H-E-J-N-O-M <=> 芒姐再現: 2011年12月11日

2011年12月11日星期日

12-11(sun) leon x u 演唱會 + 歡樂滿東華2011

對上一次睇老黎演唱會, 已經係16年前, 即1995年…本人仲係"少女芒"的年代 (呢個名真係好令人嘔吐…hoho)!

老黎佢呢…其實我從來無真係話好迷過…like就有o既…係遠古到佢仲o係tvb做上位小生…"今生無悔"的年代…到佢做咗四大天王之後, 我只係一般佢! 但當然, 無論你有幾咁like或唔like佢, o係我哋個黃金年代, 黎明o既歌係hit到無人會唔識! "抬頭望雨絲, 夜風翻開信紙~", "多麼想用說話留住你, 心中想說一生之中, 都只愛你…為何換了對不起~~~", "用最孤獨的心換最換最溫柔的愛~~~", "是我的我的寶貝親愛~~~'…

而我最深刻o既, 係一首唔算最大hit的歌…"some for you, some for me~~~" (sorry, 呢個係我當年作為一個小朋友聽到佢的英文發音interpret出來的歌詞…原來老黎係唱緊"song for you, song for me~~~"o既"夜夜夢中見"! 真係即刻想唱番句: "傾心初戀使我痛恨從前一首好歌將我一生改變~~~"…聽聞佢o係演唱會已經好少唱呢隻! 今次係有播到, 但無唱到! 跟住仲要播番d 90年代佢出席活動或同fans影o既相…有一幅o係d好似運動會咁, 佢d fans整晒大布幕印住黎明字樣…真係令人諗起中學sports day的interhouse competition!

黎明呢d九十年代icon, 真係無論你鍾意唔鍾意佢, 佢一開聲就帶我我哋返美好的九十年代! 所以佢今次一開場就唱"對不起我愛妳"絕對係一個good move…畢竟呢隻真係令佢o既事業起飛之作 (我又要再提多次…呢首係tbb第一首"勁歌推介", 當年日播夜播播足兩個禮拜!)...91年行到邊都會聽到呢首歌...經典到唔知講咩好! 一聽到個前奏已經帶咗你返去美好的童年!!!

佢哋話佢今次多咗d勁歌熱舞, 以老黎個人咁hea o黎講, 算好落力! 正如kelly話齋: 估唔到佢可以跳得咁高! 仲有佢源源不絕的金句…真係呢, 笑死你無命賠! 雖然其實佢只係理q得你鍾意o翕咩就o翕咩…但呢種率性我欣賞!

最緊要係佢d金曲加埋佢啲fans過咗廿年後雖然都變晒熟女(包括我本人)或auntie, 但依然好落力地叫囂…見到leon行過o黎係咁揮手+好lum地叫leon…我彷彿好似睇緊"天與地”咁…望到佢地個樣忽然flash back番去佢哋廿年前的少女"阿may"look…o個一刻覺得好神奇, 好感動囉!

不過佢仲有好多經典歌好似"oh!夜" , "相逢在雨中","儍癡癡", "我會像你一樣傻", "兩心知", "我來自北京", "我愛ichiban"無唱囉…我始終都係最buy老黎初出道時o既歌!

仲有, 雖然我好buy李思捷, 但佢同阿喱未免出得太多太耐喇, 仲有個公益金問答環節實在無聊到極點…同埋最尾握手位repeatedly唱咗10次"我的親愛"之後, 個show居然忽然完咗, 連last一場都唔肯出o黎encore, 又的確係令人失望! 老黎真係老黎…好有性格! 但呢個安排真係唔得咗!

最後…我想話…我忽然醒起佢當年的暱稱"天濛光"…依家已經無咩人記得呢個名…雖然佢都以呢個名作咗兩首歌, 其中一隻係"我的感覺"~~~但依家, 大家只記得佢叫老黎或者金句王! hoho!

當然要講埋一年一度的"歡樂滿東華"….實不相瞒, 我居然連星期六做東華都完全唔記得…可見佢依家o係我心目中的重要性…係喺街食食吓飯, 睇電視見到做大show, 仲以為係o個d咩"禁毒滅罪耀葵青"…點知原來係一年一度+我曾經好熱愛的大show"歡樂滿東華"…都真係愕左一然! 原來人的熱情真係會一下子減退得好犀利!

本來對每況愈下的"卡拉之星"無咩期望, 尤其禮拜六晚已經凍到"籬"咗o係個被竇度差d瞓著咗…點知忽然間見到家燕媽媽同佢一jar fan屎整齊排列, 仲要係跳"信者得愛"! 咁yo…即刻成個人彈番起身! 家燕姐呢d勁歌熱舞真係無得頂! 忍唔住要講句: 家燕姐好嘢!

睇咗今年"卡拉之星"頭三位, 又好似覺得好睇番! 雖然"卡拉三寶"只係得番王維德, 無咗令人好興奮o既魯振順同王俊棠! 但呢幾年李鴻杰都算成功補上o既! 佢同王維德雖然唱同跳到甩晒beat…但睇得出十分有heart, 又叫晒d朋友o黎伴舞…都算好有娛樂性! 要讚!