10-9(tues) 補習天后

終於睇o左幾集“補習天后”…多得讀者rain send俾我o既link...睇o左頭幾集, 又真係正如睇o左o既朋友的comment一樣, 都幾唔錯!

睇呢套劇最主要係想睇葉璇, 睇o下無睇佢o既劇一段日子, 依家做成點…同埋因為好多有睇過o既朋友都向我推介, 咁就睇o下啦…頭幾集都算無咩悶場, 可以繼續睇o下去…同埋個主題真係幾抵死…諷刺香港近年o既補習歪風!

雖然之前d劇集有時都會加一兩part講o下呢樣o野, 但成套都係圍繞呢個主題, 呢套又真係第一套…捉到呢期個勢, 醒! 同埋睇佢o地扮d補習天王天后, 做到好似明星一樣, 又造勢, 又搞簽名會, 拍廣告…好抵死! 仲要上堂時好似保險經紀咁幫你洗腦, 又有撕爛notes o個part, 仲有咩真人班同video班…真係幾寫實, 超好笑…仲有好生活化咁教中史, 將將荊州比喻成銅鑼灣, 孫權係陳浩南, 又劉備, 又大喬小喬…幾搞笑…相信所有香港人都會發出會心微笑! 不過唔知海外或者內地o既觀眾有無共鳴呢? 事關我知內地有好多人睇呢套戲, 因為葉璇o係內地真係好紅!

舊年o係呢兩篇: 1.補習天王 & 2. 美女廚房/美女班房分別已經講過我對香港近年的奇怪補習風氣o既睇法…雖然我都已經脫離o左補習行列一段長時間, 但o係十多年前其實已經好興補習, 不過就未到依家咁走火入心魔的階段…但係已經有o個d咩A1史sir (依家係咪坐o左監定點呀? 我無再follow佢個case…) 派閃卡, 請去旅行, 或者登報紙祝賀d人拿幾多個A的招數! 嘩! 幾虛榮呀…拿幾個A就可以期期上雜誌報紙…我真係好後悔無補A1囉…!!! 我當年補過o個間A IN A, 已經全線摺埋lu…當年係佢最強o架嘛!

Oh, 仲有張耀揚同葉璇又著晒戲服扮打抬拳道, 扮明諷刺最經典的當代Mia Wong, S-Men 同楚鋒o個個古裝“無極”造型…o個時撘巴士睇到真係o晒嘴…真係唔好太騎呢呀…大佬!!!



仲要第一集就整個咩“志文飯局”, 又學足志雲大師送禮物, 居然係送“矛”同“盾”…真係好抵死!

其實葉璇做得幾好…有d“男親女愛”do姐feel, 不過其實唔洗成日壓低把聲同埋表情可以收番少少…如果唔係未免太miss mo feel…成個形態都好似! 其實搵佢做呢個角色都好o岩, 佢英文好, 一輪嘴o翕英文開正佢o個瓣! 第四集上半部佢講dignity同埋整容o個part寫得唔錯呀, 幾有意思…做人最緊要就係接受自己與生俱來o既一齊, 而唔係懷疑自己o既特質…講得幾好!

睇o左廿幾集, 但我又真係不太接受到張耀揚…最難受係成日flash back講佢後生時 (仲要係好多, 差不多每集都會播一次)…真係有d難受! 其實張耀揚當年o係電影圈好似曾經o係型o個批, 但依家佢有d似四哥, 但四哥老佢n年都好似型過佢…哎!

阿葛依然係幾搞笑…余安安都做得唔錯! 仲有, 其實梁思浩係咪扮緊o個個k.oten?

而最驚喜o既係董敏莉…做得幾自然, 佢真係做戲好過唱歌啦…新人o黎講直頭可以話十分唔錯, 好出…個人認為好過晒無綫d新紥姐仔法拉/子珊喎 (我指演技)!

仲有娛樂新聞台一大同班主播客串…6號, 鄭文, 莫家淦, 朱真真, 黃子俊, 仲有小室個徒弟zoie譚凱琪,,,真係全台都有份做…感覺好似亞視, 何b師傅同朱慧珊做做o下藝員都要去報新聞…哈哈! 6號都做得幾好, 班主播之中係最鍾意睇佢同埋陳貝兒…鄭文箍完牙之後個樣反而怪o左好多, 以前好似自然d, 依家搞到好肉酸呀! 仲有搵朱真真做top model又係搞笑…睇睇o下佢有d似梅小惠…有線真係好唔夠人!

暗戀張耀揚o個個女仔都做得幾好...另外個女同事都唔錯, 有d似”天幕下”個大家姐何綺雲...佢o地係咩人o黎o既呢?! 仲有阿葛同余安安個女都做得幾好, 又係邊個o黎呢?!

Oh, o岩o岩search到喇: 林穎彤, 原來做o左好幾年童星, 佢真係做得唔錯, 同埋幾靚女, 有d似台灣個楊丞琳! 嘩! 睇番佢d sites, 真係大個o左好多, 依家個樣唔同晒 (係真係都幾唔同o個隻, while唐寧係細個同大o左一d都無變o個隻!), 不過我以前無睇過佢做戲, 如果唔係佢細個時o既形象會深深印o係腦海, 好似唐寧咁...睇番佢以前佢做“萬家燈火”時真係好細路仔樣, 依家就已經變成少女, 甚至大人!

呢位小朋友o既個人網頁http://www.tungtung.in-tw.com/

仲有“刑偵”個棠棠黃美棋客串做其中一個學生, 十幾年後, 依家真係好大個喇! 呢個小妹妹真係睇住佢大, 不過佢個樣又真係仲好細個喎, 好似13,14歲咁…有次o係地鐵見到佢拖住個男仔, 仲有幾個o靚仔一齊…同o係電視見到佢個樣無咩分別!

有無人知道佢o地影補習社外面幢大廈o係邊度呢?

仲有, 聽得多肥媽隻主題曲…依家個旋律成日o係我腦海盤旋…點算? 仲要差唔多每集flash back都播o下 “eternal flame”…又真係好係o個個年代!

其實整體o黎講套戲真係拍得唔錯, 質素算幾好, 好難得...可惜o係有線播, 無慣性收視o既幫助, 相信無咩人睇…真係o徙o左!

大家如果有興趣, 可以睇o下:
“補習天后”@土豆