9-20(tues) 百法百眾

今個禮拜開始又cut o左 “東張西望”, 仲無埋“香港直播”…反而晏晝整o左個甚麼“娛樂直播” (o岩o岩睇到深夜播完 “刑事偵”之後原來會重播一次呢個節目添…果然慳水慳力!) , 跟住7:30又整個好似當年“娛樂新聞眼”咁短短o地o既“娛樂頭條”…都係換湯唔換藥! 而呢兩個節目大部份都係由d新選出o黎o既香港小姐+香港先生主持…俾d機會d新人都好o既…不過全部都做得好生硬, 又成日都望唔o岩個鏡頭…葉翠翠講o野就更加唔多掂…哎! 我好唔buy佢! 一個醜版潘芝莉居然可以做到港姐冠軍…!

跟住居然連k-100都話要摺埋…點可以o架?! 呢個節目係就係愈o黎愈唔好睇, 但畢竟都有廿年歷史, 仲係全台劇集o既遇告節目…點可以cut o架?! 今個禮拜六話會有個ending show叫“千夜星光k-100”, 仲話有好多紅星…有“五虎將”添…不過我諗都係播番佢o地d片段…但我依然期待!

好彩上個禮拜五都食到舖尾糊睇到最後一集“香港直播”…嘉賓係黃日華, 仲有講o下五虎…大家有興趣可以睇o下實而不華--黃日華 (好鍾意呢個口號, 直頭可以媲美“輕輕鬆鬆--鄧梓鋒”!

今個禮拜“娛樂直播”仲有一連幾日o既草蜢訪問…都幾精彩! 畢竟佢三個係我o地小時候o既“偶像”…又係一個情意結! 上幾個禮拜“殘酷一叮”有草蜢做嘉賓, 仲同李克勤+梁榮忠合唱+跳o左一段“失戀”…好好笑! 令我諗番起當年克勤同草蜢仲有黎明合演o既電影“yes一族”…當時我仲好無聊地落樓下間租碟舖租o左呢套其實頗爛o既電影o黎睇!

原來李思捷又真係幾掂o架喎, 好好記性, 咩娛樂資料都記得…連我聽都未聽過o既“青春怒潮”o既劇情佢都o翕得出, 果然係有d料到…我要約佢茶聚一o下先得!

睇“娛樂直播”, 仲發現原來俞可欣拍緊一套以當年佢同劉華o既故事做藍本o既戲, 仲搵埋自已親爸爸媽媽一齊演…真係唔好太落力啦…係咪癲o架?! 掉d錢出o黎拍, 拍o左出o黎有無人睇呀?

另一樣騎呢o野係睇音樂節目見到李蘢怡同李龍基合唱o左隻歌…唔係因為兩個人個名差唔多就要合唱呀? 咁最應該合唱o既其實係陳慧嫻+陳慧琳+陳慧珊囉…起碼個寫法都似d呀?! 隻歌仲要叫“明天你是否依然教我”…實在娘得很! 係咪想抄“明天你是否依然愛我”? 兩個好唔掂o既人搏鹹魚翻生…實在好desperate!

無o左“東張西望”, 居然又o黎過“百法百眾”…完全唔知無線諗咩…d咁o既節目真係有收視o既咩? d片段內容又極其無聊, 又悶, 又唔知想點…答案又無稜兩可, 仲錯漏百出…上次入境處單o野仲嫌唔夠核突咩…依家居然仲再下一城…實在騎呢!

尋日第一集居然無啦啦俾我見到一個同學仔上o左去做講解答案o既律師…果然好有勇氣! 雖然應該有law soc d人寫埋稿 (就算係你自已寫稿, 佢o地都一定一齊研究o左答案先俾你上去o既, 只係搵個人上鏡去o翕o者…所以搞出上次入境處單o野出o黎都真係好核突…最核突係仲要死撐!), 雖然係咁o者, 但都好難擔保有咩突發事情或者有人問d騎呢問題…所以我真係覺得同學仔幾有勇氣…同埋都講得幾好, present得幾好喎…另眼相看!

但我唔明d觀眾點解成日好似o係度朗讀緊ordinance, 講邊條邊條條例咁?! 係咪事先知道d問題o既範疇, 帶埋資料去…定係有本ordinance俾你o係度搵答案o架?! 就算d懶勁o既律師, 都未必可以即場o翕得出呢件案係關於邊條條例第幾章第幾節啦?!

p.s.我記得喇…曹永廉隻歌應該係叫“長夜動人燦爛”, 仲有一隻係獎門人提供資料o既…叫“情深款款”!