3-25(sat) 譚校長+朱樂言舊視評之...《同撈同煲》邊個扮得似？ (2005-04-23)

嘩! 星期日下午tvb會播哥哥+梅姐+曼玉o既經典電影"緣份"...雖然3年前哥哥逝世時都特登買o左隻特別版"緣份"vcd, 返到英國仲即刻播o黎睇...但係我呢d電視精總係覺得係電視睇係另有一番感覺o既! 呢個要睇番喇...當係紀念哥哥o係4月1日逝世三周年嘛! 套戲就不能話好好睇(劇情-wise), 但確係好經典, 尤其o個隻主題曲! o個場什麼"緣份遊戲", 睇到都想笑...同埋曼玉真係幾靚, 亦同哥哥好襯!

o岩o岩睇o左"娛樂直播"有一段譚校長接受淑梅姐o既錄音訪問, 剖白佢同老婆shirley+"紅顏知己"wendy o既關係...嘩! 聽完只係想講句: "無賴中o既無賴!"(下年勁歌總選利孝和夫人應該對住佢講: "無籟"!)...自己做錯事仲話個老婆一日淨係不停咁鬧鬧鬧, 個紅顏知己就點好點好...真係戥佢老婆慘! 等佢仲成日自問正義之士, 上年"車震"時件又學人教訓賤男梁榮忠...其實咪係五十步笑百步, 你同個第三者連仔都生埋, 明顯你仲賤d...唔怪得之佢都唔敢點認真咁教訓賤男啦! 最抵死係無線播呢段校長錄音時, 仲配以校長+賤男o既一段片...明顯係諷刺佢兩個"坐埋一?"!

o係"勁歌"聽到阿姐同kelly合唱o個隻歌...嘩! 難聽到呀...點解搞d咁o既o野?!

尋晚睇soler訪問, 開始明白點解佢o地紅得咁快...的確係又靚仔又唱得...可惜我真係一d都唔buy洋人! 仲有, 今晚o既鄭敬基訪問...佢簡直係不老的傳說呀, 令我諗起當年唱"anita, anita..."o既佢...嘩! 原來佢個仔已經16歲! 個訪問仲搵埋佢仔女上o黎...真係好似3兄妹咁! 男版林珊珊呀!!!

繼續朱樂言...呢篇又係絕! 笑死我! 雖然我唔鍾意睇呢套戲, 但上年首播時都有睇o左兩下, 仲有睇埋呢篇抵死視評, 好似仲有o係呢度講o左兩o下添!
---------------------------------------------------------------------

《同撈同煲》邊個扮得似？

---------------------------------------------------------------------

嘩，乜似成咁？不是扮得似，是抄得似。

無論大橋、包裝、賣點，兩男配兩女的方程式，《同撈同煲》都恍如《難兄難弟》的翻版。[芒按: 中晒!]

兩男必定一精一呆，第1集必定相認，然後必定住板間房，同屋共住，艱難搵食，《難》劇集中片場搞笑，《同》劇當然亦步亦趨，熟口熟面片場戲不時穿插，但?免抄足百分百，所以加個花露水廠點綴，不過「工廠妹萬歲」是寶珠的首本名曲，胡杏兒扮的鄧碧雲又不太吻合，唯有做做?轉賣粉果，舞臺點混亂，總之七十二行有得同撈自然同煲，鄧寄塵有難，新馬仔自然去救，鄧碧雲自然同情，林鳳有理無理都要刁蠻，意料之中的關係，好笑與否見仁見智，不過此類刻種要成功要廣受注目，決定因素只有一個---究竟扮得似唔似先？

兩男水準不足

珠玉在前，《難兄難弟》的李奇與寶珠，都是一個神話。當年的羅嘉良是長劇殺手，剛剛在《天地男兒》喪盡天良，轉頭又會呂奇上身，無論聲線及動態都維肖維妙，與《92黑玫瑰對黑玫瑰》的梁家輝可謂一時瑜亮；張可頤更神奇，一直不大起眼，忽然全身充滿陳寶珠細胞，造作卻不礙眼，甚至歌舞連場亦可應付，從此一仗成名，奠定姐級地位。[芒按: 又係中晒!]

郭晉安最厲害的武器是觀眾緣，喜劇其實不大擅長，阿旺跑出，全因角色設計夠童真夠可愛，今次扮新馬仔，外形輸蝕，瘦不了3個碼，唯有頭髮加點Gel，聲線語氣儘量模仿，不過阿旺實在太深入民心，聲線一變就似阿旺，傻更更有餘，新馬仔味道卻不足，幸好角色好人一個，扮不似，也不難看。

馬國明一直浮沈，這一次決定盡地一煲。一出場令人嘩嘩嘩，五官擠壓，身體扭曲，對白抑揚程度得人驚，一字記之曰「誇」，當然，鄧寄塵窒口窒舌特色一定保持，但太多硬滑稽大動作，看得多便容易疲累。新人要令人留下印象，這確是方法，或許小孩子觀眾也會看得開懷，卻不是我的一杯茶。[芒按: 中中中!!!]

胡杏兒最具光芒

4位主角，最突出的是胡杏兒。

鄧碧雲特徵不多，絕不易扮，難得她不慍不火，只是裝裝胸，將聲線適當壓低，加點60年代說話語氣，便自然而然似到十足，肯定她背後做過大量功課，最難得是戲味不失，感情流露清清楚楚，胡杏兒做戲本來有點過火，但于《流金歲月》扮弱智妹或這一趟全力模仿，卻又恰到好處。生得一副妹仔樣，卻能扶搖直上成?姐仔，她的成功並非僥倖，全靠努力不懈去搏取觀眾認同。《同撈同煲》首周收視高開31點，胡杏兒功不可沒。

江芷妮亦值得欣賞。扮林鳳，可發揮的地方不多，她便乖乖的循規蹈矩，扮?聲?，企?丁字腳，刁蠻時刁蠻，不去刻意搶戲，但一切稱職，總勝過一些躲懶的甘草，像陶三姑或者梁醒波有何難扮，為何朱咪咪及秦煌只做回自己？

所以，默默耕耘的艾威，值得我們鼓掌。

艾威是最佳綠葉

只是同屋共住，戲不在他身上。

但艾威無時無刻都交出成績，石堅的口頭禪，*人的眉梢眼角，凶巴巴的身體語言，從來沒有鬆懈。難得的是，喜劇感自然流露，比起喜劇老手黎耀祥太過擠眉弄眼，手法更高明一籌。

可惜戲實在不多，飾演關德興的羅莽又差幾皮，火花無法擦出，但請不要氣餒，有麝自然香，他的努力遲早有回報，就像今時今日的許紹雄、夏雨，甚至鍾景輝，一樣有機會當主角。

艾威，你夠唔夠「蔔」等落去？ [芒按: 呢個都同意...原來艾威真係有咁多fans!]