮o下鬥) 仲要走d打機k.o.一關又一關o既路線…但係唔好忘記呢堆參賽者比我o地更老餅多廿倍…好odd囉!
今個禮拜其中一個扮o野環節, 搵歌神個大佬許冠英扮歌神…咁都好扮? 咁同搵我阿媽扮我有咩分別? 勝之不武!
反而九唔搭八地搵港姐亞軍陸詩韻o黎唱歌, 幾有新意喎…最surprised係佢都唱得幾好 (至少比我想像中好好多)…上次佢o係唔記得邊個籌款節目扮葉玉卿已經令我另眼相看…今次仲有d刮目相看添 (可能因為同場有歌手出身o既阿rain小妹妹, 但係佢唱得仲差過陸詩韻!)
其實2005年咁多個港姐之中, 除o左由細睇到大o既鄧上文之外, 我就最buy佢 (o個位醜版潘芝莉…葉翠翠小姐真係唔該晒! 仲要同細佢一個碼o既李逸朗傳緋聞, 實在係好好笑!) 陸詩韻做過幾年空姐有d人生閱歷係唔同d…成熟d, 識do d…做“娛樂直播”主持佢都算比較好o個個, 個樣又比較靚, 同埋上年睇佢初賽時做戲都幾ok, 連曾志偉都力撐佢! 呢個有前途!
posted by 芒姐 at 5:33 下午
8 Comments:
見你講得咁高興，都黎講兩句先。尋晚果集我都有睇喎，一睇d 嘉賓，嚇左一跳囉，竟然連港姐都有。我係到諗，究竟係咪因為兩位主持唔夠號召力，所以請唔到嘉賓，還是未出場呢??
你講得o岩，有d 人真係出過黎兩次，我睇李龍基開完演唱會，又會上去多一次。伍衛國真係唱得好麻麻，好在有關菊英頂住，唔知會唔會有一日，阿姐上番去做嘉賓呢??不過呢，果日我同d 行家(芒姐，你應該記得我做邊行)有d 行家話，呢個節目好過阿姐果個，我都有少少覺，阿姐好似太霸氣，而且佢唱得唔係太好。
o下??? 你覺得伍衛國似苗僑偉??? 唔好啦, 我好鍾意苗僑偉o架~~ 三哥型好多~~ 我睇「學警雄心」都係為o左睇佢o架咋, 「人間蒸發」我仲集集追o添~~ 佢真係型過伍衛國好多好多喎!!! 唔好咁殘忍啦!!!
你對呢個節目o既評論真係好funny, 好啦, 我會嘗試用另一個角度去「欣賞」呢個節目o架啦~~ 但係我依舊好怕見到伍衛國o羅!!!
人人都講伍衛國......我就覺得he is a 咪霸，佢臨尾都唔比關菊英講野....係咁不停食螺絲....都唔知佢想點!!!
BTW, 關菊英 is more beautiful than before....and I saw her in real person....really not bad kar!
飲得杯落kar! ^__*
嘩! 估唔到阿伍小生咁多fan屎...簡直拍得住阿型爆嘉穎仔!
to cc...關菊英係keep得幾好, 又唱得幾好...哈哈, 居然"飲得杯落"咁勁? 又簡直超越阿niki!
to「好驚伍衛國」...好啦, 咁唔好咁殘忍囉...咁唔似囉...都係有少少o者! 我都好鍾意三哥, 尤其幫yesasia寫完篇"五虎", 再睇埋"學警雄心"之後, 更加覺得佢超級型! 大俠真係非佢莫屬!
to 敏兒...我當然記得你做邊行, 我都曾經o係一個暑假做過你半個行家! 哈, 我都覺得阿姐太霸道同埋唱得超唔掂, 依家咁人人平起平坐一片混亂幾趣緻呀! 不過可能因為無o左佢, 就請唔到d勁嘉賓喇...唔知關唔關事呢?
呢期伍小生接受訪問(唔記得邊本), 話電視台搵佢做人老豆, 佢唔肯拍嘛 (同夏雨當年 - 9X年時唔肯做中生唔撈無線去左台灣一樣囉). 佢仲話當年扮賈寶玉, 係唯一一個小生擔得到果份氣質, 哥哥都只係拍'紅樓春上春'喎...
to m@linxism:
其實我覺得伍小生講o既可能係真o既, 不過apply to三十年前囉! 佢太留戀過去...不過我驚其實我都係咁...如果唔係都唔會咁依戀八十年代的電視劇...哈!
「佢(伍小生)仲話當年扮賈寶玉, 係唯一一個小生擔得到果份氣質, 哥哥都只係拍'紅樓春上春'喎...」
咁佢即係話自己掂過哥哥啦, 無o野呀?
哈哈哈...我諗佢當年真係紅過哥哥o既, 但sorry, 佢一路停留緊o係三十年前囉!
發佈留言
<< Home