2008年8月8日星期五

8-8(fri) 08.08.2008

嘩! 終於等到2008年8月8日!

好感動! 奧運終於o係中國人o既地方舉行…個開幕禮比起想像中做得更好, 真係好勁, 好grand, 好靚…名副其實o既中國人的驕傲! 張藝謀果然係d有計! 我覺得今年個開幕式係咁多屆之中最得o個屆…你話有無bias呀? 唔排除有o既…作為中國人, 唔係無呀?! o係fb見到好多人睇完奧運開幕禮話"proud of being a chinese"...其實點解要睇完開幕先認同自己o既身份呢? 我從來都話對於自己係中國人呢個身份感到驕傲...不過遲到都總好過無到o既!

好啦, o係呢度都係唔好討論呢d咁嚴肅o既問題…講番兩台o既奧運節目先!無可否認, 點都係主力睇無綫o既, 呢d又真係無公平o架喇, 無綫收個畫面唔知點解都收得清d…真係無得講! 雖然亞視重金禮聘到香港o既奧運第一金李麗珊做主持…牌面佢當然得d, 但係口才方面珊珊就真係…搵佢做主持確係對佢同對觀眾o黎講都有d難度! 其他好似肥谷, 阿lo o個d都ok…袁彩雲咁多年仍然係有d口窒窒, 可能佢d中文真係太唔得, 又或者佢真係唔係做主持o既材料…反而無綫同佢差唔多時候出道o既楊婉儀…真係睇住佢一屆一屆咁進歩…96年第一次見佢主持奧運時…窒到呢! 依家真係做得幾好…即使佢中文都係麻麻, 但係睇得出佢進步o左好多…同埋幾有大將之風!

亞視好在有兩台之中算係最有經驗o既奧運主持顧老闆…不過無綫都有阿wendy姐! wendy姐雖然有時 (or其實係大部份時間) 誇張d同埋鍾意認叻之外, 有佢做主持都幾好o既, 佢發問問題時好鍾意同d被訪者懶熟咁, 又話n年前唔知咩場合又訪問過佢, 幾富娛樂性呀! 同埋最緊要o個樣係…睇得出佢好有passion囉! 今次開幕式佢又有份同do姐+克勤o係主場館做直播, 上屆都係佢帶住兩個新丁方力申同葉璇做開幕禮!

今年無綫其實都出動好多人手去搞呢個奧運, 又阿叻又do姐…都真係好dum本! 仲有我好欣賞o既克勤呢…佢做主持的確係有一手, 尤其係世界盃同奧運呢d體育節目! 不過世界盃應該仲好d, 因為佢真係有呢方面o既expertise…奧運我諗佢未必瓣瓣識! 不過佢呢隻莊諧並重我承認我係好buy o既!

至於方力申, 搵佢同李啟淦旁述游水項目又的確係o岩晒! 不過今屆再見到方力申又覺得佢其實有d慘…咁又四年, 佢除o左每屆奧運有得出o下o黎, 其餘時間o係娛樂圈都有d半紅不黑o既感覺! 00年悉尼奧運佢仲係以一個運動員o既身份被採訪, 之後一年佢就加入o左娛樂圈…上一屆奧運都仲叫做新新地o既藝人, 今屆佢已經入行七年, 但係除o左幾年前hit過o下一兩首合唱歌就無啦…都有d灰! 所以話…娛樂圈都真係唔係咁好玩!

當然, 今次睇奧運最驚喜係見番我好buy o既潘宗明囉…佢點解會返o左o黎? 事前我好似無聽過o既?! 最鍾意就係98世界盃o既佢…笑爆嘴! 可惜今次奧運好似見佢只係做夜晚重播時段, 黃金時段即使有佢都無得發揮, 真係大材小用…同埋今次再見番佢真係少o左d光芒囉…好可惜!

仲有, 居然連蔡康年都有份做主持…佢口材係ok, 但係形象就真係呢…無綫都幾包容佢d藝員, 成日都俾機會佢o地…都幾好呀! 仲有上次講過消失o左幾年o既 “o雪 o雪 o雪”蕭正楠, 居然又出番o黎…無綫仲力捧佢同其他上位小生花旦林峰, 廖碧兒同鍾嘉欣做“奧運四星”…真係令人費解! 但更難受o既係佢o地四個要去迪士尼同o個個唔知咩蜜瓜博士同埋尖嘴介紹迪迪尼o既迎奧運新搞作, 然後扮到好興奮…仲要o係開幕禮o個日穿插咁播…真係戥佢o地難受!

Oh, 差d唔記得o左上屆港姐冠軍張嘉兒…佢都有份去北京做主持, 我以為無綫已經無簽佢添!其實作為一個新人佢o既表現都不過不失o既…同埋佢上年俾人鬧到咁, 少不免都有d同情佢, 睇睇o下都覺得其實佢好樣o左好多…當然, 佢唔應該當選港姐冠軍仍然係不爭o既事實…不過人o地女仔人家, 又唔洗用d咁尖酸刻薄o既詞語去鬧人o地o既…我覺得由始至終佢attitude都幾好, 呢樣我欣賞!

今年無綫無咩好似前幾屆咁o係奧運之前整d介紹運動員o既特輯, 上次雅典奧運反而好似仲落力d! 同埋今次個口號咩“我o地就係奧運!”…未免囂張o左少少囉!

好, 睇多d再講!