2007年1月13日星期六

1-13(sat) 2006年度勁歌金曲頒獎典禮

又到一年一度o既“勁歌頒總選”, 對我呢d電視精同埋樂壇頒獎禮fans o黎講, 都算係一件盛事…當然就無以前細個咁addicted to it, 唔出街特登坐o係屋企望實個電視機啦!

曾志偉一開場o個段對白講得好o岩, 今年可以話係咁多年以來最少歌手出席一次, 以前勁歌總選真係好勁o架…星光熠熠, 係每年一度o既盛事! 個個返晒屋企, 條街都無咩人…依家就已經無人睇喇!

勁歌話咁快就25年…我覺得全個show最正o既安排, 就係搵番咁多年來o既勁歌主持出席, 勾番起好多當年佢o地陪伴我o地成長o既回憶…勁歌, 真係由細睇到大…回憶返埋o黎囉!

一開場已經不停影住佢o地, 後來仲列隊出o黎一齊頒25年金曲金奬…一下子見番晒呢班細個睇住佢o地做勁歌o既主持, 仲要係按年代排隊行出o黎 (但又唔係跟得好足…真係美中不足)…真係好感動囉!

見到多年勁歌總選御用主持阿旦, 仲有佢個好拍檔林珊珊…林珊珊真係不老的傳說, 個樣同十幾歲時無咩分別! 仲有佢真係好識講o野, 我覺得佢直頭係三姊弟之中最醒o個個添 (包括埋EQ方面…起碼唔會得成日亂咁寸人)! oh, 當然唔少得n代勁歌主持money姐啦…嘩, 佢今次整個露臍裝都算勁! 真係好耐無o係電視上見過佢…感覺好特別! 個樣同廿年前都係無咩分別, 果然係keep得好…可惜無o左佢個好拍檔蔡楓華一齊出席啦!

連何婉盈, 林映輝, 劉倩怡都有…其實應該搵埋倪震呀, 袁詠儀呀, 譚小環呀, 李珊珊呀, 松松姐姐呀咁?! 同埋真係唔知原來修哥曾經主持勁歌喎…不過修哥真係幾funny, 尤其叫佢頒獎時佢o個句:“我唔識字o架喎!”仲有忽然爆肚問崔建邦同志偉拍檔係咪好難忍, 又話:“崔尚宮, 我爭住你o架喎!”笑死我 (註:“爭住你”呢句尤其抵死…好六十年代囉!)…真係估唔到修哥咁老都咁風趣! 以前d主持, 確係勁d!


(in case你真係無睇過…)

至於個勁歌廿五年金中金…頒俾阿倫都好合理o既, 畢竟得番佢仲o係度玩緊! 但係佢懶係要解釋番呢個獎唔係競爭性o既獎blah blah blah…算啦, 無人會理你o架喇…真係此地無銀! 不過無可否認, 佢d歌的確係好經典…我覺得應該俾“愛在深秋”呀, 呢隻係我第一隻識唱晒成首o既歌仔!

不過“愛情陷阱”得獎都好…快歌令人興奮d, 一聽到個節奏大家已經high晒! 同埋你見軟硬都用呢首歌o既前奏做"廣播道fans殺人事件"o既前奏, 可見佢曾經幾咁hit過, 幾咁有代表性! 倫伯一邊唱一邊周圍去搵d歌星一齊合唱…令我諗起細個時睇頒獎禮個情景, 因為呢個係好typical佢o既做法…85年佢拿金曲金獎時又係咁! 呢part可以話係今年個頒獎禮最好睇o既一part…點可以未唱完就去廣告o架…癡線o架?! 識唔識分輕重o架? 我真係要即刻拿番晒d舊帶出o黎, call番我d回憶番o黎先得! 我真係要高呼: I am a piece of old cake!!!


(愛情陷阱@勁歌廿五年...同場加映修哥棟篤笑)


諗番起八十年代勁歌頒獎禮真係好勁咁…雖然當時好細個, 但都隱約記得o個種勁…因為當時我o個d十幾歲o既表哥表姐好鍾意睇勁歌, 受佢o地影響我都睇埋一份, 所以4, 5歲我已經係勁歌fan屎…大個之後亦都有試過去紅館現場睇勁歌總選, 不過睇過兩次之後, 都係發現睇電視直播正好多…因為個show根本就係製作特登用o黎電視直播, 完全照顧唔到d現場觀眾, 所以o係電視機前睇仲好睇!



講番今年個頒獎禮…搵周慧敏頒最受歡迎男歌手, 以為一定係古巨基啦…點知係陳奕迅! 古巨基好明顯真係好失望, 到[手羅]金曲金獎時個樣仍然唔太開心! paco都黑晒面! 同埋阿古巨基做咩無啦啦變o左“押韻王”? 嘩…真係勁娘, 勁老套! 押一次半次咪算囉, 唔好玩足一個月先得o架, 哥仔?! 仲有, 阿玉女掌門人真係好elegant, 年紀愈大反而愈靚…真神奇! 仲靚過十五年前o既佢好多!

至於最受歡迎女歌手…有咩可能又係容祖兒呀?! 4連冠喎?! 有無咁勁呀? 咁搞法咪分分鐘仲勁過梅姐? 同埋佢唱“華麗邂逅”時, 唱到尾無啦啦喊咩呢…拿金曲都要喊?! 唔好話我聽佢真係俾曾志偉蝦到喊…你當我o地係傻仔咩? 不過佢同曾志偉真係好面左左囉, 係人都知佢o地唔o岩係事實, 唔好搞到咁核突啦…佢兩個個樣真係幾尷尬, 志偉後來頒金曲獎俾佢, joey講感受時都淨係望住amigo, 一眼都唔敢望志偉! 哎…成件事都好肉酸!

千嬅都真係慘…估唔到佢真係一個獎都無, 連金曲都唔俾首佢…就算係轉會都唔好搞到咁核突呀?! tvb咁識分豬肉, 唔係咁都唔分個俾千fa呀? 咁佢都好有體育精神喎…其他佢o個級o既歌手知道無獎都唔會o黎啦! 其實側田/衛蘭求其俾少隻金曲咪大家高興囉…搞到千fa要走o左去廁所避開俾人影佢表情…哎! 可必呢?! tvb唔係最叻玩皆大歡喜o既咩?

Kelly又分到個亞太區豬肉獎, 都真係戥佢幾尷尬o既…tvb仲要煲到個獎懶大咁, 但係人都知其實係豬肉獎! 劉華年年都拿唱作歌手金獎…又係有d可憐o既! 我好欣賞劉華o既為人, 仲有佢o既態度同埋風度, 但係佢唱歌就…我都唔知講咩好?! 同埋每年佢有咩候選歌 (甚至得獎歌)…我都已經唔係太o翕得出!

反而張敬軒個感覺真係幾好…除o左唱歌好之外, 仲好謙卑同埋好有禮貌, 好少後生仔係咁!



今年因為好多大牌歌星無o黎…造就d新人有機會拿金曲獎…好似衛蘭/側田咁! 不過衛蘭你其實真係有無形象指導o既呢? 點解成日著衫都可以著得咁核突? 遮唔到不突止, 仲暴露晒d缺點出o黎! 反而泳兒幾識著衫, 同埋好似好樣o左好多…可能又係人紅自然靚o既道理!

仲有鄭融隻“紅綠燈”得獎, 點解會話係爆冷呢? 隻歌好似真係好紅o架喎! 雖然以前d頒獎禮, 真係即使隻歌好紅都未必會頒俾d新進歌手! 不過鄭融唱live真係唔錯…呢樣o野係當年佢拿新人獎時已經讚過…因為當時睇叱吒真係幾impressed, 一路以為佢係得個樣或者係跳舞勁…點知o個次睇佢喊住唱“終身學習”都好有水準!

我最喜愛o既阿c又的確係唱同跳都咁得, 不過又真係太似梅艷芳喇! 至於tvb自己人廖碧兒亦都不出所料得番個獎! 咁佢又真係唱得好o左o既, 前年睇“人間蒸發”聽到隻主題曲“實情”, 仲以為係yumiko唱添! tvb又的確應該頒番個獎俾bernice, 好似舊年吳唱k同埋之前每年o既藝員都係咁, 梗係要照住自己藝人啦! tvb係最識分豬肉o既頒獎禮, 真係人人有份…好似“愛得太遲”拿金曲金獎, 廣告歌就俾銀獎佢, 留多個金獎俾劉華…年年都係咁計得太精, 反而顯得太假…不過無所謂, 我成日都話頒獎禮都只係一場show, 好睇咪得囉!

勁歌係咁多個頒獎禮最大/最grand o既一個…雖然無咁多煽情場面, 不過每個頒獎禮都有自己o既特色o既! 最唔明就係點解每隻歌只係唱得半首, 勁歌唔係應該歌行先o既咩?! 得o個一段仔, 到喉唔到肺! 同埋要d歌手坐晒o係台呢個個安排真係好唔得, d女歌手著裙點坐呀? 我見衛蘭坐第一行簡直係周身唔自在, 好似俾蟻咬咁!

仲有, 整咩阿amigo塊面爛成咁? 佢真係同唐詩詠分o左手咩? 不過阿“失戀司儀”呢兩年做總選司儀都算稱職o左好多…算啦, 下年繼續俾佢做啦! 仲見到粥粉麵飯個阿飯-孫慧雪做o左歡樂小姐…佢唔係上o左位o既咩?! 做咩又要走番去做歡樂小姐?

同埋點解今年無o左公益金o個個獎o架?! 好彩又有志雲總經理出場講一番肺腑之言…佢真係唔會放過每個出鏡機會, 咁叫佢頒廣告歌獎又係o既…佢咁識幫自已賣廣告! 可惜今年利孝和夫人頒金曲金獎時, 無再好似舊年咁俾d驚喜我o地…好懷念舊年o既無…“籟”!!!

芒姐勁歌全紀錄:


2006-1-18(wed) 2005十大勁歌金曲頒獎禮 (下)



2006-1-17(tues) 2005十大勁歌金曲頒獎禮 (上)



2005-1-29(sat) 2004頒獎禮



2004-1-16(fri) 大迷信, 大迷信, 大迷信1993/2003?!



2004-1-11(sun) 勁歌後記



2004-1-10(sat) 2003勁歌總選



2003-1-5(sun) 2002年度勁歌總選review



2003-1-4(sat) 勁歌總選前奏



2006- 3-26(sun) 時光倒流12年...1993樂壇頒獎禮回顧


um…等我即刻拿番幾年o既勁歌帶出o黎睇…我去睇帶喇! 推介大家一齊重溫85年勁歌頒獎禮…尤其係一開始o個段超長medley…仲有可以睇番仲係dancer o既郭富城 (一定見到佢, 因為佢好出, 同埋確係跳得幾好!), 同梁漢文好似樣o既吳瑞庭, 同埋卡拉之星鄧汝超做歡樂先生…!!!