2012年9月18日星期二

9-18(tues) 程若真不必相見恨晚...:ppp

呢期在我腦海內縈繞住o既居然係呢首歌…真係唔得你死…:p



因為weekend一連睇咗四集"巴不得媽媽", 我依家個腦不停係咁"程若真不必相見恨晚"…救我呀! 不過諗到呢個gimmick o既仁兄真係要俾個like佢! 雖然當年d人聽呢首劉華版"神鵰"主題曲已經成日講呢個"程若真"笑話! 不過估唔到有人真係會擺落個劇度囉…哈哈!

哈哈…其實一開始只係留意到朱咪咪叫"程若真"...係到呢幾集先知道原來king sir係叫"馮恨晚"...救命! 套劇改d名真係好抵死! 呢個crossover真係好得! 搞到人好想去睇番"神鵰"添呀…同埋呢首"程若真"真係超好聽!

睇番wiki原來套劇係潘嘉德監製…佢d劇我一向好like…唔怪知得咁高水準! 同埋呢套劇真係成功囉! 我發覺真係連好多平時係點追劇o既朋友都話有睇"巴不得媽媽"...其實佢無聊得o黎又真係有d劇情o架喎! 同埋堅好笑囉!

睇到結局篇, 依家"巴不得媽媽"咁多個角色中, 你又會最like邊個呢?



上星期tbb安排咗o個個俾人圍剿o既失心瘋導演張永豪, 同埋俾佢虐待o個位神獸小姐劉蔚萱, 一齊上"東張西望"剖白…嘩! 大佬…好可怕! 簡直係"愈描愈黑"o既典範…諗呢條橋o既應該可以即炒! 本來全世界都已經覺得佢一定係癲喪o架喇, 但相信睇完呢個導演以chok聲+扮晒乖學生嘴臉, up住個頭講出d咩"其實當晚我都有同佢道歉o架, 小欣姐~~" (扮乖巧狀) 等造作表現之後, 比起睇到佢當晚"教戲"的表現更想"升"佢兩巴!

你想幫佢洗底, 都要叫佢本人練好d戲先得o架? d戲咁over, 仲學人教戲? 同埋佢個look真係好唔得…一睇就係奸人樣, 有d似成日演道友o既陳勉良 (sorry, 但人哋個樣係忠o既, 同埋人哋真身好似係國畫大師添!)…個嘴勁黑, 真係見到都真心驚o個隻…你明知佢係呢個look, 叫佢上o黎做戲咪盞令人未聽佢講嘢已經反感咗!

同埋最後握手言和o個part都好肉酸…個道友導演個假樣實在太令人難受, 而個女仔d戲又的確係要"教"…因為佢真係忍唔住喊…應該堅係委屈! 阿小欣姐仲要問人:"點呀? 你喊喎, 係咪覺得好委屈呀?"…你叫人點答?! 好可憐, 阿劉蔚萱應該之後都唔駛旨意喺tbb撈喇!


去咗睇"半生緣"…嘩! 我完全唔知到金燕玲唱歌係咁好聽o架喎…直頭比職業歌手再pro多一百倍! 估佢唔到!