2007年11月10日星期六

11-10(sat) 歡樂今宵團圓夜

禮拜六晚EYT40年o個個“歡樂今宵團圓夜”咁先似番d樣o架嘛…好心一早搞o下呢d聚舊晚會, 睇呢d精彩片段, 見番老臣子咪好囉…搞埋d每晚“再會歡樂今宵”經典再重演環節, 真係搵o黎搞!


(聽番呢個版本o既“歡樂今宵”主題曲, 令人感觸良多, 諗起快樂的童年, 細個時要睇完“歡樂今宵”先肯做功課 [不過呢段日子唔係維持o左好耐!]…都係o個句: 回憶總是美好的!)

真係唔係想話咩都彈一餐, 亦唔係話唔俾你做番呢個咁經典o既節目, 畢竟大家都不得不承認, “歡樂今宵”絕對係香港電史上最經典節目之一, 亦都曾經有一段好光輝o既時刻…但係播o下舊片, 搵d舊人返o黎“歡歡樂樂, 笑笑談談”咪好囉…整咩要搵d新人重演經典片段, 吃力不討好, 有興趣睇“再會歡樂今宵”o既, 都一定係以前睇過“歡樂今宵”同埋愛懷舊o既人, 年青人一定唔會睇…咁大家睇得o既, 都係想睇番d舊片段, 懷o下舊, 見番d舊人…邊個會想睇你d新人阿李思欣, o靚妹, 張美妮etc重新演繹d經典環節先得o架?! d師奶連佢o地個名都未o翕得出啦…!

不過公平d講句, 呢個節目近兩個禮拜真係進步o左, 當然經典再重演環節依舊係悶, 但都偶有佳作…王祖藍扮pizza姐o個集“八卦法庭”幾好笑…佢先係新一代可造之材…好放, 好笑, 基本上係見到佢個樣已經想笑…同埋其實安德尊, 阮兆祥扮o野都唔差o既!

但點都係呢個“團圓夜”精彩d, 因為真係可以見番好多舊人…我就當然係對八十年代o個班特別深刻, 因為o個排睇得最多“歡樂今宵”, 七十年代o個d我真係唔多識…戚美珍, 陳敏兒, 狄波拉, 麥麗虹 (後來叫麥景婷), 吳麗珠, 大姐明, 盧david, money, 葉尚華, 劉雅麗, 江欣燕, english tang, 賈思樂, 吳君如, 曾華倩, 張兆輝, 黎海珊, 陳秀珠…見到好多細個睇開的青春少艾姐姐變成中年女士, 歲月係不留人, 不過大部份以佢o地o既年紀算keep得好好!

見到咁多EYT老臣子又的確係好感動…因為呢個節目總會陪伴過你或我, 甚至你我阿爸阿媽成長…除o左九十年代出生的一群 (八十年代出生但好遲先識睇電視o個批或者都無咩睇過呢個節目o既…), 好唔好彩, 佢o地只有機會睇到97年或者01年o個年翻生版騎呢“歡樂今宵”…又的確已經唔係o個回事!


(90年代的新歌詞版本“歡樂今宵”主題曲)

好簡單一個show, 其實已經可以好令人感動, 唔需要好似“奀星賀台慶”搞咁多花臣呀!

咁多個環節當中最精彩當然係money姐o既軟骨功…原來廿年前佢已經表演過一次, 我細個時又真係未睇過喎, 今次係第一次睇, 真係嘆為觀止…企o係電視機旁邊睇到目定口呆, 名副其實“O”晒咀!!! 廿年前做到已經係勁啦…廿年後你都做到先至超勁嘛! 日日練yoga都未必得啦! 嘩! 我真係有o係電視機前面為你喝采o架! 好勁…衷心覺得好勁!!!

秋官同欣宜兩父女合唱o個段都幾溫馨…同埋揀“天涯孤客”呢隻歌唔錯, 我鍾意! 欣宜個樣真係幾似肥姐…同埋點解佢翻肥番咁多?! 睇番佢同秋官合唱時後面播o既片段又係慘o既…咁多年o黎合照都咩無幾張, 一路都淨係播番欣宜o岩o岩出世佢o地一家三口上EYT o個段片, repeat又repeat…就係得咁多!



救命! 你話我偏見啦…但係阿叻的扮o野功力+唱功真係…哎! 點解每個禮拜都有佢表演一次? 佢扮林子祥真係…我諗你求其搵阮兆祥都扮得好過佢! 戚美珍扮徐小鳳就差好遠, 得喎…佢好似又好樣番d喇喎, 同埋至少唱都唱得好聽d! 點知後尾阿叻又就出o黎一齊唱…破壞晒! 戚美珍唱“風的季節”, 台下d舊同事拍和…好似去o左學校的40周年晚會, 見番d舊朋友好開心咁!

呢d先係精彩節目呀嘛…播呢個show咪有口碑囉…做咩每晚要做“再會歡樂今宵”整臭個朵?! 睇番呢個show感慨萬千, 你細個睇開o個d藝員, 依家個個都有番咁上下…搞到人好想即係去睇番晒八十年代d台慶或者大show, 同依家o個d真係好唔同, 無得比!

不如睇o下呢d經典片段好過啦…

“歡樂今宵”-盧海鵩扮白雪公主…呢個都幾好笑…淨係睇盧海鵩個樣已經笑死…有無人知係邊年o架?! 就算係扮七個小矮人o既都做得幾好…同依家d藝員比, 根本就唔係o個回事, 以前d EYT藝員o既喜劇感同臨場反應都差好遠, 仲有d幕後班底都強好多…依家真係亂咁o黎!



仲有呢段…翁美玲玩遊戲@歡樂今宵”