10-18(thurs) 風生水起
想講好耐…“森之愛情”真係超級難受…點解森美做主持好地地要走去用迷人的眼神殺死人…真係想點? 佢同小儀一齊做主持, 係後生一輩主持人之中比較可觀, 比較好笑o架喇! 急才口才都好過貽興王, patrick哥哥o個d, 但你偏偏走去做深情的森大哥…真係殺死我罷啦…好攞膽啊! 咁多集係唯獨niki o個集我覺得比較好睇, 同埋佢無咁過份情深囉…其他幾集真係想死! 點解要捨易取難, 將短處暴露人前? 佢係咪有苦衷呀?! 正如我之前寫:“瞭解自己的定位，找一條適合自己的路，才會事半功倍。”! 今次係…錯晒!
又要講番伍小生…佢真係無論歌藝定演技都咁…好!!! 哈哈哈! 上個禮拜睇佢玩“味分高下”, 叫人估邊杯好飲, d演技浮誇到呀…真係一估就估到! 不過楊怡同柯佬黎o個group都唔好得去邊…再上個禮拜o個幾個嘉賓做得好好多, 真係好難估…近幾集o個d o既演技差到呀!!!
仲有, 呢排睇肥姐d新聞, 見“東張西望”o個jar藝人主持其實都好慘…好似阿美妮姐姐, 輝仔o個d, 明明自己本來係藝人, 俾記者採訪慣, 依家要身份大轉移, 要同記者一齊追其他藝人, 都幾尷尬o下…都唔知點幫自己定位?!
錄o左好多集“真情”o黎睇, 不過頭十幾集真係好悶, 依家有番郭可盈o個條線好睇d…不過又真係唔睇番都唔記得係馬德鐘做郭可盈個有婦之夫男友! 仲有, o個時o既郭可盈雖然個樣娘d, 但係靚過依家好多, 自然過依家好多…點解要搞成咁?
oh…唔知大家有無聽過呢? 好似都plug o左一段時間, 但我早幾日先第一次聽, 跟住尋晚又見佢o地上埋勁歌添, 講緊農夫+麥玲玲師傅隻“風生水起”!!! 嘩! 其阿麥玲玲師傅真係好得呀, rap得好好, 雖然唔係話好快或者好難, 但佢幾有拍子感…仲要字正腔圓, 呢個crossover幾得意呀! 真係識搞gimmick!
仲要估唔到佢live表演時都無甩嘴, 同錄音無咩分別喎, 跟到拍子, 仲有晒表情…其實佢真係幾醒o個批, 又笑容可掬…真係俾起好多artist更適合做artist! 仲有佢套招牌粉色及膝套裝, 好係佢…幾端裝大方呀…千祈唔好改!
Oh, 我本來仲以為今年無o左“翡翠歌星賀台慶”添…一路都唔宣傳…我仲以為係因為舊年做到無聲無色咁, 所以做兩年又cut o左! 尋日睇勁歌先知原來仲有, 11月3日做!
posted by 芒姐 at 11:59 下午
4 Comments:
阿森美真係唔好玩喇...
幾年前唔知邊套戲又係有佢
點知一睇到我做戲就唔想睇喇...
over得佢呀
做主持咪好囉
同小儀d個DJ組合係我地d個年代真係無咩人唔識
做到咁算好囉
搞咩要自暴其短呢
唔講唔覺
真係有好多Artist係自己玩殘自己
唉...
要睇清自己係行邊條路架嘛
有幾多個可以似阿劉華咁又係TVB五虎又係四大天王呀
o個度風生水起唔錯喎
個idea好好
估唔到阿玲玲都rap得下
睇唔出喎
講真我都係鍾意玲玲多過那個蘇師傅
至少玲玲個樣和藹d,笑容多d呀
好想睇返個節目呀...
以前成日夜晚唔訓追黎睇
因為好好笑下
宜家連youtube都無
唔知土豆有無呢
乜唔係一開始就係快慢咇架咩?
我覺得快慢咇好似好d咁
因為以佢地ge性梧做d種節目好岩
不過係其他方面就...
講真...
我真係諗唔出亞視咁落去可以挨到幾多年
次次話改革...改黎改去都係得啖氣
宜家好多人每次聽到佢地話改革都係得啖笑
最後咩又係俾人批中左
今次仲好死唔死玩日日唔同節目
點留觀眾呀
仲要唔係好睇o個下死呀嘛
同內地合作...人地like TVB多過亞視
除非...亞視有錢到搵日本同韓國合作囉
不過我諗機會都好微下
陣容如果係hk觀察唔太識ge都彈唔起架喇
不過之前播o個d韓劇唔知佢地有無諗過一個問題
唔該唔好用配音喇,難聽都嘔!
所以話...亞視...就快byebye
但又唔想俾TVB壟斷哂...逼住黎TVB好慘架
(雖然宜家都係...不過有得揀ge情況下睇同逼住無得揀係唔同ge...至少心態上係)
我d朋友個個都話"森之愛情"呢個title應該加返個好似人地brand mark authorization 0個D一個圈裡頭有個R或者係C0個D。不過唔同C/R,用個"嘔" 字。就變成"嘔森之愛情"。
其實我覺得森美呢個人都愈黎愈厭悶。聽佢做節目都係有佢講冇人講0個D。又要扮哂大佬。尤其聽星期6晚0個個森美移動仲更加。其他主持人好似LEO0個D就係咁擦鞋咁既樣,森美又繼續扮大。好鬼悶。
亞視個LOGO好似鳳凰衛視0個個LOGO。好大陸FEEL呀我覺得。
Esaltato，
哈哈...嘔字加個圈真係好抵死!
我真係無咩聽過佢O既電台節目, 佢當紅時, 我已經脫離O左聽電台青少年節目的青少年時代啦, 完全提唔起興趣! 不過佢O係TVB做主持的確好過貽興同PATRICK少少O既!
亞視呢個LOGO我覺得都OK, 感覺YOUNG O左D, 但係佢內地化係十年前已開始, 我諗呢個亦都係一般香港市民唔鍾意睇佢O既原因...
yan,
我諗阿森美今次都知衰O架喇, 吃力不討好, 仲要狂俾人笑...佢真係以為每年做O下歌劇團就變O左男主角, 哎...下次唔好喇!
玲玲真係笑容幾可掬, 就算係扮出O黎起碼都敬業樂業呀, 好過好多黑面ARTIST, 同埋佢RAP得算幾OK!
你或者諗O下SEARCH土豆囉...97/98年倫住O黎試都幾HIT, 快慢咇我又真係唔知, 可能未起O卦?!
其實同內地合作, 香港觀眾係更加唔會接受, 會覺得娘, 唔多WORK! 我都唔想ATV咁快死, 我都好懷念亞視當年的創新節目啊!
發佈留言
<< Home