2009年6月23日星期二

6-23(tues) 碧血鹽梟

話說上期講開林峰…好多人都問我有無見到佢“契媽”利孝和夫人…我的確係睇18號尾場呀, 不過我真係無見到利夫人, 反而見到陳敏之, 何麗全同埋馬德鐘等…不過我前個禮拜又的確o係中環見到利夫人…佢雖然無著旗袍, 但風采…都算依然o既…:p



我之前講過既無睇“巾幗”, 亦無睇打正佢”延續篇”旗號o既“碧血鹽梟”…因為呢隻劇種唔係我杯茶…但上個禮拜唔覺意larp到一集, 係講阿美妮姐姐俾阿敖嘉年飛, 跟住楊怡鬧爆阿敖嘉年虛情假意, 敖嘉年又反鬧番佢明知阿二少黃浩然鍾意佢又扮晒唔知先係虛情假意咁啦…睇睇o下又居然睇起上o黎…真係世事難料!

睇睇o下又覺得楊怡/黃浩然/馬浚偉o個段三角戀都幾好睇…仲有阿美妮姐姐做呢d風情萬種但又受盡委屈o既青樓女子又幾好笑o下, 可能佢平時嘈之巴閉的形象太太太深入民心!

仲有, 馬浚偉同楊怡合唱o個首主題曲都幾有趣o下…男o既好高音, 女o既又反而唱得好低音…真“趣怪”!

上個禮拜有一集“畢打自己人”好好笑…笑番自己台的“美味天使”, 叫“中藥天使”…仲要咩“杞子”, “犀牛皮”, “大山地”…好白痴, 但好好笑! 懂得自嘲…俾個叻佢! 阿黃子雄仲要係咁“Miss大山地”…又諷刺阿方力申同美少女廚神rainbow o個單攞電話號碼+sms新聞…幾抵死!

另一近期網上熱爆爆笑廣告…“古天樂@YOKOHAMA輪胎廣告”… 「想節能,輪胎能。省姐撚,撚太撚。」…又係笑爆嘴~~~!!!