2007年9月24日星期一

9-24(mon) 邵仲衡

早前講開“大時代”&邵仲衡…亦因為睇番“大時代”, 又搵番好多有關邵仲衡o既劇集, 包括佢另一代表作“天倫”!

佢同郭藹明o係“天倫”入面o個段情, 其實係幾經典…我當時無咩好認真咁睇 (我今次睇到後段都明白點解當年我無咩點睇, 因為又係呢d大製作, 勁heavy勁慘o既戲…睇到人好心o翕!), 都唔記得晒d情節喇…淨係記得當時宣傳成日講“三離三合三離三合三離三合”…令我諗梁朝偉同曾華倩! 依家當係一套新劇咁睇…佢o地呢段真係幾好睇喎! 仲有黎姿小姐首插曲“我祗怨自己”都係好經典…以前去k成日唱…!


(邵仲衡+郭藹明@天倫…”愛情影畫戲” MV)

佢兩個都真係幾襯, 其實邵仲衡拍邊個都ok襯,“大時代”o既李麗珍, 仲有佢o個時o既真正女朋友劉美娟!

最唔明係點解要搵曾慧雲做郭藹明個情敵? 真係幾無說服力o下…佢邊忽似邵仲衡個表妹?! 點都似表姐/表姨多d o卦?! 真係繼搵佢做“皇上保重”劉德華個皇后之後又一力作!!! 唔係話佢做得唔好, 而係完全唔適合…應該搵個 o靚妹d, 刁蠻任性d o既少女做會比較有說服力!

邵仲衡同郭藹明呢條感情線真係道盡嫁入豪門o既苦況…都好鬼慘o下…真係唔好羨慕阿子淇, 瑞恩, 或者係玲玲得咁早! 劇情仲要講最後佢o地個bb都死埋…超sad! 郭藹明仲要差d出埋家, 好震撼!

嘩! 有邵仲衡fans仲剪晒邵仲衡同郭藹明o既部份出o黎…真係好有心…亦方便好多…


(TVB - The Link “天倫” - 邵仲衡+郭藹明部份part 1)

仲有, 唔知大家有無發覺“天倫”呢個班底 (即包括蔡少芬+黎姿+關禮傑等)…成日都會係拍同一套劇, 十幾年如是…好似03年o既“黑夜彩虹”, 仲有依家拍緊o既“珠光寶氣”…可惜無郭藹明同邵仲衡!!! 不過前兩日睇報紙, 話佢剛簽o左亞視, 唔知係咪真呢? 係就好, 有得睇睇番佢!

以前都無發覺佢咁型, 係依家睇番佢d舊戲真係覺得佢幾靚仔又幾型 (可能係對比起依家d男藝人)! 當然, o係“大時代”個大佬角色就更加型, 雖然呢個官仔骨骨少爺角色都十分討好, 而邵仲衡本身個感覺亦都真係幾討好o下! 真係不禁要再問多次…點解佢會紅唔起 (我意思係佢應該更紅)?! 同埋, 我都好認同佢真係同十多年前o既麥包哥哥有d似樣…唔係有讀者講番起我都唔記得我當年都真係有咁覺得過…不過當然係邵仲衡靚仔d!

搵到一個邵仲衡網頁, 都幾多o野睇, 同埋好多video link…唔錯!
http://www.davidsiuchunghang.com/

愈睇番d片段, 真係愈覺得郭藹明好靚, 好大方, 好高貴, 真係有種與別不同o既氣質…佢91年選香港小姐時, 反而唔覺得佢太靚, 可能係d化妝技巧令到佢有d娘…你睇o下佢總決賽個髮型, 真係唔知想點?! 成日都覺得d港姐反而係選完做番自己係靚過選o個日好多, 都唔知係咪d髮型同化妝特登要搞到怪怪咁…又或者係我o個時無taste啦…不過d評判o既眼光真係雪亮o既, 佢仲要係愈睇愈順眼o個隻, 到16年後o既今日一樣咁kum睇 (代表作係今年金像獎, 嘩, 差不多40歲, 個樣依然好清秀好靚)…佢同屆o既亞/季軍周嘉玲同蔡少芬的情況亦一樣, 反而愈老愈靚!

佢拍“天倫”時仲算係好新, 真係做得幾好, 其實佢真係好有potential, 拍第一套“大時代”時, 亦都做得唔錯! 佢仲有一套同陶大宇+羅嘉良拍o既“孽吻”我都幾鍾意睇! 唯一唔明係點解佢o係“刑偵2”入面做得差o左咁多…除o左話藍嘉文個角色超唔討好之外, 佢o係入面搵手遮住塊面喊o個一幕我都好深刻…後期睇番, 先知佢其他戲其實做得好好!



之前亦都睇到一段有關當年吳雨遊說部藹明參選港姐o既經歷…幾有趣!

[太陽報]造星見聞錄—郭藹明的決定
19/07/2007 [吳雨專欄]


在藝員訓練班裏,我不知說了多少遍,做藝人除了有天分外,努力不懈是必然,但其實最重要者,但又不能直接宣之於口,就是運氣!常言道,一命二運三風水,四積陰德五讀書。好明顯,命與運是主宰一切,最後所謂讀書就是勤奮努力,新界的牛一生努力換來的是避不開被宰割命運,想落幾令人氣餒!

娛樂圈屬偏門行業,藝人要走紅絕對要靠運氣,所以常聽一些紅了的藝人講入行經過,很多都是說無心插柳,誤打誤撞便入了行,運氣使然便紅起來,這確是實話,而我亦見過甚至經歷過不少事例,不由你不信!

羅省的首次會面

九一年我負責香港小姐統籌,鑑於港姐質素愈來愈差,遂首創向海外招募,希望吸引一些從香港過去唸書的大學生,真正配合美貌與智慧的口號,首站便是美國羅省。

我是抱着很大期望,希望幸運之神替我們找幾個絕色佳麗便可提早打道回府,那便功德無量矣。我們在羅省第一天面試,便看見一個清純有氣質兼唸電子工程的碩士女生,她算不上絕色美人,但那分充滿自信的眼神、溫文爾雅的談吐,便吸引着我們一班評判,我當時暗忖皇天果然不負有心人,我終於找對人選了!

與她談了約十多分鐘,其實我們各人心中已是一錘定音,沒甚異議了,我馬上通知港方同事謂甫出師便告捷,已找到一合適人選,希望往下去的溫哥華和多倫多站亦有收穫,其實我們預算只找三、四位便夠數,今番一開始成績已不俗,各人遂放下一半心頭大石,繼續餘下行程矣!

到達溫哥華,亦找到一兩位合適人選,但比那位碩士準港姐略差一點,其實選美揀蟀、最棹忌是太平均,只要有一兩個突出,便能令大家有焦點,足可以使整個選美活動有炒作,今次已找得王牌,勝券在握矣!

豈料事與願違,突接港方同事知會謂那位碩士候選者因要考試竟推辭參選,弄得我們空歡喜一場,世事就這樣奇妙,當晚我剛好閒來無事,若我有應酬,便不會打電話給她,就因為這個電話便給她人生起了很大轉捩點,亦可說幸運之神已開始眷顧她了。

我在電話中鼓起如簧之舌,向她闡述應參選三原因,一是我千里迢迢來到見到她,竟被取錄,此乃大家緣分際遇;二是選美過程,雖短短三數月,所見所學的東西是她讀一世大學也不能學得到;三是參選得失與否亦可留作日後美好回憶,此非每個少女都有如此機遇!

一二三改變一生

我講了約十分鐘,她仍舉棋不定,此時我知此姝性格倔強,非出撒手鐧不成,於是我便數十聲,答應與否便在十聲內決定,我開始數一、二、三……還未到四時,她便很快及堅決地說:「好,吳生,我答應你,多謝你給我機會!」就這一、二、三便改變她一生,冥冥中不是有主宰嗎?若非我一念之下,九一年的港姐冠軍又豈能給她摘冠而去。今屆的電影金像獎最佳男主角劉青雲豈會得此賢內助,郭藹明你的決定肯定是百分百對!

15 Comments:

Anonymous TONE said...

我都好中意睇邵仲衡同郭藹明,佢兩個襯到絕
乜邵仲衡簽咗ATV咩,佢唔係開車行咩

1:27 下午  
Anonymous 紙巾 said...

芒姐,好耐冇見喇!早排見到你寫閃電傳真機都想留言,不過由於呢排個人好懶唔想打字,所以都係睇完就算。不過見到你講邵仲衡同郭藹明,就真係忍唔住要留返幾隻字啊,哈哈。

其實我好鍾意佢地既,前者係因為當年睇完大時代,後者其實係佢選港姐時已經好鍾意佢,覺得佢好靚好大方又好叻。當年d港姐好少會有咁高學歷(footnote 1),我記得佢好似幫"萊思康"電子辭典賣廣告,佢個title係"南加州大學既碩士生",其實學歷勁過'快譯通"既劉家傑啦(footnote 2)。

其實我完全唔記得左郭藹明做過天倫,因為呢套片我冇乜點睇,只係記得個名。但我腦海有d零碎既片段,想麻煩芒姐同大家幫我重組一下啊。郭藹明劇中角色係一個演員來架可? 我唔知記得好似有d片段,話郭藹明人氣下滑,好似a左好耐導演俾戲佢拍,最後好似安排左個”一樓一”既角色俾佢。而佢就好認真,就突登去果d地方觀察一下果d人既動態,唔知係咪咁就俾記者影左(佢好似在樓梯扮食煙),話佢撈得好唔掂咁。但之後知道原來佢係為部戲,之後就讚佢演繹得好放???? 其實我唔知係咪撈亂其他戲既情節,或者加d自己既想像力,所以回憶到以上片段。請大家替我解開疑團吧,謝謝。

另外,邵仲衡我又係好鍾意。當年佢做大時代做黑社會大佬,真係超型囉,我細個發夢都會見到佢(哈哈,其實早兩個月我發夢都有見到佢,可能因為在youtube重溫“孝婷戀”)。本身邵仲衡都過一米八,李麗珍拍去佢到,真係好小鳥依人咁(雖然佢個角色性格其實係倔強),尤其邵仲衡去油麻地(?!)接佢放工,後面成班古惑仔跟住,果到真係超型,好正。

不過講開又講,早排睇明周一篇關於艾威既訪問,佢話其實原本韋家輝搵佢做丁蟹其中一個仔,於是佢好開心,買左勁多花恤衫諗住襯返個角色。點知後來因為搵左邵仲衡做大佬,艾威個樣做細佬又冇乜說服力,於是就易角,佢話好失望。但我覺得邵仲衡做丁孝蟹呢個角色真係好好,亦正亦邪咁。其實佢真係好鍾意婷婷囉,仲諗住放棄所有野同佢一齊走,但婷婷唔肯,真係feel到佢好sad。後來丁蟹要坐監,丁孝蟹仲要搵人掟方家d人落街(唉~唔記得呢part個情節係點,pls correct me if i’m wrong),連佢心愛既女人都唔放過,真係好心寒好痛心。

p.s. 我都記得邵仲衡開左車行,間唔中幫d汽車雜誌試下車咁。但wiki都話佢現為亞視演員。

(留言留到要寫footnote~真係唔好意思~其實我而家在office用梗word打呢篇野~扮做野~足足一版紙! 哈哈)

Footnote 1:其實去到九十年代後期李珊珊讀到中六都可以做冠軍,同而家好唔同。諗諗下李珊珊/譚小環/袁詠儀果d點當年點去其他地方"宣揚香港"。仲有我見呢幾年明珠台晚間新聞都會訪問剛出爐的港姐冠軍,要講英文架嘛,以前果d冠軍真係唔知點算。不過當然果時明珠台都未必會訪問佢地。)

Footnote 2: 劉家傑好似未完成大學學位架可?佢係咪俾港大踢出校架? 不過講開又講,郭藹明果時好似話過其實佢未完成個碩士學位就返左來選港姐,咁好似又同吳雨篇文章幾吻合咁。

2:21 下午  
Anonymous micchy said...

前排'天倫'在 收費電視 重播, 我都特登睇呢 part~ 每逢佢地 d 好激既片段, 就會播黎明既歌, 呢首歌無出過碟!! 而且片尾字幕亦從來無提過!! 我懷疑因為主題曲係劉華的"該走的時候", 所以唔提插曲. 不過敵對歌手響同一套劇有歌, 呢個情況幾少見.

re: 紙巾, 郭藹明拍"一樓一"戲係"天倫"情節. 不過唔係佢人氣下滑, 係講佢同邵仲衡冷戰(咁上下), 所以出返去拍戲......

11:32 下午  
Anonymous shaw_mag said...

Arrgh..., Mon Jeh, you are always "遲咗d" (about 10 years late, ha...ha...). But, better late than never. Of course David Shiu is 又靚仔又幾型. I like him even before 大時代; Since his 1988 drama 阿德也瘋狂 (other casts: 劉江,羅慧娟,邵美琪,周星馳 - check my youtube if you are interested),to be precise. It's good if he decided to come back to tv world (ATV), if the news is correct.

12:18 上午  
Anonymous Kitty said...

今日亞視"下午麼麼茶"介紹亞視新logo新節目的發佈會,全台大哂冷,當中有介紹亦見到邵仲衡,所以大家又可以o係亞視見到佢,不過我唔知佢係合約定係部頭呢?陳彥行亦過咗去,不過佢係部頭o既,早掛仲去過有線o既節目。

其實我覺得邵之所以唔紅,無非係唔受tvb重用,tvb根本無心俾多d主角佢做,亦無心"谷起佢",我估當年邵離開都因為咁。

不過我估唔到邵真係出返o黎,大約十二年前佢過咗亞視,做咗幾年退出咗,然後就有時睇報紙見佢介紹汽車,我以為佢已經"疊"埋心水做生意,不過我都想睇返佢做戲。

另外,我想講一部邵仲衡滄海遺珠的tvb劇,叫"黃土恩情",女主角係崔嘉寶,雖然佢有好多時要做壞女人,但呢部佢絕對係正派而且做得好好,風頭甚至超過邵仲衡,邵係演軍官超型,可謂高大靚仔,崔演o既堅強女兵都幾靚,令我一度留意佢,o個時佢地真係勁襯。首播安排在1991年大約2月下午2至3時左右播出,當年我小學上午班放學日日追。,雖然個戲名好似好老套,劇情係講日本侵華,但劇情唔老套,我覺得極之好睇,可謂峰迴路轉,但唔係heavy,大團員結局。

其實邵同崔都係88年tvb銀河十星,可惜tvb最後都無重視佢o地,"黃土恩情"就係例子,佢兩個其實都好少擔正,呢部終於擔正又唔上黃金時間,白白浪費好戲好演員。

講開崔嘉寶,佢另一部出色演出我覺得係"金牙大狀"裡面o既蠢老婆。另外,佢退出之後應該係嫁咗俾晨曦足球會o既周文曦(好似係呢個名),97年已生咗個仔,不過宜家唔知佢有幾多細路。

2:20 上午  
Anonymous shaw_mag said...

thx for the confirmation, Kitty.
In David's earlier career, tvb heavily promoted him. He was either in 1st or 2nd leading roles. Even I who lived outside of HK knows many of his dramas. Besides the well known 大時代,天倫, and 黃土恩情, he was also starring in 優皮幹探, 燃燒歲月,螳螂小子, 阿德也瘋狂 (his role was heavier than 周星馳). In one big tv event 電視先鋒群英會 (I guess in 1990) , tvb put him standing in the center position among more than 100 artists. So, he was heavily promoted by tvb at that time. But maybe he did not want to extent contract (at that time contracts lasted in 3 years), or his EQ was not too good (at least not in tvb expectation), or did not 埋堆.
But, anyway, now let's forget the past and welcome his come back to the tv. I hope he keep his figure fit before start acting again. The last time I saw his picture, he was way above slim. ha...ha... ; also he has to improve his acting skill.

7:24 上午  
Anonymous christy said...

係呀係呀
我都覺得郭藹明好靚好大方樣
佢真係化少少妝已經勁靚
好過而家好多化濃妝既姐仔
我之前都睇過吳雨一篇野
佢話有次郭問佢科大o係邊
吳雨就問郭係咪想去讀書
點知郭竟然答佢: 梗係唔係, 我去教書呀!
哈哈哈
有學識又靚又係港姐冠軍既人真係好難得。
佢而家又係幸福爆。 好羨慕呀 :P

11:16 上午  
Anonymous 匿名 said...

邊個係曾慧雲?

我都唔記得邵仲衡同劉美娟拍過拖, 只記得佢曾經係邱淑貞的男朋友(參選港姐時)。

12:31 下午  
Blogger 芒姐 said...

匿名,

想知邊個係曾慧雲, 可以參考:

http://princessdiane.com/oldies/oldfriends.html?

[女] 八十年代...第5位

邵仲衡同劉美娟好似拍O左好多年, 其實我淨係知佢同過劉美娟O乍, 邱淑貞我反而唔記得...

2:39 上午  
Blogger 芒姐 said...

christy,

靚好多個都可以做到, 但佢O個種係有埋氣質同埋好有修養的感覺...不過肥番D會好D...

2:41 上午  
Blogger 芒姐 said...

shaw_mag,

哈哈...你點可以咁話我...雖然係事實...哈哈! 不過今次又無上次"我本善良"咁瘋狂, 畢竟我只係睇O左D片段, 唔係日日追...佢真係幾高大有型! 不過依家好似有D中年發福...嘻!

2:43 上午  
Blogger 芒姐 said...

Kitty,

OH...真的嗎? 咁要[目及]實亞視喇...

你講開"黃土恩情"...我又好似有睇過,"軍官"邵仲衡+"女兵"崔嘉寶, 我又真係有印象...再睇番你話1991年大約2月...我都係返緊上午班...咁我諗我都真係有睇過呢D"翡翠首映"喎! O個期有好多未播過O既戲, 例如"日月神劍", 仲因為大收有得開續集添!

前幾個月我O係PP間DAN RYANS見過崔嘉寶同佢老公, 真人都幾靚幾清秀, 仲保養得幾好! 之前睇報紙好似話佢生O左三/四個, 唔知有無記錯...?!

2:49 上午  
Blogger 芒姐 said...

micchy,

我以為黎明首歌係播O下O架O乍喎...原來插曲O黎O既咩?

片尾字幕插曲係咪"我袛怨自己"? 仲有無第二隻?

2:51 上午  
Blogger 芒姐 said...

紙巾,

好耐無見...你係"鳳凰四重奏"的子君嘛...我記得你!

留言留到有FOOTNOTE, 我都係第一次見...好有心機呀O下...我連寫ESSAY都差D想唔寫FOOTNOTE...哈哈...好有HEART!

"一樓一”那PART MICCHY已解答了...

發夢見到邵仲衡...唔錯呀, 係一個幾好O既夢! 去油麻地O個PART其實幾頂癮, 不過算啦, 佢都係要營造戲劇效果...係幾型O既, 好江湖片的感覺!

艾威做邵仲衡細佬, 又的確係欠缺說服力O既!

至於郭藹明, 形象真係幾討好幾有學問...仲好靚! 不過我個人認為劉家傑D英文又真係未必比佢差, 因為我見過好多人去完外國浸N年D英文都係咁, 反而你睇DO姐都係O係香港土生土長又無讀過大學, 英文一樣得...不過郭的英文當然唔錯, 劉家傑亦講得好標準!

RE Footnote 1: 講開又講, 其實90年代初明珠台係有個節目叫"eye on hong kong”, 一到每年選完港姐就會整個變奏版叫"eye on miss hong kong”...係以英文訪問得獎o既港姐同埋播番d決賽精彩片段…93同94年都有...真係笑爆咀O架! 我仲有少少訪問片段未洗...好好笑...!

http://hejnom.blogspot.com/2006_04_28_archive.html

3:04 上午  
Blogger 芒姐 said...

TONE,

之前我都睇過話佢去O左開車行, 估唔到佢會入番娛樂圈...有D期待!

3:05 上午  

發佈留言

<< Home