2007年10月20日星期六

10-20(sat) 再會衝上雲霄…唔係歡樂今宵

早前因為睇補習天后, linko左去其他片段, 其中一d係“衝上雲霄”葉璇的部份…一睇之下, 又幾好睇! 首播時focus on睇陳慧珊+吳鎮字+馬德鐘o個段, 依家睇番, 其實呢條青年人線都幾好睇, 成同班後生仔一齊上堂, 一齊training…o個時個個都好young, 好fresh…成part感覺好有衝勁, 好有鬥志, 好團結, 好開心! 仲要佢o地幾個主角都大約o個期o岩o岩開始被力捧, 又係套套劇都可以見到是但幾個, 戲裡戲外都好似好friend, 仲成班人一齊出外景…唔怪得知阿“myolie”同阿“michelle”到04奧運都要成日叫住大家個名!

upload呢d剪輯片段的網友都真係幾有心, cut晒呢d部份出o黎睇反而仲好睇, 無咁散…我以前又係成日睇劇都會cut晒我鍾意o既演員o個d部份出o黎keep…不過依家已經無咁好心機! 內地的網友真係好有heart!

其實佢o地成班後生仔感覺真係幾開心, 幾好玩...仲要有咁多外景又全部地方都咁好睇, 又日本, 又意大利, 又澳洲…都好dum本o下! o個時o既台慶劇真係勁過今年好多, 2003年之後都無睇過呢套劇, 依家睇番又真係幾好睇! 其實呢套戲真係幾得, 又勵志, 又有意義, 感情線都寫得幾好, 仲可以幫航空公司宣傳, o個年又真係多o左好多人去考機師/空姐, 連帶機場個感覺都好型咁! 可惜無幾耐個熱潮已經退晒! 已“衝上雲霄2”亦都拍攝無期!

仲有, 陳eason隻主題曲“歲月如歌”同陳慧珊首插曲都好好聽!

同埋呢套劇其實幾多爆笑位, 尤其係第八集, I am an“al-peen”o個part (我今次聽清楚, 原來係“al-peen”唔係“al-pane”添呀)…吳鎮宇的英詩朗誦, 真係笑爆嘴, 當年已經笑o左好耐, 依家睇番依然超好笑, 仲要係睇得出d人直頭係忍唔住笑o個隻...真係點解可以講成咁? 睇埋字幕都唔知佢o翕咩?!?!?! 同埋真係唔明點解要咁玩佢, 英文最差o個個反而要唸詩? 一定係得罪o左監製!


(an…al-peen)

哎…佢真係我so far聽過講英文最難聽o既藝人, oh, 仲要關詠荷同埋陶大宇囉…佢o地真係好似完全唔識英文咁! 聽完佢講英文, 相信大家都會覺得阿唱k 的英語其實不算太差…至少係唔值得笑成咁, 又或者佢真係人緣差, 同記者關係差, 所以一有o野就寫衰d!

睇睇o下其實o個時唱k個形象真係幾討好, 幾型, 難怪佢o個時會走紅, 但係依家真係dup到有d可憐...可能唔好俾佢升得咁快反而無跌得咁快! 同埋佢都係真係做莽撞青年做得最好, 所以呢套同"學警"都ok, 但佢一做官仔骨骨或者古裝就真係嚇死人!

仲有, 輕輕鬆鬆o既鄧梓峰都做得幾好呀, 仲有比起吳鎮宇, 即刻覺得鄧梓峰d英文幾好, 所以你見大部份教書o既劇情都係搵佢做, 吳鎮宇只係教o左少少[手查]飛機…不過佢好似係DBS出o黎, 咁以DB o黎講佢又真係唔算好囉喎! 但係佢o既工作態度我真係一向都好欣賞, 雖然佢應該主力做司儀, 但係依家就派佢做戲仲多, 不過佢都做好佢每樣工作, attitude好值得讚賞!


(仲有呢段又係好笑…衝上雲霄搞笑片段之eason篇 (1))

睇第十五集吳唱k+葉璇+陳鍵鋒[手查]飛機training, 無油又入o左雲o個段, 又真係幾緊張喎…o個時睇都唔覺得咁緊湊, 今次睇真係同佢o地一齊feel到好危險咁…勁!

仲有佢o地段“三角戀”, 我睇到一半點解無再upload啊?! 很吊癮呢! 其實雖然陳鍵鋒個有錢仔角色係幾痴情, 但係我覺得葉璇其實應該揀唱k 囉, 可惜最後唱k好似讓愛?! (呢個係我當時記得)…其實唱k同胡杏兒咁咪仲好囉...成日都係要搞d感情大兜亂?!?!?!

我亦都發現陳鍵鋒o既一個弊病, 其實亦都係佢最大o既優點, 就係佢講說話太過字正腔圓!!! 字正腔圓當然係好, 但做戲o既時候, 會覺得佢係做緊主持/dj多d, 反而唔夠自然, 呢個亦都係我睇“IQ成熟時”好欣賞o個班dj講對白字正腔圓o既同時, 覺得好似有d怪o既情況一樣, 原來問題就係出在太~字正腔圓…唔似演緊戲! 可能做律師角色就會好d o既…但呢套劇就反而其他人做得生活化d! 佢最大o既優點, 原來變成佢演戲o既一大負累…純粹個人愚見, 但我真係咁覺得!

睇睇o下班機師trainee, 原來另外幾個仲有蔡淇浚 (佢入行咁耐喇?!), 黃家樂 (“舞動全城”徐子珊個男友…其實好似01年"無考不成冤家"都有佢…都做o左好耐, 佢o既條件同s4都唔話唔差好遠o者, 點解紅唔起呢?!) 仲有, 其實馬德鐘o個時又真係幾討好, 幾正氣, 又再一次印證"人紅自然靚/型/討好"的道理!

至於吳鎮宇同陳慧珊o個段, 可以重溫呢度 (其實佢o地o個段又係好睇o既…d景又靚, 仲要o係頭幾集就播, 所以就被吸引o左, 主力睇佢o地條線忽略o左後生o個堆…) :


(《衝上雲霄》片斷《羅馬邂逅》1 ) [UPDATE: 根據FLORENCE同學提供, SAM同BELLE邂逅的地方應該係FLORENCE而唔係ROME!]


(《衝上雲霄》片斷《羅馬邂逅》2 )

20 Comments:

Anonymous Cherry said...

其實當年我已經留意到...佢地偶遇果度係羅馬,但係山上cafe又似係佛羅倫斯...

我有冇搞錯呢!?

10:45 上午  
Anonymous 匿名 said...

"衝上雲霄"首播時我已經覺得好好睇, 雖然後尾陳慧珊發癲(馬德鐘死左之後)果段好煩。

哈哈! 吳鎮宇果段"an…al-peen"英詩朗誦真係笑爆咀! 好明顯見到葉璇同胡杏兒都正在陰陰咀笑緊!

嘩! 阿陳鍵鋒d皮膚真係好靚, 直情皮光肉滑過d後生女, 究竟佢有咩秘方護膚呢?

芒姐有冇睇到禽晚cash呀? 嘩! 阿貽興王d唱功真係好得人驚, 直情有十級恐怖呀!!! 睇黎呢位人兄真係好冇天份, 佢都係唔好再浪費時間喇, 反正年紀都唔係輕啦!

12:21 下午  
Anonymous 匿名 said...

每次聽到关詠荷講 Vincent 做 Wincent 时,我就要打冷震. TVB 咁大公司無人識英文咩?

3:13 下午  
Anonymous Veronica said...

我都成日俾人叫做"wer-wonica", 真係唔知應唔應d人好!

我有睇到貽興王唱歌呀... 嚇死人囉真係! 比較之下, 黃長興唱得算幾ok!

3:25 下午  
Anonymous b. said...

<衝上雲霄>係我近年TVB劇最愛!
原因是景靚,而演員質素又幾好!
起初我都係睇前幾集比陳吳線吸引,點知睇睇下覺得一班後生仔去外國受訓先最好睇!

現在再次睇的感覺一樣年輕,想起很多以前讀書片段..

這便是電視給我們的回憶

7:43 下午  
Anonymous christy said...

wow! 衝上雲霄絕對係我TOP5我最喜愛的電視劇呀!! 我真係好想TVB重播呀哈哈哈!
衝上雲霄真係好好睇. 哈哈. POSITIVE之餘又冇邊邊個角色我特別唔想睇. 同埋睇完真係真係會對機場有好感架! 果時咁岩學校有visit去cathay city. 嘩. 真係應哂景! eason首主題曲又硬係覺得好岩套劇! 而家聽返都重好衝上雲霄既感覺!! 哈哈! 我覺得無疑國泰果時係賺左架。 多人apply jobs之餘, 又帶到正面影響間企業! 唔錯唔錯!

我果時反而最鍾意睇馬德鐘陳慧珊吳鎮宇胡杏兒果幾條線. 我唔知點解好受落胡杏兒同吳鎮宇條感情線. 可能覺得馬好錫陳, 吳又好型啦! 雖然吳d英文好好笑, 不過我又幾appreciate佢拍戲個態度. 連個髮型都親力親為真係好少見。

係呀,果時S4俾我既感覺佢地真係好friend. 其實我諗果時佢地真係會拍得幾開心。 至於鄧鋅鋒, 唔係呢套野, 我都唔知佢原來識'ja'飛機咁叻!!!

重有! 衝上雲霄一度令果時既我好想去羅馬日本果d地方旅行! 因為佢影到個景真係勁靚!! wow! 諗起都開心呀哈哈哈!

btw, 有冇人記得有一年唔知咩function, 吳家樂扮亞Sam叫亞bella唔好自殺果part? 哈哈哈好好笑的。

P.S.: 我都有貽興王唱歌呀! 我一度睇一度'DUUN'佢擔心! 反而王祖藍同黃長興令我有驚喜, 至少佢地好淡定又唱得唔差;)

喂喂芒姐, 新一輯獎門人好似冇左林曉峰變王祖藍呀!

8:06 下午  
Anonymous Crazy said...

我岩岩先係now度煲完成套衝上雲霄 !!
真係條條線都咁好睇!! d 景又好正!!
呢套戲令我個時好鍾意呀唱k架!!因為佢著起套制服真係好型!! 不過e+講話鍾意唱k都比人笑死...哈哈

10:48 下午  
Anonymous 匿名 said...

同意匿名,"後尾陳慧珊發癲(馬德鐘死左之後)果段好煩",但其實整部劇都很好看!

講起英文讀音,真的看到我...叫救命!

芒姐除了你之前講的"Al-佛"之外,還有楊怡那句"Gil-拔",差點反白眼.

3:12 上午  
Anonymous samantha said...

"衝上雲霄"真係超級好睇, 記得那時, 晚晚都要返屋企睇電視, 第日返學同班 friend 講陳慧珊好煩好煩. 有個 friend 仲參加埋 TVB週刊大抽獎, 有份去機場同班演員一齊玩一個唔知咩 function.

最crazy 係我個補習學生 (小二生)有次整爛左我條頸鍊. 我教訓左佢幾句, 佢居然講: 你條鍊咩人送架? 好似阿 sam 送俾阿 belle 咁? 好明顯大家都中哂毒.

9:22 下午  
Blogger 芒姐 said...

samantha,

哈哈...呢套又真係近年的經典...即使O個使已返緊工, 無讀書時咁多同學仔一齊DISCUSS, 但都照同D同事DISCUSS...呢套真係又勵志又好睇!

3:53 上午  
Blogger 芒姐 said...

匿名,

哈哈...今日睇蒙嘉慧做"通天幹探"懶PRO咁講一大段中文對白都LUR晒脷...其實我係OK佢O架, 不過佢發音真係好有問題, 應該執執先...

3:58 上午  
Blogger 芒姐 said...

Crazy,

係啦...我睇番呢套劇, 都明白點解唱K當年會咁紅!

4:01 上午  
Blogger 芒姐 said...

christy,

哈哈...但係聽聞係國泰唔肯再SPONSOR所以第二輯拍晒巡禮最終都拍唔成...可能佢O地衡量過都係弊多於利...! 不過唔拍第二輯都係好O既, 跟據經驗, 第二輯都唔會有第一輯咁好, 仲破壞埋之前的好印象添!

係O既, 其實要吳咁樣唸英詩, 擺明留難佢...佢都肯做! 佢個雞冠頭又係型O既!

係呀, 佢O地俾我O既感覺真係拍得好開心啊!

王祖藍不嬲係唱得之人, 好呀, 佢做"獎門人"我支持佢...佢好過林曉峰, 阿LO近年太自以為是...俾人感覺係懶巴閉咁!

4:11 上午  
Blogger 芒姐 said...

b.,

哈哈...幾條線都咁好睇, 呢套真係拍得好, 抵讚!

4:13 上午  
Blogger 芒姐 said...

Veronica,

哈哈...咁又係激氣! 但我聽過D更騎呢...反過來將"W"音讀成"V"音, 真係聞所未聞, 好似"CLOCKWISE"讀成"CLOCKVISE", "OTHERWISE"讀成"OTHERVISE"...我當時O了十個咀!

4:17 上午  
Blogger 芒姐 said...

匿名,

係呀, 佢個WINCENT又真係太明顯...其實真係唔係要求D藝人英文好好, 但真係唔好咁差囉...教壞細路! 點解無人執執佢O地?

之前POST過, 關詠荷+陶大宇@俠骨仁心講英文...我當年睇完係...笑到停唔到...

http://www.youtube.com/watch?v=0ThOVZkxPlw

4:22 上午  
Blogger 芒姐 said...

匿名,

我諗唔止葉璇同胡杏兒...好明顯其他都正在陰陰咀笑緊! 咁樣玩阿吳鎮宇...叫佢唸詩都算, 唸中英詩咪算囉...整咩要搞到佢邊成天大的笑話!

陳鍵鋒係真係可以用"靚"O黎形容O既!

我部錄影機壞O左, 未睇到cash呀, 叫人幫我錄O左? 不過我O係YOUTUBE睇到一段係阿貽興王當日的演出EXTRACT, 又真係幾...搵O黎搞!

4:26 上午  
Blogger 芒姐 said...

Cherry,

都有另外D朋友話俾我聽係FLORENCE...唔知我唔認得...不過有朋友證實咁應該係啦...

4:27 上午  
Blogger Flora said...

以前細個未識分d人o既英文講成點
所以冇乜感覺
依家聽返又真係幾Orz...

我個英文名同陳慧珊一樣 (FLORA)
不過好多香港人+大陸人都讀唔到個L同R音
變咗FOUR LA
呢個曾經一路變成我high school o既花名 真係好無奈囉
好難聽
仲要係改佢哋都發吾出嗰下先衰
唯有迫於無奈地俾人咁叫法
我阿媽今日先four la完我...

2:13 上午  
Blogger 芒姐 said...

Flora,

伯母讀唔正都唔怪得佢, 不過後生仔唔落力D讀好英文(唔係話要好好, 但真的不能太差), 真係好難在社會立足...!

3:59 上午  

發佈留言

<< Home