H-E-J-N-O-M <=> 芒姐再現: 2012年1月8日

2012年1月8日星期日

1-8(sun) 2011年度十大勁歌金曲頒獎典禮

嘩! tbb個總選, 真係一年比一年亂o黎…即係咁, 亂o黎都算, 但你真係不能亂q咁o黎…累死d得獎者! 當然, 你可以話邊有咁易累得死? 咁的確係無咁易會死o既, 但係會俾人笑o架嘛…同埋無必要俾佢咁玩! 你又會話, 咁俾人笑吓無所謂, 有獎好過無獎嘛! 如果講到咁…是但啦! 哈哈!

但你睇吓d得獎者個樣唔係O嘴就係呆咗…你話搞咩呀? 其實勁歌總選搞到咁…不如摺咗佢算啦! 今年居然淪落到由紅館跌番去電視城…廿年來都未試過? 點解陰公成咁?! budget真係緊到呢個地步?! 仲有我見d歌星坐o係d梯級形物體坐得好辛苦囉! 同埋今年星光真係嚴重暗淡, 要靠d超級巨聲阿林師傑呀, 胡鴻鈞佢哋撐場…好懷念四大天王年代的總選!

所以話tbb無咗志雲係最大的損失...四大都係靠佢破冰, 仲要無咗佢之後真係亂q咁o黎到呢...哎...!

今年最吸引依然係d表演嘉賓…達明, 張信哲, 葉蒨文, 克勤…嘩! 好耐無見過達明一派! 但唔知點解聽到佢哋唱"石頭記", 我反而會諗起盧海鵬同阿燦首"壽頭記"..."聽遍了~冷冷清風~吹D打~未夠~鞋踏破襪濕透~~~" 搞到我即係想睇番"撻成一塊"o既"壽頭記"囉...hoho!

oh...李克勤唱”一生不變”又係堅好聽囉!!! 佢一出, 加埋首"一生不變"一出...後面o個d根本可以一齊收皮! 莎莉又係寶刀未老! 狄易達同boyz一開口唱"信自己"...笑咗!

最受歡迎男女歌星就完全估到啦…斷估唔會真係好似網上消息話係chi lam同關心妍呀! 不過下年就唔知喇…但係可能要宣佈係關菊英咁關心妍先會出o黎囉..哈哈!

亞太女…嗱! 我絕對係ok buy ivana的, 但係你頒俾佢會唔會九唔撘八咗d…真係下年求其一個出席o既女歌手你都可以考慮頒俾佢! 咁你其實又即係玩緊佢! 搞到以後d歌手唔敢出席你呢個本身已經係十級星光暗淡的頒獎禮!

好鍾意ivana個O嘴遊魂樣…好明顯佢同大眾一樣…大惑不解!

至於峯峯首”chok”攞金中金…我都唔再講喇! 哎…tbb其實係咪真係咁憎自己d親生仔女…一次又一次咁捉弄佢哋!

有朋友話點解今年最hit o個d"那些年"呀, "那誰"都無晒影…哎! tbb連自己出品真心hit的"年少無知'"都可以唔入圍…你就知tbb幾咁funny啦! 可能下年佢哋先攞金曲金獎呢…反正2010年o既作品”天梯”tbb都係今年先頒獎俾佢!

同埋點解今年連利孝和夫人宣布金曲金獎呢個經典場面都無埋? .勁歌真的已經完全不再勁歌!!!

同埋我想話tbb真係對阿崔建邦十分不離不棄, 無論佢犯幾多次錯, 都一定會繼續捧番佢上神枱…tbb同唐詩詠一樣咁癡情…崔波波果真有運行!

不過其實志偉+草蜢+伍姑娘都好齊腳啦…駛唔駛咁多人? 同埋伍姑娘點解唔唱晒成首”失落於巴黎鐵塔下”? 當年呢首“La Tour Eiffel~~~La Tour Eiffel~~~”真係唱爆k場…一首好歌!

我想講…我真心支持欣宜囉! 佢唱歌真係好得, 更重要嘅係佢呢幾年真係脫胎換骨…好成熟得體! 由佢初初出道的十級造作, 到幾年前肥姐追思會的成熟大方表現, 仲有呢幾年睇到佢不斷努力, 仲要戒晒d作狀...我真心欣賞囉! 完全唔似佢個年紀! 抵撐!

嘩! c allstar唱歌又係堅好聽囉!

嘩! tbb居然頒個組合金獎俾草蜢而收咗twins一個皮...當年草蜢最紅時, 反而無奬攞...真抵死!

容祖兒o個句咩感謝容祖兒的完美演繹真係呢…笑咗! 佢想點呀? 同埋佢哋恥笑陳偉霆o個句高登金句”而我不知道陳偉霆是誰"o個part又係好笑...同埋, 你頒個“唱作歌手銅獎”俾佢又係咪玩佢呀? 豬肉也不是這樣分的!