2006年7月18日星期二

7-18(tues) 2006香港先生

遲來的視評…終於睇番錄o左成個禮拜都未睇o既“2006香港先生選舉”…今年o既質素真係差到無人有, 仲差過上年好多! 今年d “先生”型又唔夠又型, 高又唔夠人高 (仲矮過d香港小姐), 但係搞笑又唔夠人搞笑喎…最好睇依然係d女士們o既瘋狂舉動! 我覺得d女性其實就並唔係真係睇得咁興奮, 只係借題發揮…平時壓抑得太耐, 搵d機會o黎叫囂o下o者! 玩番d男人唔得呀? 不過舊年已經見識過, 所以今年無咁有新鮮感!

今年真係無舊年咁有娛樂性 (雖然d男士o既pose依然頂癮), 個冠軍黃長發個樣都真係唔多掂, 成個傻仔咁…除o左個樣, 佢講o野一樣咁白癡! 佢阿哥 (即舊年個落選“佳麗”黃長興) 都好樣過佢好多!

舊年冠軍高鈞賢+今年個黃長發同埋陳智健@2006香港先生選舉 (當然特別係要留意伍姑娘個衰樣):



佢阿哥黃長興@2005香港先生選舉:



今年無舊年咁好睇, 舊年又無98年亞視o既港男選舉咁好睇…創意呢d o野, 都係亞視掂過無線好多, 天馬行空o既“殭屍”系列就係最佳例子, 仲有港男同埋不限年齡o既亞姐選舉呢!

1999年第二屆香港男士競選面試精華…o個屆冠軍係杜挺豪! 不過已經遜色過戴展國o既第一屆好多…o個屆真係笑爆咀, 當時錄o左拿去同d同學仔重溫依然覺得咁好笑!



唔知點解男人參加呢d選舉總會俾人好cheap o既感覺, 女人你又唔會覺得咁cheap o架喎 (可能都會覺得有d cheap, 但程度上差好遠)…呢個論點上年討論過喇, 唔再多講, 大家可以睇番上年o既:
“2005香港先生選舉”