H-E-J-N-O-M <=> 芒姐再現: 2009年4月4日

2009年4月4日星期六

4-4(sat) happy950000…十九白金+草蜢忘我演唱會2009

在每夜草蜢彈跳於激光中~草蜢彈跳於心窩中~

寫呢篇日記o既時候, 我o既心情依然好亢奮…雖然依家已經距離我睇“草蜢忘我演唱會”o既日子有兩日, 但我依然好忘我, 草蜢依然彈跳於我的心窩中…原本我仲為某d事激氣緊, 但去叫/跳/唱足一晚之後, 居然真係忘記o左d憂愁…證明草蜢o既威力, 都真係咪話唔勁!

所以我決定要寫番篇o野去記低呢一刻o既心情, 用以“發泄發泄我苦悶”…從來未試過睇演唱會可以玩得咁high, 跳到裡裡外外都濕晒...事關我又真係著多o左幾件衫 (因為俾天氣報告欺騙o左…), 除到無衫可以除, 連“發冷人”如我都可以跳到全身濕晒…可見氣氛幾咁高漲, 大家有幾咁熱血沸騰!

眾所周知, 芒姐除o左係一個電視精, 亦都係一個演唱會精…曾幾何時, 咩狗屎垃圾演唱會我都睇一餐…但係草蜢演唱會, 真係我咁多年來睇過最好睇/氣氛最好o既演唱會!

亦都眾所周知, 芒姐個人都ok mean (some said it should be classified as “above mean”…wahahahaa!)…連我呢d挑剔王都激讚o既演唱會, 應該都唔會太差…仲要其實我從來都唔係草蜢粉絲, 但係自從05年第一次睇完之後(ok, 我承認我05年先第一次睇草蜢, 以我個年代o既人o黎講, 是幾out的~~~), 佢三年半內開o左四次演唱會, 我每次都不由自主咁買飛去睇…如果依家仲有飛賣的話, 我想去睇多次添! 之前睇報紙話炒到千幾蚊一張, 我都有一刻諗過不如賣o左佢…好彩我無咁做到…如果唔係真係後悔莫及!

同樣地眾所周知 (至少係同過我去睇演唱會o既都會知) 芒姐一向睇演唱會都係“內斂”o個批 (此為成日同我睇演唱會o既掌門人給我的形容詞, 我認為係十分準繩+中肯啊!), 又或者好似今次坐o係我o地o個行, 被另外一d朋友形容為“掃興王”o個批咁…我o既喪叫喪跳小宇宙, 只會o係極罕有o既情況下先會發揮出o黎…因此今次能夠睇到我由頭叫/跳到尾的朋友…你真的時運高, 可以考慮額外俾多四百蚊我以示獎勵! 咁當然, 跳唔跳得起都好睇你身邊朋友同唔同你一齊癲o既~~~

我兩隻手臂因為落力fing棒棒fing到有d痛, 腳都撞o左落前面排椅度瘀o左少少…可見我真係幾忘我o下! 同埋我都真係有響應佢o地呼籲著番件紅衫仔去應o下景…畢竟紅色又係sharp醒…我鍾意!

雖然, 今次係無05年第一次睇咁震撼 (因為o個次係o係毫無expectation之下感到極度精彩), 不過依然係超好睇…希望無令到我不停向佢o地推介o既朋友失望啦! 最好睇唔單止係佢o地o既勁歌熱舞, 而係因為草蜢的確係陪住我o地o個代o既小朋友成長, 就算你唔係佢o地fan屎, 細個時都一定會成日聽到佢o地d歌! 所以今次好多歌直頭係一聽到前奏, 已經起雞皮o個隻…事關所有童年畫面重現, 回憶返埋o黎...!

其實對草蜢最瘋狂o既, 應該係大我幾年o既表哥表姐o個代, 但就算細我幾年o既, 都無理由無經歷過草蜢最紅的年代呀?! 不過我居然發現原來好多細我幾年o既朋友, 以為草蜢係李龍基/方伊琪/陳浩德之輩, 咁又未免太誇張…如果你係生於九十年代o既話, 你唔識草蜢我都覺得情有可原, 否則你一定係細個無得睇電視o既可憐小朋友…咁你未免miss o左太多好o野喇! 因此所有未睇過草蜢演唱會o既朋友, 我向你大力推介, 可以嘗試買飛去睇o下…如果你仲買到o既話…(雖然我無commission分…)

(呢個情景…的確好瘋癲…群情洶湧...散場後15分鐘仍不願走的人群... 好少可去演唱會可以咁齊心...齊到呢...勁有節拍...可惜最後佢o地都係無出多o黎一次...太狠心...又話齊心就事成o既...?! 到後來睇番我07年2月去睇o個次…先記起原來佢o地當年又係叫極都無出o黎…oh…)

有朋友問我覺得今次對比起上幾次邊次好睇d? 我會話05年o個次最好睇, 因為大家都餓o左好耐, 好耐無睇過草蜢, 所以先咁震撼, 有咁大o既迴響…之後我就會揀今次, 因為06同07 o個兩次其實同05有d相似, 同埋時間上相差得比較少…今次隔兩年就o岩o岩好喇!

剛剛o係youtube搵到呢首歌, 我都係因為05年o個次睇完先知道原來佢叫“兒童不宜”…成日o係度咩“代客泊車”又“挑戰者”…今次演唱會都有唱, 仲有好多朋友問我係咩歌o黎…哈哈, 呢首都幾得意呀, 咩moon venus咁…ok趣緻, 個beat都令人聽得幾興奮! 聽得多佢o地最hit o個d快歌, 要推介o下呢首大家無咩聽過o既快歌“兒童不宜”…!

至於慢歌, 我好鍾意o既“心中的歌”(最主要係因為當年小學時搭保母車成日聽到, 又係一聽就“回憶返埋o黎”o個隻!) 今次無唱到…不過另一首又係勁鍾意o既“歲月燃燒”就有喇…真係愈聽愈正! 我個人認為仲正過原裝英文版o既“slip & slide”添呀! Wow…同埋佢o地o係呢個mv個look真係好後生囉…