12-18(tues) 兩妻時代

好耐無睇黃金時段的電視劇, 套“兩妻時代”差唔多做完, “建築有情天”都做到第三個禮拜, 我兩套夾埋都唔知有無睇過5集! 唔係話佢唔好睇, 而係夜晚好少o係屋企, 又無錄影機…居然可以幫我戒o左少少呢舖追電視劇癮! 依家每晚必睇o既, 反而係深夜的“妙手3”! 雖然兩年前先力追過, 但“妙3”的確係幾好睇, d對白寫得幾好, 而且d主角全部我都幾buy (唯獨係吳啟華同黎姿o個段真係麻麻)…依家進入結局篇仲好睇, 而且個時段fit晒, 返到去沖完涼舒舒服服坐o係度睇呢d劇就最perfect喇!

“兩妻時代”同“建築有情天”都有試過唔覺意larp到兩集…其實都唔太差! “兩妻”入面bobby同湯盈盈+toby o個段可以唔洗睇, 完全無興趣…反而有日唔覺意睇到陳芷菁同黃浩然o個段, 又出奇的ok, 同埋初期講“如果愛”幫d人相睇/大變身有時都幾好笑!

今次話連收視福將歐陽波比都俾兩位女角拖累, 收視仆直…之前佢無論拍邊個, 都係戰無不勝o架嘛! 真係估唔到toby同湯盈盈有咁大影響力!

阿toby小姐最錯就又係被捧得太快, 夾硬俾佢做女主角, 仲要係有老豆撐腰, 咁你未做大家已經會戴有色眼鏡睇你…再做埋就更加唔洗講! 其實女生宿舍年代我幾buy佢, 唱/跳都ok…不過做戲就一般啦…新人o黎講又未至於d人講到咁一文不值o既! 但慘在無觀眾緣, 咁你做咩都係唔得o架喇…同埋捧得太快, 少不免會令人反感…情況同“愛將三人組”-amigo, honey, 貽興王一樣! 再加埋你係藝人下一代靠老豆上位…又係另一“死罪”…今次真係愛佢變成害佢喇! 佢可以點翻身? 我未諗到…或者你幫佢諗o下啦!

湯盈盈第一次執阿“狐妮”二攤做女主角, 點知收視就仆直, 睇o黎都唔會有下次喇! 湯盈盈其實我係ok buy佢, 睇佢做訪問個感覺好sincere, 好謙卑, 同埋佢兩年前做李笑好又真係好估佢唔到, 直頭係睇o左成集都認佢唔到…係後尾上字幕先嚇o左我一跳! 可惜紅o左一陣又跌番落o黎…真係時也命也…同埋真係不得不承認, 佢的確無咩“一線格”…佢係做配角時, esp. 狐狸精的角色反而搶好多…sorry, but that’s the truth! 今次佢做主角真係怪怪o地咁, 當然, 我個人會prefer睇佢多過郭羨妮o既!

至於“建築有情天”…真係只係larp過一集多d...睇過o既朋友話ok好睇, 可惜我未有太多機會睇! 但有楊怡我都幾ok, 方中信雖然老o左好多, 但依然仲有d型o既…雖然我都係最buy佢十多年前同關詠荷做o既“廉政英雌”!

原來今個禮拜開始深夜3點幾重播“都市的童話”…應該係一晚播兩集o個隻! 我都有d期待睇o架, 雖然其實呢d太童話故事式o既劇又唔太係我杯茶 (sorry, 朱茵小姐更加唔係我杯茶)…但畢竟我由始至終都無試過好認真咁睇一次 (雖然我都知佢重播過好多次), 首播時每晚要去練歌無得睇, 到下午重播時又唔係特別想睇, 但到o左依家咁多年後, 反而又想睇番! 或者要到禮拜五同埋下星期d公眾假期先得喇!

畢竟“都市的童話”都係好多90年代年青人心目中o既童話故事, 所以好多我o地呢個年紀 (或者再細少少) o既朋友好鍾意睇…所以我又去學人集體回憶o下囉! 同埋最正係老黎首主題曲“傻癡癡”…真係好夢幻咁! 但唔知點解呢首歌當年好似反而無入到季選, 可能因為要俾同期的“原振俠”主題曲“原你今夜別離去”, even好似無咩大hit過添…但其實我真係覺得好好聽喎!

仲有呀, 上個禮拜臨放工時間收到我舊秘書小姐的電話, 話o係佢公司樓下見到林峰, 可能拍緊o野定點…咁我放工無耐即刻走去煤氣燈o個條街八o下啦, 點知已經唔見o左 (雖然仲有d人o係個lobby度好九唔搭八地drinks reception..?!?!?!)…oh, 我o地又緣慳一面喇!